Overview

Nod y modiwl yw gwella dealltwriaeth myfyrwyr o dechnoleg deallusrwydd artiffisial yn seiliedig ar iaith, sydd erbyn hyn yn trawsnewid y byd o’n cwmpas. Mae'r cynnwys yn drawsddisgyblaethol ac yn addas ar gyfer myfyrwyr sy’n meddu ar wahanol lefelau o ddealltwriaeth blaenorol o’r maes.

Byddwn yn canolbwyntio ar addysgu agweddau sy’n gynyddol ddamcaniaethol o gymhwyso’r dulliau deallusrwydd artiffisial diweddaraf awtomataidd i ddeall, trawsnewid a chynhyrchu iaith naturiol amlfodd. Bydd yr elfennau ymarferol o’r modiwl yn blaenoriaethu darparu cyfleodd i fyfyrwyr gael profiad o weithio gyda’r llyfrgelloedd â ddefnyddir gan fawrion y maes megis Explosion.ai, HuggingFace, Meta ac OpenAI er mwyn datblygu modelau newydd. O ystyried bod y maes yn datblygu ac yn newid ar gyflymder cynyddol, byddwn yn sicrhau bod myfyrwyr yn dysgu’r sgiliau angenrheidiol sydd eu hangen er mwyn ymchwilio, gwerthuso a chymhwyso’r datblygiadau cyson hyn. Bydd y modiwl hefyd yn sicrhau bod myfyrwyr yn gyfarwydd â thechnolegau amlieithog, yn arbennig o ystyried heriau datblygu technolegau o’r fath ar gyfer ieithoedd llai eu hadnoddau fel y Gymraeg.

Bydd y meysydd dysgu yn cynnwys hanfodion prosesu iaith naturiol (NLP) a dulliau dysgu peirianyddol ochr yn ochr â chyfieithu peirianyddol, lleferydd i destun, testun i leferydd ac AI Sgyrsiol sy’n cynnwys defnyddio modelau iaith mawr ac AI cynhyrchiol.

Mae’r modiwl hwn yn cyflwyno myfyrwyr i gyfres o agweddau cymwysedig, damcaniaethol ac ymarferol o dechnolegau iaith, fydd yn eu cynorthwyo i gael lefel uwch o ddealltwriaeth o’r sgiliau cymhleth sydd eu hangen i ddatblygu dulliau wedi’u hawtomeiddio o drin data iaith naturiol.
Mae dosbarthiadau yn cynnwys cydrannau ymarferol gydag elfen gref o Dechnoleg Gwybodaeth, ymarferion ar sail project, trafodaethau a gwaith grŵp. Bydd myfyrwyr hefyd yn caffael y sgiliau a’r wybodaeth angenrheidiol ar draws gwahanol feysydd o dechnolegau iaith, gan gynnwys datblygu rhai technegau ac adnoddau ar gyfer ymchwil gefndirol, rheoli terminoleg, dadansoddi testun a sgiliau proffesiynol. Bydd y modiwl yn cynorthwyo myfyrwyr i ddod yn gyfarwydd gydag agweddau o ddatblygiadau technoleg iaith yng Nghymru.

Ymhlith y pynciau yr ymdrinir â hwy mae: 1. Cyflwyniad i ddulliau NLP 2. Egwyddorion Cyfieithu Peirianyddol 3. Technoleg Lleferydd: testun i leferydd 4. Technoleg Lleferydd: adnabod lleferydd 5. Deallusrwydd Artiffisial Sgwrsiol a dysgu dwfn

Assessment Strategy

-trothwy -50%> Mae’r myfyriwr wedi cyrraedd y safon isaf sydd yn dderbyniol o ddealltwriaeth a/neu wybodaeth ym mhob un o’r deilliannau dysgu. Gall y myfyriwr ddangos y lefel isaf o ddealltwriaeth o'r cysyniadau sylfaenol a gallu eu cymhwyso i ddata gyda rhywfaint o gywirdeb. Rhaid i'r ateb ddangos tystiolaeth o beth astudiaeth gefndir o ffynonellau.

-da -60%>Mae’r myfyriwr wedi cyrraedd safon well na’r rhelyw o ddealltwriaeth a/neu wybodaeth ym mhob un o’r deilliannau dysgu, ac mae ganddynt ddealltwriaeth glir a chywir o gysyniadau; y gallu i gymhwyso cysyniadau at ddata yn feirniadol ac yn feddylgar; tystiolaeth o ddarllen eang a chyfeiriadau clir a chywir at ffynonellau, gan gynnwys ffynonellau cynradd o lenyddiaeth gyfoes; yn rhydd rhag camddealltwriaeth a gwallau cynnwys ac o ddeunydd amherthnasol ar y cyfan.

-rhagorol -70%> Mae’r myfyriwr wedi cyrraedd safon drwyadl o ddealltwriaeth a/neu wybodaeth ym mhob un o’r deilliannau dysgu, neu mae’r myfyriwr wedi arddangos lefel eithriadol o gyrhaeddiad mewn un neu fwy o’r deilliannau dysgu ac wedi cyrraedd safon gyffredinol dda: mae’r myfyriwr wedi magu dealltwriaeth drylwyr o'r pwnc, o ran cynnwys a theori; mae’r myfyriwr yn gallu cymhwyso cysyniadau yn glir ac yn gywir; tystiolaeth sylweddol o feddwl mewn modd gwreiddiol a beirniadol; dadl glir, resymegol; tystiolaeth o’r gallu i wneud cysylltiadau newydd rhwng pynciau a/neu gymhwyso dull newydd at broblem; lefel uchel o gymhwysedd cyfathrebol; yn rhydd o unrhyw gamddealltwriaeth, gorsymleiddio a deunydd amherthnasol; tystiolaeth o ddarllen ac ymgysylltu helaeth ag amrywiol ffynonellau cynradd, gyda chyfeiriadau clir a chywir at ffynonellau.

Learning Outcomes

• Bydd myfyrwyr yn datblygu dealltwriaeth soffistigedig o’r prif faterion, deilliannau a chynnydd mewn gwahanol dechnolegau iaith ar gyfer gwahanol ieithoedd.

• Bydd myfyrwyr yn medru cyflwyno cysyniadau yn glir ac yn ystyrlon, gwerthuso syniadau yn feirniadol a chynllunio a chynnal project ymchwil i lefel uwch ar bwnc o’u dewis yn y maes hwn.

• Bydd myfyrwyr yn medru integreiddio ystod o bynciau ieithyddol a chyfrifiadurol wrth ddadansoddi enghreifftiau o dechnolegau iaith mewn gwahanol sefyllfaoedd uniaith ac amlieithog i safon uwch.

• Bydd myfyrwyr yn medru ysgrifennu papurau ymchwil ar bynciau blaengar yn y maes, a dod â gwybodaeth o wahanol feysydd at ei gilydd er mwyn medru delio gyda gwahanol bynciau o fyd technoleg iaith ar lefel uwch.