Modiwl SCL-1115:
Y Gyfraith yn Gymraeg

Overview

Bydd y modiwl yn cynnwys elfen gref o ddatblygu sgiliau ymchwil cyfreithiol er mwyn cyflawni tasgau yn y dyfodol megis drafftio llythyrau cyfreithiol, llunio nodiadau achos, a drafftio deddfwriaeth. Rhoddir pwyslais ar gywirdeb gramadegol y tasgau hyn, a rhoddir arweiniad ar ysgrifennu Cymraeg gyfreithiol gaboledig a chywir. Bydd pwyslais hefyd ar drafodaethau cyfreithiol llafar, a rhoddir arweiniad ar iaith lafar gywir sy’n briodol i’r cyd-destun. Bydd cyfle i ymarfer sgiliau a fydd yn foddhaus i’r myfyrwyr wrth iddynt ddilyn eu cwrs gradd yn y Gyfraith (e.e. ysgrifennu nodiadau cydlynol, crynhoi, trosi o un iaith i’r llall). Rhan bwysig o’r modiwl fydd paratoi ar gyfer y cyflwyniad llafar lle bydd y myfyrwyr yn cael cyfle i gyflwyno elfen benodol o’r gyfraith o flaen cynulleidfa o ddarlithwyr a chyd-fyfyrwyr. Bydd y modiwl hefyd yn galluogi’r myfyrwyr i ymarfer a datblygu eu sgiliau ymchwil cyfreithiol ac iaith trwy ymarferion ar safle Blackboard y modiwl.

Assessment Strategy

A- hyd at A Rhagorol: Bydd myfyrwyr rhagorol (A- hyd at A) yn cyflawni'n gyson gadarn ar draws y deilliannau dysgu, ac yn cyfuno hyn â gwreiddioldeb, gwybodaeth eang o'r pwnc yn ei gyd-destun ehangach ynghyd â dadleuon a dadansoddiad treiddgar a soffistigedig.Ateb rhagorol, sy’n dangos meistrolaeth dros y pwnc dan sylw heb fawr ddim lle o gwbl i wella. Mae’r ateb yn cynnwys yr holl bwyntiau a dadleuon perthnasol, ynghyd â gwerthusiad llawn annibynnol ac aeddfed o’r testun, heb fawr ddim camgymeriadau neu gynnwys amherthnasol. Lle bo’n berthnasol, bydd yr ateb hefyd yn dangos tystiolaeth o werthusiad cymharol fanwl o’r materion dan sylw. Bydd yr holl ddeunydd a chyfeiriadau (lle bo’n berthnasol) wedi’u cyflwyno bron yn berffaith yn yr ateb, a bydd yr ateb wedi’i lunio’n hynod dda ac yn rhagorol yn ramadegol yn Gymraeg/Saesneg.

B- hyd at B+ Da: Bydd myfyrwyr da (B- hyd at B+) yn llwyddo'n gadarn yn yr holl ddeilliannau dysgu a restrir. Ateb cynhwysfawr, yn cynnwys yr holl neu bron y cyfan o’r deunydd sy’n berthnasol i’r cwestiwn a dim amherthnasedd, neu ychydig iawn; yr holl ddeunydd a’r cyfeiriadau yn gywir at ei gilydd, heb ddim anghywirdeb na gwallau, gan gyflwyno’r cyfan mewn dadl glir, resymegol a beirniadol, ond sydd â lle i wella ei adeiladwaith a’i gyflwyniad. Ateb sy’n dangos hyfedredd llwyr yn y pwnc.

C- i C+ Da/Boddhaol: Bydd myfyrwyr lefel C- i C+ yn llwyddo'n ddisgrifiadol yn yr holl ddeilliannau dysgu a restrir. Ateb sydd, er ei fod bob amser yn gywir gan fwyaf, serch hynny yn methu â gwahaniaethu rhwng deunydd perthnasol ac amherthnasol, ac sydd â diffyg beirniadaeth. Ateb sy’n ddibynadwy o ran cywirdeb, ond nad yw’n gynhwysfawr neu nad yw’n hollol berthnasol.

D- hyd at D+ Trothwy: Bydd myfyrwyr (D- hyd at D+) yn dangos sgiliau ymchwil boddhaol mewn rhannau o leiaf o'r pwnc a ddewiswyd ganddynt, a byddant yn gwneud ymdrechion rhannol lwyddiannus o leiaf i archwilio a dadansoddi'r wybodaeth ac i ysgrifennu'r project mewn dull academaidd. Ateb sy'n gywir gan fwyaf o ran cyflwyno deunydd, ond sy’n gynnwys lefel sylweddol o wallau, ac felly nid yw’n hollol ddibynadwy.

Learning Outcomes

• Ateb cwestiynau llafar am y gyfraith mewn sefyllfa holi ac ateb.

• Bod yn ymwybodol o wahanol gyd-destunau iaith (ar lafar ac yn ysgrifenedig) a'r modd y dylid eu defnyddio yn ôl y sefyllfa, y diben a'r gynulleidfa.

• Crynhoi deunydd cyfreithiol yn y Gymraeg.

• Datblygu gwybodaeth am ddrafftio cyfreithiol a sgiliau yn y maes.

• Trosi deunydd cyfreithiol o'r Saesneg i'r Gymraeg.

• Ysgrifennu nodiadau cydlynol a chynhwysfawr am destunau cyfreithiol yn Gymraeg, gan gynnwys penderfyniadau barnwrol.