Galwad y môr

Mae un o fyfyrwyr Prifysgol Bangor, sy'n dod o Tenerife, ar y trywydd iawn i wireddu breuddwyd oes o gael gyrfa ym maes amgylchedd y môr.  

Bydd William Reid, 21, o Puerto de la Cruz, yn graddio'r wythnos hon gyda BSc Sŵoleg Fertebratau’r Môr.  Mae wedi bod â gwir ddiddordeb erioed mewn mamaliaid môr.  Yn blentyn ymatebodd i hysbyseb swydd i ddod yn hyfforddwr Orca yn ei ganolfan bywyd môr leol yn Loro Parque.   Dychwelodd i Loro Parque ddeng mlynedd yn ddiweddarach "Cefais interniaeth yn Loro Parque, Tenerife.   Cefais brofiad gwerthfawr yno gyda phythefnos yn yr Adran Mamaliaid Môr a phythefnos yn yr Adran Pengwiniaid."

Meddai William, cyn ddisgybl yn Ysgol Brydeinig Tenerife:   "Mae'n deimlad gwych i raddio. Rydw i wedi gweithio'n galed a chael hwyl hefyd, er iddi fod yn dipyn o her i adael cartref ac astudio dramor."

Ychwanegodd am Fangor:  "Wrth astudio'r cwrs gwych ac unigryw yma roeddwn yn teimlo pe bawn i'n llwyddo i gael gradd y gallwn wedyn gael gyrfa ym maes amgylchedd y môr, sy'n bwysig iawn i mi yn arbennig yn y cyfnod yma pan mae'n  bur fregus." 

"Dwi'n hynod ddiolchgar i Dr Martin Skov, fy nhiwtor, am yr holl gymorth ac arweiniad mae o wedi'i roi i mi drwy gydol tair blynedd fy nghwrs.  Diolch hefyd i Brifysgol Bangor am fod â ffydd ynof i ac i'r holl staff sydd wedi bod mor gymwynasgar pan oedd angen hynny."

A dyma oedd gan William i'w ddweud am y dyfodol:  "Dwi'n gobeithio cael gyrfa ym maes amgylchedd y môr a helpu'r byd i gael gwell dyfodol."

Dyddiad cyhoeddi: 20 Gorffennaf 2018