Myfyriwr ym Mhrifysgol Bangor sy'n astudio Coedwigaeth o bell yn cael cydnabyddiaeth mewn cystadleuaeth goedwigaeth genedlaethol

Lansiodd Confor, y corff  sy'n cynrychioli'r sector coedwigaeth a phren ledled y Deyrnas Unedig, gystadleuaeth genedlaethol o'r enw  #TheFutureIsForestry yn San Steffan ym mis Mehefin 2019.  Y dasg?  Ysgrifennu traethawd neu greu ffilm fer sy'n ceisio ateb y cwestiwn “Sut ellir annog ffermwyr a thirfeddianwyr i blannu mwy o goed i sicrhau llawer o fuddion, ac yn enwedig liniaru effeithiau newid yn yr hinsawdd?”

Cafodd y canlyniadau eu cyhoeddi ar-lein (yn hytrach na chael eu cyflwyno gan yr Arglwydd Goldsmith, Gweinidog Defra mewn derbyniad min nos, oherwydd cyfyngiadau Covid-19).  Cafodd Nathan Adams, sy'n astudio MSc Coedwigaeth (dysgu o bell) ym Mhrifysgol Bangor ar hyn o bryd ganmoliaeth am ei draethawd.  Meddai Nathan “y pwyntiau allweddol a wnes i yn fy nhraethawd oedd bod y diwydiant adeiladu dan bwysau cynyddol i sicrhau ei fod yn codi adeiladau 'carbon sero net'. Mae hyn yn cynnwys nid yn unig y carbon gweithredol sy'n gysylltiedig ag adeilad ond hefyd y carbon ymgorfforedig (y carbon cysylltiedig sy'n deillio o'r deunyddiau adeiladu, y prosesau adeiladu, cynnal a chadw, gwaredu ac ati). Yn ei gyflwr presennol, all y diwydiant adeiladu ddim cyflawni 'carbon sero net' mewn project heb lefel benodol o wrthbwyso carbon. Roedd y traethawd y gwnes i ei gyflwyno yn gwneud y pwynt y gallai hyn fod yn ffynhonnell gyson a sylweddol o gyllid preifat i ffermwyr a pherchnogion tir trwy blannu coed.”

Wrth feddwl am y gydnabyddiaeth gyhoeddus a gafodd am ei waith, dywedodd Nathan “Dwi wrth fy modd fy mod i, fel myfyriwr coedwigaeth, wedi gallu ysgrifennu rhywbeth sydd wedi dal sylw gweithwyr proffesiynol coedwigaeth Confor. Dwi’n gobeithio y bydd yr erthygl yn cael ei darllen yn ehangach gan bobl yn y diwydiant unwaith y bydd wedi ei chyhoeddi ar wefan Confor.

”Dywedodd cyfarwyddwr cwrs Nathan, yr Uwch Ddarlithydd Coedwigaeth, James Walmsley, o'r Ysgol Gwyddorau Naturiol: “Dwi'n falch iawn bod syniadau Nathan wedi cael eu cydnabod fel hyn.  Mae coedwigaeth yn cynnig potensial aruthrol i liniaru newid yn yr hinsawdd, yn enwedig os ydy coed yn cael eu tyfu gyda'r bwriad o gynhyrchu deunyddiau adeiladu o ansawdd uchel sydd i bob pwrpas yn 'cloi' carbon mewn adeiladau am ddegawdau lawer.  Fel myfyriwr coedwigaeth rhan amser sydd hefyd yn gweithio fel ymgynghorydd cynaliadwyedd i Focus Consultants, mae Nathan mewn sefyllfa ddelfrydol i adnabod a datblygu cyfleoedd o'r fath ar gyfer coedwigaeth. ”  Wrth edrych i'r dyfodol, soniodd Nathan am ei fwriadau: “Yn gyntaf, mi fyswn i'n licio ailedrych ar y pwnc yma ar gyfer fy nhraethawd MSc. Yna mi fyswn i'n licio gweld y sector adeiladu yn cymryd camau sylweddol tuag at ddod yn garbon sero net a helpu'r sector coedwigaeth i gyrraedd targedau plannu blynyddol newydd ar yr un pryd. Mi fyddai'n wych cael bod yn rhan o ddatblygiad o'r fath yn y ddau sector.

”Dywedodd James Walmsley “mae ein rhaglenni dysgu o bell yn parhau i ddenu myfyrwyr hŷn hynod dalentog, ac mae llawer ohonyn nhw'n mynd ymlaen i wneud cyfraniadau sylweddol i goedwigaeth a choetiroedd yn y Deyrnas Unedig a thu hwnt.  Mae gan gymdeithas ddiddordeb mawr mewn coed, coetiroedd a choedwigoedd, ond eto ychydig iawn o bobl sy'n dewis eu hastudio'n academaidd.”  Pan ofynnwyd iddo pam ei fod yn astudio MSc Coedwigaeth ym Mhrifysgol Bangor, dywedodd Nathan “Gwnaeth fy ngwraig imi sylweddoli, yn hytrach na siarad am goed a choedwigoedd efo hi a'u hystyried fel dim mwy na diddordeb, y dylwn fynd ati i'w hastudio. Wn i ddim pam na wnes i sylweddoli hynny fy hun ond wedi dweud hynny mae hi'n aml yn gwybod sut rydw i'n teimlo cyn fy mod i'n gwybod fy hun!”Os oes gennych ddiddordeb mewn astudio am radd sy'n gysylltiedig â'r stori hon ym Mhrifysgol Bangor, ewch i www.bangor.ac.uk/natural-sciences/subject-areas/forestry/ neu cysylltwch drwy e-bost forestry@bangor.ac.uk / ffôn +44 1248 382881 / 2351 / cyfryngau cymdeithasol @BUForestry.

Dyddiad cyhoeddi: 29 Ebrill 2020