Cyfres o deithiau tywys o gasgliadau celf a serameg Prifysgol Bangor
Un o nifer o baentiadau gan yr artist o Fangor, Brenda Chamberlain sydd yng nghasgliad celf y Brifysgol.Bydd teithiau tywys yn cael eu cynnal o gwmpas Casgliadau Celf a Serameg Prifysgol Bangor rhwng Mehefin a Medi. Y bwriad ydi codi ymwybyddiaeth o’r casgliadau pwysig yma, gyda’r uchafbwyntiau yn cynnwys murlun gan Edward Povey yn Neuadd Powis, celf a serameg yng Nghoridor Ystafell Cyngor y Brifysgol a chyfle i weld a dysgu am waith celf gan artistiaid enwog fel Kyffin Williams, Brenda Chamberlain, Peter Prendergast a Frederick William Hayes.
Yn ogystal a’r teithiau cyffredinol fydd yn cael eu cynnal ym Mehefin ac Awst, bydd cyfle i fynychu teithiau gan dywyswyr gwadd arbenigol. Ym mis Gorffennaf bydd yr arlunydd Jeremy Yates yn arwain teithiau ar y pwnc ‘ y Celfyddyd o Roi’ gan ganolbwyntio ar rannau o’r casgliad. Ym mis Medi bydd David Roberts, cyn gofrestrydd y Brifysgol yn arwain teithiau ar ‘ “Cofadail Parhaol Bangor” : dyluniad a hanes Prif Adeilad y Brifysgol’.
Mae’r teithiau tywys yma yn rhan o ymgyrch ar y cyd gyda Chyngor Gwynedd sy’n bwriadu cynyddu mynediad i gasgliadau amgueddfeydd cudd y Brifysgol trwy’r prosiect ‘Ymgysylltu â Chasgliadau: Ehangu Mynediad at Dreftadaeth Gwynedd’ sydd wedi cael ei ariannu’n rhannol gan y Gronfa Treftadaeth Loteri. Bydd hyn yn rhoi cyfle i bobl lleol ac ymwelwyr i fwynhau a dysgu o’r creiriau sydd yn cael eu harddangos.
Taith blaenorol yn cael cyfle i astudio murlun yr artist, Ed Povey yn Neuadd Powis.Cynhelir y teithiau tywys o fynedfa Prif Adeilad y Celfyddydau, Ffordd y Coleg, Bangor ar Ddydd Llun 20 o Fehefin ac ar y Sadyrnau 30 o Orffennaf, 13 o Awst a 24 o Fedi. Cynhelir teithiau yn Saesneg am 11.00yb-12.00yp ac yn Gymraeg 12:30yp-1:30yp ar y dyddiau yma.
Os oes gennych ddiddordeb mynychu’r teithiau tywys, gofynnir i chi gadw eich lle gan mai dim ond lle i 15 person sydd ar bob taith. Gallwch wneud hyn drwy ffonio Storiel ar 01248 353368 neu e-bostio storiel@gwynedd.gov.uk
Dogfennau cysylltiedig:
Dyddiad cyhoeddi: 8 Mehefin 2016