Wrth dynnu sylw at arwyddocâd y wefan, meddai: ‘Rwyf yn croesawu’r datblygiad hwn yn fawr. Mae Prifysgol Bangor yn sefydliad sy’n rhoi gwerth ar sgiliau iaith Gymraeg ac sy’n annog staff a myfyrwyr i ddatblygu a chynnal y sgiliau hynny. Mae sgiliau Cymraeg fy nghydweithwyr yn hollbwysig o ran galluogi’r sefydliad i weithredu’n ddwyieithog a bydd Cymorth Cymraeg yn adnodd gwerthfawr iddynt yn eu gwaith o ddydd i ddydd. Ar lefel bersonol, wrth i mi ddysgu Cymraeg a defnyddio’r iaith fwyfwy yn fy ngwaith, byddaf yn sicr o droi at y wefan am arweiniad a chymorth’.

Tîm y broject yng Nganolfan Bedwyr (efo ambell un yn absennol o'r llun) Cafodd y wefan ei datblygu yng Nghanolfan Bedwyr, canolfan gwasanaethau Cymraeg y Brifysgol. Dywedodd Dr Llion Jones, Cyfarwyddwr y Ganolfan: ‘Gyda strategaeth Llywodraeth Cymru ar gyfer y Gymraeg yn rhoi pwyslais sylweddol ar hyrwyddo defnydd o’r Gymraeg, rydym yn gobeithio y bydd y datblygiad cyffrous hwn yn gyfraniad ymarferol tuag at gyflawni’r nod hwnnw ym Mhrifysgol Bangor, ac yn cynnig patrwm posib ar gyfer sefydliadau eraill.’