Seren Opera Rhyngwladol yn derbynanrhydedd gan Brifysgol Bangor

Bryn Terfel ar fin derbyn Gradd er Anrhydedd Prifysgol Bangor

Mae Prifysgol Bangor wedi gwobrwyo’r seren opera rhyngwladol, Bryn Terfel CBE, gyda Doethuriaeth er Anrhydedd am ei gyfraniad i gerddoriaeth.

Mae’r cawr cerddorol o Wynedd wedi llwyddo i gymryd saib o’i amserlen brysur i ymweld â Phrifysgol Bangor i dderbyn y wobr anrhydeddus. Mae'ry canwr, sydd wedi ennill gwobrau Grammy, Classical Brit a Gramophone yn ystod ei yrfa hyd yma, wedi mynychu seremoni arbennig yn y Brifysgol heddiw (Dydd Mawrth 28 Chwefror 2012).

Meddai Bryn Terfel, “Mae’n anrhydedd enfawr cael derbyn y Ddoethuriaeth yma mewn Cerddoriaeth gan Brifysgol Bangor. Dwi wedi bod yn ddigon ffodus i fwynhau gyrfa amrywiol yn y byd cerddorol ac mae cael anrhydedd yn brofiad gostyngedig iawn. Wrth edrych ar anrhydeddon diweddaraf Prifysgol Bangor, mae’n fraint cael ymuno â rhestr o unigolion talentog sydd wedi gwneud cyfraniad arbennig i’w meysydd penodol nhw. Dwi mewn cwmni da iawn.”

Ychwanega Dr David Roberts, Ysgrifennydd a Chofrestrydd Prifysgol Bangor, “Heb os, Bryn Terfel yw un o lysgenhadon mwyaf adnabyddus Cymru a’r canwr opera gorau i’r wlad erioed cynhyrchu. Mae’r Brifysgol yn falch iawn o allu gwobrwyo unigolyn sydd wedi gwneud cyfraniad arbennig i fyd cerddoriaeth – ac wrth wneud hynny yn rhoi Cymru a Gwynedd ar y map.”

Mae gyrfa Bryn Terfel wedi cyrraedd yr uchelfannau yn ystod y blynyddoedd diwethaf wrth iddo serennu mewn cynyrchiadau gan gynnwys Falstaff a Die Meistersinger von Nürnberg a pherfformio mewn rhai o dai opera gorau’r byd. Ond fe ddechreuodd ei yrfa fel plentyn yn cystadlu ar lwyfannau Eisteddfodau’r Urdd a’r Genedlaethol cyn symud ymlaen i astudio yn Ysgol Gerddoriaeth Guildhall yn Llundain.

Dyma’r eildro yn unig i’r Brifysgol gwobrwyo Graddau er Anrhydedd. Cafodd y rhai cyntaf eu cyflwyno i’r Archesgob Desmond Tutu, Sir David Attenborough, Rhodri Morgan a Sir John Meurig Thomas i ddathlu pen-blwydd y Brifysgol yn 125 nôl yn 2009.

Gwyliwch ran o'r Seremni a cyfweliad efo Bryn Terfel yma:-

http://www.bangor.ac.uk/bangortv/bryn_terfel.php.cy

mae lluniau o'r digwyddiad i'w gweld yma.

Dyddiad cyhoeddi: 28 Chwefror 2012