Newyddlenni

Cangen myfyrwyr IEEE Bangor yn cynnal ei hail ddarlith wadd

Cynhaliwyd ail ddarlith wadd cangen myfyrwyr IEEEE Prifysgol Bangor ar-lein ar 24 Chwefror 2021. Cymerodd dros ddeg ar hugain o fyfyrwyr ran yn y digwyddiad a gwrando ar ddwy sgwrs. Siaradodd Shaun Preston (Creo medical) a Pete Doggart (B-Secur ac ACE45) am eu profiadau yn symud o'r byd academaidd i ddiwydiant.

Graddiodd Shaun Preston gyda PhD ar ôl ymchwilio i strwythur cyfechelog newydd a'i ddefnydd mewn offerynnau haemostatig. Mae bellach yn Bennaeth Datblygu Offerynnau yn Creo Medical ar ôl bod yn arweinydd prosiect yn gweithio ar gyflwyno eu cynnyrch 'Microblate Fine' i'r farchnad. Soniodd Shaun am symud ei arbenigedd a ddatblygwyd yn ystod ymchwil ei PhD i amgylchedd masnachol lle mae cryn reoleiddio. Dywedodd Shaun “Rhoddodd fy ngradd PhD gyfle i mi ddysgu sut i ymchwilio a mynd i’r afael â phroblemau mewn ffordd wahanol. Mewn gwirionedd mae’r feddalwedd a ddysgais amdano pan oeddwn yn y Brifysgol yn rhywbeth rwy’n ei ddefnyddio bob dydd. Rydym wedi datblygu dyfais endosgopig sy’n cael ei ddefnyddio gyda thechnoleg uwchsain endosgopig. Mae'n galluogi llawfeddygon i gyflwyno ynni i effeithio ar lu o ganlyniadau clinigol”.

Shaun Peterson, yn cyflwyno ei ymchwil

An image of the instrument under ultrasound guidance. Energy is being applied in a controlled fashion through a minimally invasive approach.

Delwedd o'r offeryn yn cael ei ddefnyddio gyda

thechnoleg uwchsain.Caiff ynni ei gyflwyno mewn

modd rheoledig trwy’r dull sydd lleiaf ymwthiol.

Graddiodd Pete Doggart o Fangor gyda MEng mewn Peirianneg Systemau Cyfrifiadurol. Ers symud i fyd diwydiant, mae wedi gweithio gyda Jaguar Land Rover ar systemau cyfathrebu â cherbydau ac erbyn hyn mae'n arwain tîm bach o raddedigion PhD a pheirianwyr profiadol, ac wedi cyd-sefydlu busnes newydd hefyd. Dywedodd Pete “Roedd yn hyfryd cael siarad yn y digwyddiad rhithwir. Dysgais lawer o sgiliau pan oeddwn ym Mangor, yr wyf bellach yn eu defnyddio yn fy mywyd beunyddiol. Ac eto, rwyf wedi dysgu cymaint ers hynny hefyd! Pan oeddwn yn fyfyriwr, ni sylweddolais bwysigrwydd sgiliau annhechnegol i'm gyrfa yn y dyfodol. Dysgais o weithio mewn diwydiant fod gwybod sut mae pobl yn gweithredu yr un mor bwysig â gwybodaeth dechnegol. Roeddwn yn falch o rannu fy mhrofiadau personol ac yn gobeithio y bu’r sgwrs yn ddefnyddiol, a dymunaf bob llwyddiant i bawb gyda'u gyrfaoedd yn y dyfodol.”

Pete Doggart yn rhoi ei gyflwyniad

Mae Cangen myfyrwyr yr IEEE yn rhoi cyfleoedd i fyfyrwyr gwrdd â’i gilydd a meithrin cymuned o gyfoedion. Mae'r gangen yn helpu dod â myfyrwyr â chyd-aelodau’r IEEE ynghyd, ac yn ymgysylltu ag aelodau proffesiynol yr IEEE yn lleol.

Dyddiad cyhoeddi: 9 Mawrth 2021