Cyfrifiadureg Bangor yn Ennill Statws GitHub

Mae Prifysgol Bangor wedi dod yn un o ddim ond saith prifysgol yn y DU sydd â chynghorydd GitHub ardystiedig ar y campws, yn yr Ysgol Cyfrifiadureg a Pheirianneg Electronig. 

Mae Dr Cameron Gray, darlithydd Seiberddiogelwch ac Arweinydd y Rhaglen Gyfrifiadureg, wedi cael cydnabyddiaeth swyddogol gan GitHub fel cynghorydd ardystiedig.  Lansiwyd GitHub, sydd bellach yn eiddo i Microsoft, yn 2008 i ddarparu llwyfan i god ffynhonnell a datblygu meddalwedd yn seiliedig ar system fersiwn Git, sydd bellach yn system safonol yn y diwydiant.   Mae eu rhaglen Campus Advisor yn rhoi mynediad am ddim i'r llwyfan i fyfyrwyr ac yn cydnabod ymrwymiad addysgol i adnoddau a phrosesau modern.  “Mae rhaglenni newydd Cyfrifiadureg Bangor yn rhoi pwyslais ar ymarfer diwydiannol er mwyn dysgu'r sgiliau sy'n angenrheidiol i'n myfyrwyr o'r cychwyn cyntaf.” meddai Dr Gray. Ychwanegodd: “Mae'r bartneriaeth hon gyda GitHub yn dangos ein hymrwymiad parhaus i ddysgu cyfrifiadureg, sy'n berthnasol, yn fodern ac o'r radd flaenaf.” 

Mae Git, a llwyfan GitHub, yn rhan o elfen ymarferol y cwricwlwm israddedig  newydd ar y cwrs BSc. Rhaglen Gyfrifiadureg a'r MComp. Rhaglen Gyfrifiadureg Meistr Integredig.  Mae'r ddau gwrs yn cynnig modiwl cysylltiedig â diwydiant “Business and Enterprise Programming” lle mae myfyrwyr yn dysgu am yr arfer gorau ym maes datblygu meddalwedd.  Gall y rhai sy'n dymuno gynyddu eu dealltwriaeth o'r offer a'r arferion hyn trwy ddilyn y modiwl “Software Engineering” pwrpasol yn nhrydedd flwyddyn eu cwrs. 

Mae Cyfrifiadureg Bangor hefyd yn falch o gynnig cwrs BSc Peirianneg Meddalwedd Gymhwysol fel rhan o gynllun Prentisiaeth Gradd Ddigidol Llywodraeth Cymru.  “Mae ein cwrs Peirianneg Meddalwedd Gymhwysol yn gwrs galwedigaethol yn ei hanfod ac yn cynnwys pwyslais mawr ar roi sgiliau cyfrifiadureg ar waith yn y byd go iawn.  Bydd y bartneriaeth newydd hon, a'r manteision y mae'n eu cynnig i'n myfyrwyr, yn cyfoethogi profiad ein Prentisiaid Gradd Ddigidol hefyd." meddai Dr. Dave Perkins, Cyfarwyddwr Addysgu a Dysgu'r ysgol.  

Yn ogystal â'r manteision academaidd, bydd myfyrwyr bellach yn cael mynediad  am ddim i holl nodweddion GitHub yn ogystal â “Student Survival Pack” unigryw sy'n cynnwys mynediad i feddalwedd drwyddedig ychwanegol, prisiau gostyngol ar offer a gwasanaethau, a'r gallu i ddangos eu hymrwymiad i ddatblygu meddalwedd i gyflogwyr mewn modd cyfrifol.  Fel y Campus Advisor, bydd Cameron ar gael i helpu holl fyfyrwyr Bangor  ddefnyddio GitHub yn eu projectau eu hunain hefyd.  “Rwy’n disgwyl y bydd rhai o’r cymdeithasau myfyrwyr, fel y Gymdeithas MakerSpace yn Ysgol Cyfrifiadureg a Pheirianneg Electronig Bangor, yn achub ar y cyfle hwn i'w projectau allgyrsiol hefyd.  Rwy’n awyddus i weld sut y gallwn ehangu eu gorwelion drwy'r offer hwn sydd bellach ar gael iddynt” ychwanegodd. 

Dyddiad cyhoeddi: 18 Medi 2020