Ymchwil yn defnyddio deunydd perthnasol

Mae’n rhaid i unrhyw weithgarwch ymchwil yn y Brifysgol sy’n cynnwys defnyddio deunyddiau perthnasol fel y’u diffinnir dan y Ddeddf, gan gynnwys organau, meinweoedd a chelloedd, ddilyn Amodau Safonol llym, a gweithredu’n unol â’r GovernanceArrangementsfor Research EthicsCommittees (GAfREC) . Mae hyn yn golygu bod yn rhaid i ymchwilwyr sicrhau bod eu defnydd o feinwe dynol wedi'i gymeradwyo'n foesegol trwy bwyllgor moeseg ymchwil y GIG a bod y cydsyniad priodol ar waith. Rhaid i ymchwilwyr sy'n dymuno gwneud ymchwil gan ddefnyddio meinweoedd dynol ymgynghori ag Unigolyn Dynodedig y Brifysgol cyn dechrau ar unrhyw ymchwil er mwyn sicrhau bod y cynigion ymchwil yn mynd gerbron Pwyllgor Rheoli Awdurdod Meinweoedd y Brifysgol ac yn cael eu cyflwyno i Bwyllgor Moeseg Ymchwil y GIG.

Os yw ymchwil a gymeradwywyd gan Bwyllgor Moeseg Ymchwil y GIG yn ymwneud â chaffael deunydd perthnasol yna bydd yn rhaid i chi drefnu trwydded caffael a chytundebau trosglwyddo deunydd. Bydd angen i chi gysylltu â'ch Cyfarwyddwr Project Adrannol cyn gynted a phosibl i drefnu hyn.

Mae'r Awdurdod Meinweoedd Dynol wedi cyhoeddi canllawiau ar ddefnyddio deunyddiau perthnasol ar gyfer ymchwil ar ffurf Cod Ymarfer.

Mae deunydd perthnasol dan y Ddeddf sy’n cael ei storio at ddibenion ymchwil wedi’i eithrio o ofynion trwyddedu Meinweoedd Dynol os yw’r meinwe:

• Yn cael ei gadw at broject ymchwil penodol a gymeradwywyd gan Bwyllgor Moeseg Ymchwil y GIG
• Gan berson a fu farw dros 100 mlynedd yn ôl
• Yn cael ei gadw ar gyfer ei drosglwyddo i rywle arall cyn belled â’i fod yn cael ei gadw am ychydig oriau neu ddyddiau ac yn bendant am ddim mwy nag wythnos a bod hynny gyda chymeradwyaeth gan yr Unigolyn Dynodedig neu gynrychiolydd enwebedig o Bwyllgor Rheoli Awdurdod Meinweoedd Dynol y Brifysgol.
• Yn cael ei gadw tra’i fod yn cael ei brosesu gyda’r bwriad o wneud y meinwe yn anghellog cyn belled â bod y prosesu yn cymryd mater o oriau neu ddyddiau ac yn bendant ddim mwy nag wythnos a bod hynny gyda chymeradwyaeth gan gynrychiolydd o Bwyllgor Rheoli Awdurdod Meinweoedd Dynol y Brifysgol.
• Wedi cael ei greu y tu allan i'r corff dynol ac nad yw'n ymwneud mewn unrhyw ffordd â chymhwyso meinweoedd neu gelloedd i fodau dynol

Os nad oes angen deunyddiau perthnasol ar gyfer ymchwil mwyach bydd angen i chi gysylltu â'ch Cyfarwyddwr Project Adrannol i drefnu cael eu gwared.