Aduniadau a Digwyddiadau Alumni

Ar 18 Tachwedd 2024, dychwelodd Prifysgol Bangor i Deyrnas Bahrain ar gyfer yr aduniad cyn-fyfyrwyr blynyddol. Cynhaliwyd y digwyddiad ar deras pencadlys Sefydliad Bancio a Chyllid Bahrain (BIBF) yn harddwch Bae Bahrain.

Mae 2024 yn nodi 20 mlynedd o’r rhaglen ddilysu rhwng Prifysgol Bangor a BIBF, sy’n gweld myfyrwyr yn dechrau eu hastudiaethau yn y BIBF, ac yn cwblhau eu graddau yma ym Mhrifysgol Bangor. Roedd yr aduniad yn gyfle gwych i ddathlu’r bartneriaeth barhaus sy’n parhau i fynd o nerth i nerth.

Roedd dros 70 o gyn-fyfyrwyr, gwesteion a chydweithwyr BIBF yn bresennol yn y digwyddiad a oedd yn cynnwys diodydd, canapés, a cherddoriaeth, a chawsant eu hannerch gan uwch-aelodau staff o'r BIBF, a’r Athro Andrew Edwards, sef Dirprwy Is-ganghellor Prifysgol Bangor.

Roedd y digwyddiad hefyd yn gyfle i gyflwyno gwobr Alumnus y Flwyddyn Prifysgol Bangor / BIBF 2024 i Duaa AlMasqati (Bancio a Chyllid, 2009), sydd bellach yn Uwch Reolwr Gweithredu Strategol ac Arweinydd Tîm gyda Grŵp Cyfnewidfa Stoc Llundain.

Diolch i bob un o'n cyn-fyfyrwyr a oedd yn bresennol, ac i'n ffrindiau da yn BIBF, am noson wych.

Ar 13 ac 14 Medi 2024, dychwelodd dros 140 o gyn-fyfyrwyr i Fangor i ymuno â dathliadau 140 y Brifysgol. Dechreuodd rhaglen yr aduniad arbennig hwn gyda chwis tafarn yn y bar myfyrwyr ar safle Ffriddoedd, gyda thimau o gyn-fyfyrwyr yn brwydro dros bedair rownd o Wybodaeth Gyffredinol, Hanes y Brifysgol, Enwch y Cyn-fyfyriwr / Cymrawd er Anrhydedd, a Lleoedd ym Mangor. Llongyfarchiadau i ‘SABE all your kisses for me’ ar eu buddugoliaeth!

Dechreuodd dydd Sadwrn gyda’r Is-ganghellor, yr Athro Edmund Burke, yn croesawu’r cyn-fyfyrwyr. Ar ôl hynny, bu’r Athro Mike Larvin yn trafod newyddion cyffrous Ysgol Feddygol Gogledd Cymru, a rhannodd Llywydd Undeb y Myfyrwyr, Nida Ambreen, wybodaeth am weithgareddau presennol yr undeb.

Yna gwahoddwyd cyn-fyfyrwyr i Siambr Cyngor y Brifysgol i fynychu seremoni dadorchuddio'r portread o fotanegwyr Yr Athro David Thoday a Gladys Thoday gan yr artist Meinir Mathias.

Cafodd y cyn-fyfyrwyr wedyn gyfle i gwrdd â staff o Ysgolion ac Adrannau’r Brifysgol, gan archwilio’r cyfleusterau a chlywed am yr ymchwil sy'n cael ei wneud gan staff a myfyrwyr. Ymunodd llawer o gyn-fyfyrwyr hefyd ar ymweliad â Gardd Fotaneg Treborth er mwyn archwilio’r gerddi a’r tai gwydr, wrth ddysgu am y gwaith gwych sy’n cael ei wneud yno.

Yn y prynhawn, cafwyd cyflwyniad hynod ddiddorol ar flynyddoedd ffurfiannol y Brifysgol gan y cyn-fyfyriwr a’r hanesydd lleol, Gari Wyn, lle bu’n sôn am rai o’r chwaraewyr allweddol yn sefydliad a hanes y Brifysgol. Daeth rhaglen y dydd i ben gyda chyflwyniad gan Dr Andy Goodman a’r cyn-fyfyriwr, Kailesh Karavadra, ar ymgysylltiad cyn-fyfyrwyr ym mhroject gwobr Hyfforddiant Arloesedd ac Arweinyddiaeth Prifysgol Bangor (BUILT). Buont yn siarad am lwyddiant a dyfodol y rhaglen a luniwyd i hybu cyflogadwyedd myfyrwyr, a sut mae cyn-fyfyrwyr wedi cefnogi’r cyfle gwych hwn a gynigir i fyfyrwyr Prifysgol Bangor.

Dechreuodd y noson gyda derbyniad diodydd, ac ar ôl hynny, cafodd y cyn-fyfyrwyr fwynhau pryd o fwyd bendigedig yn Neuadd Prichard-Jones neu Ddarllenfa Shankland y llyfrgell. Roedd awyrgylch hyfryd yn y ddau leoliad, gyda chyn-fyfyrwyr yn mwynhau cwmni ei gilydd, p’un a oeddent wedi adnabod ei gilydd fel myfyrwyr neu newydd gyfarfod.

Diolch i bawb a ymunodd â ni ar gyfer yr achlysur arbennig hwn. Roedd y Swyddfa Datblygu a Chysylltiadau Alumni wrth eu bodd yn croesawu pawb yn ôl i'w hen Brifysgol. Mae gan Brifysgol Bangor y cyn-fyfyrwyr gorau!

Cynhaliwyd aduniad i gyn-fyfyrwyr yr Ysgol Gwyddorau Eigion yn y brifysgol ar 24 – 26 Mai 2024. Nodai’r aduniad 30 mlynedd ers sefydlu Cymdeithas Cyn-fyfyrwyr Ysgol Gwyddorau Eigion (SOSA) gan Sinclair Buchan a George Floodgate. 

Dechreuodd y penwythnos gyda noson Prosecco arbennig yn Sw Môr Môn. Cymerwyd y gwesteion ar daith dywys arbennig y tu ôl i’r llenni gan Frankie Hobro, cyn-fyfyriwr a Chyfarwyddwr a Pherchennog Sw Môr Môn, a’i thîm. Yna fe wnaethant fwynhau bwffe a gwydraid neu ddau o Prosecco!

Ar y dydd Sadwrn, roedd cyfle i’r cyn-fyfyrwyr gymryd rhan mewn teithiau o gwmpas Llong Ymchwil y Prince Madog, mynd ar wibdaith i lawr y Fenai mewn Cwch Cyflym (Ribride) a chwrdd ag aelodau staff presennol am luniaeth prynhawn yng Nghanolfan Fôr Cymru.

Cynhaliwyd y prif ginio aduniad yn Neuadd Reichel ym Mangor ar y nos Sadwrn. Yn dilyn diodydd croeso, pan gafodd cyn-fyfyrwyr gyfle i rannu eu lluniau o’u cyfnod yn y brifysgol, clywodd y gwesteion gan Mick Cook, Cadeirydd SOSA, yr Athro Edmund Burke, Is-ganghellor Prifysgol Bangor a’r Athro John Turner, Pennaeth yr Ysgol. Braf oedd croesawu graddedigion o wahanol gyfnodau a chlywed hanesion gan bawb am eu hamser yn yr Ysgol Gwyddorau Eigion a’r hyn maent wedi mynd ymlaen i’w wneud ers graddio.

Bu'r tywydd yn garedig ar y bore Sul pan ddaethpwyd â’r aduniad i ben gyda thaith gerdded ddaearegol i Landdwyn dan arweiniad Dr. Dei Huws a'r Athro Colin Jago.

Diolch i bawb a ymunodd â ni yn yr aduniad. Gobeithiwn eich croesawu yn ôl unwaith eto’n fuan iawn!
 

Fel rhan o ddathliadau 140 mlwyddiant y Brifysgol, cynhaliodd yr Ysgol Iaith, Diwylliant a’r Celfyddydau cyngerdd gan Gerddorfa Symffoni a Chorws Prifysgol Bangor (arweinydd - Joe Cooper) a oedd yn cynnwys y perfformiad cyntaf o waith gan Dr Guto Pryderi Puw (Darllenydd mewn Cyfansoddi ym Mangor), Concerto Telyn William Mathias (cyn Athro Cerddoriaeth ym Mangor), a 9fed Symffoni Beethoven.

Mae Cerddorfa Symffoni a Chorws Prifysgol Bangor yn cynnwys staff a myfyrwyr hen a newydd o'r Brifysgol, yn ogystal ag aelodau o'r gymuned. Roedd y cyngerdd yn dathlu’r rhan hanfodol y mae cerddoriaeth a’r celfyddydau wedi’i chwarae, ac yn parhau i’w chwarae, ym mywyd diwylliannol y Brifysgol ac yn y rhanbarth ehangach.

Roedd y Swyddfa Datblygu a Chysylltiadau Alumni yn falch iawn o groesawu cyn-fyfyrwyr a gwesteion i dderbyniad diodydd arbennig yn Siambr y Cyngor lle cawsant eu cyfarch gan yr Is-ganghellor, yr Athro Edmund Burke, cyn y cyngerdd.

Datblygwyd rhaglen BUILT gan staff a chyn-fyfyrwyr Prifysgol Bangor, ac mae’n dod â myfyrwyr ynghyd i ffurfio timau trawsddisgyblaethol i weithio ar greu datrysiad i her cynaliadwyedd a bwyd. Cychwynnwyd y rhaglen gan y cyn-fyfyriwr Kailesh Karavadra ac fe'i harweiniwyd gan Dr Andy Goodman. Gwelodd rownd derfynol y rhaglen eleni 34 o fyfyrwyr israddedig ac ôl-radd yn cyflwyno eu cynigion. Cafodd pob un o’r timau hyn eu mentora gan gyn-fyfyriwr o’r Brifysgol a’u helpodd i ddatblygu eu syniadau ac sydd wedi bod wrth law i’w cynghori a’u harwain. Roedd alumni hefyd yn rhan o'r panel beirniadu ac roedd eraill yn arwain 'deep-dives' i helpu'r myfyrwyr hefo eu prosiectau.

Daeth y rhaglen BUILT i ben ar 2 Mai gyda phob tîm o fyfyrwyr yn cyflwyno eu syniadau i banel o feirniaid annibynnol. Yna arddangosodd y timau bosteri i egluro eu gwaith, a chafodd y pump beirniad gyfle i ofyn cwestiynau cyn dewis eu henillwyr. Enillwyr 2024 oedd 'Tîm Tatws' gyda'u cynnyrch 'Grad Chef', ap sy'n cyfeirio myfyrwyr at gynnyrch a busnesau lleol, gyda nodwedd ryseitiau a fydd yn atal gwastraff bwyd. Derbyniodd y tîm y brif wobr o £10,000 i ddatblygu eu busnes ymhellach. Gwnaethpwyd “Gwobr Mabel Evans am Arloesedd” o £10,000 yn bosibl oherwydd rhodd garedig gan y cyn-fyfyriwr Jonathan Wright (1999, Polisi Cymdeithasol/Troseddeg a Chyfiawnder Troseddol) er cof am ei hen nain, a fu hefyd yn astudio ym Mangor. Dyfarnwyd £5,000 i'r ail orau o Gronfa Bangor, a weinyddir gan y Swyddfa Datblygu a Chysylltiadau Cyn-fyfyrwyr, o roddion gan gyn-fyfyrwyr. 

Noddwyd rownd derfynol BUILT gan Succession Wealth a WeSpeak,

Llongyfarchiadau i bawb a gymerodd ran!

Gweler mwy o luniau o'r rownd derfynol yma.

Dychwelodd Yr Athro Andrew Edwards, Dirprwy Is-ganghellor, Emma Marshall, Pennaeth Datblygu a Chysylltiadau Alumni a Dr Lindsay Jones o'r Swyddfa Addysg Rhyngwladol i Deyrnas Bahrain ar 28 Tachwedd 2023 i gynnal yr Aduniad Blynyddol i Gyn-fyfyrwyr Prifysgol Bangor ym mhencadlys yr Institute of Banking and Finance (BIBF) ym Mae Bahrain.

Gan ddathlu’r bartneriaeth barhaus rhwng Prifysgol Bangor a BIBF a llwyddiant parhaus y rhaglen a ddilyswyd gan Fangor yn Bahrain, daeth 70 o gyn-fyfyrwyr i’r digwyddiad lle cafwyd anerchiad gan yr Athro Andrew Edwards. Cafodd diodydd a chanapes eu gweini wrth i gyn-fyfyrwyr ddal i fyny gyda’u cyn gyd-ddisgyblion ar deras hardd BIBF a chymryd rhan mewn rhai gweithgareddau hwyliog! Yn ystod y digwyddiad hefyd cyflwynwyd gwobr Alumnus y Flwyddyn Prifysgol Bangor / BIBF 2023 i Hasan Sater (Bancio a Chyllid, 2012), Cyfarwyddwr y Gyfarwyddiaeth Ariannu Gweithrediadau yn y Weinyddiaeth Gyllid ac Economi Genedlaethol.

Cynhaliwyd digwyddiad llawn gyda 180 o gyn-fyfyrwyr, cymrodyr er anrhydedd, cyfeillion y brifysgol a gwesteion yn Ystafell Cholmondeley a theras Tŷ’r Arglwyddi yn Llundain ddydd Mawrth, 12 Medi 2023.

Croesawyd y gwesteion gan yr Arglwydd Dafydd Wigley a chafwyd anerchiadau gan yr Is-ganghellor, yr Athro Edmund Burke, a Chadeirydd Cyngor Prifysgol Bangor, Marian Wyn Jones. Cawsant hefyd y pleser o wrando ar berfformiad gan dri myfyriwr o’r Adran Gerddoriaeth a chlywed gan gyn-fyfyriwr Bangor, Harry Riley (Meistr Bioleg, 2019), Pennaeth Cynllunio a Llywodraethu Niwed Ar-lein yn Adran Gwyddoniaeth, Arloesi a Thechnoleg Llywodraeth y Deyrnas Unedig. Roedd digon o gyfle hefyd i westeion gwrdd â’i gilydd a rhwydweithio dros ddiodydd a chanapés ar y teras!

Unwaith yn rhagor, cynhaliodd y Swyddfa Datblygu a Chysylltiadau Alumni aduniad blynyddol i gyn-fyfyrwyr ym mis Awst fel rhan o weithgareddau Prifysgol Bangor yn yr Eisteddfod Genedlaethol ym Moduan.

Daeth tua 200 o gyn-fyfyrwyr a chyn-staff i ymuno â ni ar y stondin, lle cawsant eu croesawu gan yr Athro Andrew Edwards a soniodd am rai o’r datblygiadau sy’n digwydd yn y Brifysgol. Clywsant wedyn am lwyddiannau Undeb y Myfyrwyr gan Lywydd UMCB, Celt John, a aeth yn ei flaen i godi canu!

Dywedodd Emma Marshall, Pennaeth Datblygu a Chysylltiadau Cyn-fyfyrwyr, “Pleser o’r mwyaf oedd cael cynnal yr aduniad blynyddol yn yr Eisteddfod Genedlaethol eto eleni. Mae hwn yn uchafbwynt yng nghalendr y Swyddfa Datblygu a Chysylltiadau Cyn-fyfyrwyr ac roedd yn hyfryd gweld wynebau cyfarwydd a chael cwrdd â chyn-fyfyrwyr newydd.”

Roedd Prifysgol Bangor yn falch o allu dychwelyd i Deyrnas Bahrain ar 8 Tachwedd 2022 a chynnal ein seithfed Aduniad Cyn-fyfyrwyr Prifysgol Bangor ym mhencadlys yr Institute of Banking and Finance (BIBF) ym Mae Bahrain.

Bu dros 90 o gyn-fyfyrwyr yn hel atgofion gyda’i gilydd a chlywed am datblygiadau ym Mangor dros ddiodydd a chanapes. Dan arweiniad yr Athro Andrew Edwards, Dirprwy Is-ganghellor Prifysgol Bangor a Deon Coleg y Celfyddydau, Dyniaethau a Busnes, bu Ei Ardderchogrwydd Rasheed Al Maraj, Llywodraethwr Central Bank of Bahrain a'r Athro Bruce Vanstone, Pennaeth  Ysgol Busnes Bangor yn annerch y gwesteion.

Hefyd yn ystod y noson, cyhoeddwyd mai Zahra Al Shamma (Bancio a Chyllid, 2013) oedd enillydd gwobr Alumnus y Flwyddyn Prifysgol Bangor / BIBF 2022. 

Roeddem yn falch o gael y cyfle i gwrdd â chyn-fyfyrwyr yn Pontio cyn perfformiad y Gerddorfa Ffilharmonig Frenhinol Lerpwl ar 2 Mehefin. Gwnaeth 40 o gyn-fyfyrwyr a'u gwesteion gwrdd â'r Is-ganghellor yr Athro Edmund Burke, Cadeirydd Cyngor y Brifysgol Marian Wyn Jones a'r tîm Datblygu a Chysylltiadau Alumni dros ddiodydd a chanapés cyn mynd i’r cyngerdd. Roedd pob tocyn i’r cyngerdd wedi ei werthu.

Mae gan Gerddorfa Ffilharmonig Frenhinol Lerpwl a Phrifysgol Bangor berthynas sy’n mynd yn ôl flynyddoedd lawer gyda nifer o fyfyrwyr yn derbyn gwersi offerynnol gan y Gerddorfa ac yn cymryd rhan mewn projectau partneriaeth trosglwyddo gwybodaeth a roddodd gyfle i fyfyrwyr ymchwil weithio gyda’r Gerddorfa yn Lerpwl. 

Diolch i bob un ohonoch a ymunodd â ni!

ADUNIAD 1960au/70au

Daeth grŵp o dros 40 o gyn-fyfyrwyr o'r 1960au a'r 1970au i Fangor ar 2-3 Medi i aduniad a drefnwyd gan y cyn-fyfyrwyr Roger Thwaites (Sŵoleg, 1971) a Foster Edwards (Amaethyddiaeth, 1971).

Dechreuodd yr aduniad gyda gêm o dennis bwrdd i fedyddio'r byrddau tennis bwrdd parhaol newydd a osodwyd yn ddiweddar y tu allan i Bar Uno ar safle Ffriddoedd. Llwyddodd y brifysgol i’w prynu ar ôl i'r grŵp yma ddod at ei gilydd i godi £5,000 i gofio eu cyfnod ym Mangor.

Cyfarfu'r grŵp fore Sadwrn i glywed sgyrsiau gan Lewis Thompson, Is-lywydd Chwaraeon Undeb y Myfyrwyr, a Dr Andy Cooke, Cyfarwyddwr Sefydliad Seicoleg Perfformiad Elît Prifysgol Bangor, ac fe ddaeth yr aduniad i ben gyda bwffe a diodydd yn Bar Uno.

Cyn yr aduniad, cododd y criw £5,000 i brynu dau fwrdd bwrdd tennis sydd wedi'u gosod y tu allan i Bar Uno ar safle Ffriddoedd y Brifysgol. Cafodd yr aduniad ei ddechrau gyda gem i fedyddio'r byrddau. Gweler y fideo yma!

Dyma rai o'r uchafbwyntiau'r penwythnos:

• Daeth aelod hyn o'r tim rygbi i Fangor yn gynnar ddydd Gwener er mwyn cael mynd i gerdded yn y mynyddoedd. Wrth ddringo Tryfan, yn anffodus, fe syrthiodd. Cafodd gymorth a chafodd ei gludo mewn hofrennydd i Ysbyty Gwynedd lle rhoddwyd wyth pwyth yn ei goes. Yn arwrol ddigon, llwyddoedd i ailymuno a gweddill y penwythnos (ac mae'n holliach erbyn hyn)!
• Dangosodd Roger ac Ann Doig ymroddiad gwirioneddol a theithio i fyny i Fangor ddim ond ar gyfer y nos Wener gan fod ganddynt barti teuluol ar y dydd Sadwrn - am ymroddiad!
• Bu'r criw yn mwynhau bwyd ardderchog yn Bar Uno ar y nos Sadwrn. Diolch arbennig i'r staff gwych a fu'n barod iawn eu cymwynas. Fe wnaethon nhw hyd yn oed ymuno yn y canu!
• Nodwyd munud o dawelwch er cof am ffrinding ymadawedig.
• Diddanodd Brian Charnley y grwp gyda'i gerddi a'i ysgrifau am chwaraeon, fel y gwnaeth Stan Moore gyda'i gitar a Twm Jones a ganodd 'Myfanwy'.
• Rhannodd John Northridge stori am Albert Ross (ar fenthyg yn barhaol gan Brifysgol Abertawe) a sut y cafodd ei ethol i'r pwyllgor myfyrwyr a'i ymddiswyddiad ohono mae o law
• Daeth Celia Wolfe a llond bocs o atgofion am y tim hoci merched, gan gynnwys rhestrau gemau.
• Jane Smith a Jill Nicholson fu'n codi canu wrth i ni ganu rhai o hen ganeuon bar yr undeb ar nos Sadwrn; doedd neb wedi anghofio'r geiriau!

Darllenwch adroddiad gan John Young (Ieithoedd Modern, 1970)

Darllenwch adroddiad Brian Charnley (Saesneg a Drama, 1970)

Os oes gennych ddiddordeb mewn trefnu aduniad i'ch carfan chi, cysylltwch â Bethan Perkins, Swyddog Cysylltiadau Cyn-Fyfyrwyr ar b.w.perkins@bangor.ac.uk