Astudio Drwy Gyfrwng y Gymraeg

Myfyriwr yn eistedd yn gweithio ar liniadur yn Pontion yn gwisgo crys-t pêl droed Cymru

Os mai astudio trwy gyfrwng y Gymraeg yw eich bwriad a byw mewn cymuned wirioneddol ddwyieithog, Prifysgol Bangor yw’r lle i chi.

Mae Prifysgol Bangor yn cynnig mwy o fodiwlau a chyrsiau cyfrwng Cymraeg nag unrhyw brifysgol arall.
Wrth astudio drwy'r Gymraeg, gallwch gael gwell cysylltiad â’ch darlithwyr a’ch cydfyfyrwyr gan bod maint y dosbarthiadau yn tueddu i fod yn llai ac o ganlyniad yn caniatáu ichi gael mwy o gyfleoedd i gyfrannu.
Mae modiwlau dwyieithog neu gyfrwng Cymraeg ar gael ym mhob Ysgol academaidd.

Mae gan y Coleg Cymraeg Cenedlaethol declyn canfod cyrsiau sy’n nodi faint o’ch cwrs sydd ar gael yn Gymraeg.

PAM ASTUDIO DRWY'R GYMRAEG?

Mae angen pobl ddwyieithog mewn pob math o swyddi yng Nghymru.
Mae gofyn mawr am bobl ifanc broffesiynol sy’n gallu gweithio’n ddwyieithog yng Nghymru.
Bydd astudio trwy’r Gymraeg yn y brifysgol yn rhoi sylfaen ardderchog i’ch gyrfa.

ARIAN YN EICH POCED

Oeddech chi’n gwybod bod cefnogaeth ariannol ar gael i astudio trwy gyfrwng y Gymraeg? Wrth gofrestru i ddilyn modiwlau cyfrwng Cymraeg, efallai y byddwch yn gymwys i dderbyn y canlynol:

£1000

Prif Ysgoloriaeth y Coleg Cymraeg Cenedlaethol - £1,000 y flwyddyn am hyd at dair blynedd pan fyddwch yn astudio 80 credyd y flwyddyn drwy gyfrwng y Gymraeg.

£500

Ysgoloriaeth Cymhelliant y Coleg Cymraeg Cenedlaethol - £500 y flwyddyn am hyd at dair blynedd os ydych yn astudio 40 credyd y flwyddyn drwy gyfrwng y Gymraeg.

£250

Bwrsariaeth Cymraeg- £250 y flwyddyn os ydych yn astudio 40 credyd y flwyddyn trwy gyfrwng y Gymraeg. Mae modd derbyn y fwrsariaeth hon yn ychwanegol at ysgoloriaethau’r CCC.

GWASANAETHAU MYFYRWYR

Mae llawer mwy i fywyd prifysgol na darlithoedd a chymdeithasu, wrth gwrs. I’ch cefnogi yn ystod eich amser yma, mae holl ystod gwasanaethau myfyrwyr y Brifysgol – o gyngor ar gyllid i gymorth cwnsela – ar gael drwy’r Gymraeg.

DARGANFOD MWY

UNDEB BANGOR

Os hoffech gymdeithasu neu hamddena gyda siaradwyr Cymraeg eraill, rydych chi yn y lle iawn. Undeb Bangor yw Undeb Myfyrwyr Prifysgol Bangor. Mae Undeb Myfyrwyr Cymru Bangor (UMCB) yn rhan o Undeb Bangor.

Mae gan UMCB lywydd sy’n gweithio i gefnogi myfyrwyr Cymraeg eu hiaith a hybu’r iaith a’r diwylliant Cymraeg ym Mhrifysgol Bangor.

Mae’r Cymric yn trefnu digwyddiadau cymdeithasol drwy gydol y flwyddyn. Hefyd, mae gennym gorau Cymraeg, cymdeithas lenyddol, clybiau chwaraeon a gorsaf radio myfyrwyr, ac os hoffech sefydlu clwb cyfrwng Cymraeg newydd, mae cefnogaeth ar gael i wneud hynny.

Myfyrwraig Holly Shone mewn ystafell wely yn llety'r Santes Fair

LLETY PENODOL I SIARADWYR CYMRAEG

Beth am wneud Neuadd John Morris-Jones (JMJ) yn gartref oddi cartref? Mae JMJ ar gyfer siaradwyr Cymraeg a dysgwyr, ac ynddi mae ystafelloedd en-suite a gofodau cymunedol – rhowch y tegell ymlaen i gael paned a sgwrs mewn awyrgylch Gymraeg naturiol.

CEFNOGAETH SGILIAU CYMRAEG CANOLFAN BEDWYR

Os mai dysgwr Cymraeg ydych chi neu os hoffech chi wella’ch Cymraeg llafar neu ysgrifenedig, does unman gwell i ymarfer. Manteisiwch ar y gefnogaeth arbenigol sydd ar gael i fyfyrwyr Cymraeg gan staff Canolfan Bedwyr, sef Canolfan Gwasanaethau, Technoleg ac Ymchwil Cymraeg y Brifysgol.

Gallwch ddatblygu eich sgiliau ysgrifennu academaidd a sgiliau cyflwyno a chewch gefnogaeth i sefyll arholiad Tystysgrif Sgiliau Iaith y Coleg Cymraeg Cenedlaethol. Bydd gwella eich sgiliau iaith yn eich helpu gyda’ch astudiaethau academaidd ac wrth i chi ddilyn eich gyrfa.

Cefnogaeth Sgiliau Cymraeg Coleg Cymraeg Cenedlaethol

Nod y Coleg Cymraeg Cenedlaethol yw adeiladu system addysg a hyfforddiant Cymraeg a dwyieithog sy’n agored i bawb ac i ddatblygu gweithlu dwyieithog i Gymru.

Mae ‘cangen’ o’r Coleg ym mhob prifysgol yng Nghymru, ac mae cangen Bangor wedi ei lleoli yng Nghanolfan Bedwyr.

Fideo: Cyfleoedd i ddefnyddio’r Gymraeg

Cyfleoedd i ddefnyddio’r Gymraeg

Fel siaradwyr Cymraeg, mae cefnogaeth a chyfleoedd i dderbyn cymorth drwy gyfrwng y Gymraeg ar gael ar eich cyfer drwy'r Uned Gwasanaethau Myfyrwyr ac Undeb y Myfyrwyr yn ogystal ag o fewn eich Ysgol Academaidd. Pe byddech yn dymuno astudio drwy gyfrwng y Gymraeg, mae llu o gefnogaeth ar gael ar eich cyfer i wneud hynny fel sydd wedi ei amlinellu yn y fideo.

Trawsgrifiad Fideo Cyfleoedd i ddefnyddio’r Gymraeg

[0:00] Croeso i Brifysgol Bangor!

[0:02] Mae yna lwyth o gyfleoedd a chefnogaeth ar gael i chi ddefnyddio'r Gymraeg tra 'da chi yn y brifysgol,

[0:07] felly dyma flas i chi ohonyn nhw.

[0:10] Yn gyntaf,

[0:11] mae yna gyfle i chi astudio rhan fawr neu fach o'ch cwrs drwy gyfrwng y Gymraeg.

[0:16] Gewch chi ddewis faint o'ch cwrs 'da chi isio ei astudio drwy gyfrwng y Gymraeg,

[0:20] ac yma mha iaith 'da chi'n cyflwyno eich gwaith.

[0:23] Mae 9 o bob 10 o'r siaradwyr Cymraeg sy'n fyfyrwyr yma,

[0:26] yn astudio rhwyfaint o'u cwrs drwy gyfrwng yr iaith.

[0:29] Felly mae'n rhywbeth hollol naturiol i wneud.

[0:32] Fel siaradwyr Cymraeg,

[0:34] gewch chi sgwrs a chyngor yn y Gymraeg ar unrhyw beth gan eich tiwtor personol,

[0:37] neu o wasanaethau myfyrwyr y brifysgol.

[0:41] Mae yna gymorth ar gael hefyd i'ch helpu chi astudio drwy gyfrwng y Gymraeg, drwy Ganolfan Bedwyr,

[0:46] sy'n creu modiwlau ac adnoddau sgiliau iaith fel Cysill ar ap Geiriaduron.

[0:52] Os byddwch chi'n astudio rhywfaint drwy'r Gymraeg,

[0:54] gallwch chi dderbyn cefnogaeth ariannol drwy Ysgoloriaeth Cymhelliant y Coleg Cymraeg Cenedlaethol,

[1:00] a'r bwrsariaeth astudio drwy gyfrwng y Gymraeg y brifysgol.

[1:04] Yn olaf,

[1:05] mae yna lwyth o gyfleoedd i gymdeithasu yn y Gymraeg

[1:07] drwy gymdeithasau a thimau chwaraeon Undeb Myfyrwyr Cymraeg Bangor.

[1:12] Gwnewch yn fawr o'r cyfnod ym Mangor felly,

[1:15] a mwynhewch y profiad

Thumbnail Fideo Hawliau Myfyrwyr Cymraeg

Fideo: Hawliau Siaradwyr Cymraeg

Hawliau siaradwyr Cymraeg

Wyddech chi fod gan fyfyrwyr sy’n siarad Cymraeg hawliau i ddefnyddio'r iaith yn y brifysgol? Gwyliwch y fideo i gael dysgu mwy.

Am fwy o wybodaeth am astudio yn y Gymraeg, ewch i'r tudalennau Astudio.