Beth ydy ARFer?
Mae newid arferion iaith yn anodd, ond gam wrth gam gall ARFer gynyddu eich defnydd o’r Gymraeg yn y gweithle. Wedi’i selio ar y gwyddorau ymddygiad, mae ARFer yn cynnig cyfres o dasgau syml i chi eu cyflawni gyda’ch cydweithwyr yn Gymraeg. Mae’r tasgau’n amrywio o ran lefel ymdrech, gyda rhai ddim ond yn cymryd ychydig o funudau i’w cwblhau.
Wedi ein hysbrydoli gan broject Aldahitz, cwmni Soziolinguistika Klusterra yng Ngwlad y Basg, rydyn ni wedi cymhwyso dwy egwyddor i ARFer sydd yn deillio o’r gwyddorau ymddygiad.
- Ymrwymo i ymddwyn mewn ffordd benodol;
- Manteisio ar y dylanwad sylweddol mae rhagosodiadau yn gallu ei gael ar ymddygiad pobl.
Effaith ARFer hyd yma
Ers 2019, rydyn ni wedi bod yn mesur defnydd iaith mewn gweithleoedd ledled Cymru. O roi ARFer ar waith, fe welon fod y defnydd o’r Gymraeg fwy neu lai wedi dyblu ymhlith y timau sydd wedi cymryd rhan.
Ap ARFer
Y cam nesaf yw trosi ARFer i weithio ar ffurf ap er mwyn sicrhau mynediad hwylus at fframwaith sydd wedi profi i fod yn hynod effeithiol, a hynny ar flaenau eich bysedd. Bydd yr ap arloesol a chynhwysol hwn, sydd wedi’i wreiddio ar sail tystiolaeth, yn cynnwys elfennau gêmeiddio ac yn galluogi defnyddwyr i bersonoli eu taith ARFer. Byddwn yn cynnal cyfnod treialu ap ARFer rhwng mis Hydref a mis Rhagfyr, 2024, cyn lansio’n swyddogol yn 2025.
Am ragor o wybodaeth:
Os oes gennych unrhyw ymholiadau ynglŷn ag ARFer, e-bostiwch arfer@bangor.ac.uk
- Dr Lowri Angharad Hughes (Cyfarwyddwr ARFer)
- Dr Arwel Tomos Williams (Ymchwilydd ARFer)
- Dr Shân Pritchard (Swyddog Hyrwyddo a Hwyluso ARFer)
Cymerwch gam at weithle dwyieithog heddiw!