Cyflwyniad i Ddadansoddi Niwroddelweddu - Mynediad yn

Bwriad y rhaglen yw rhoi'r wybodaeth gefndirol a'r sgiliau technegol i chi er mwyn eich galluogi i gynllunio, dadansoddi a gwerthuso ymchwil ym maes delweddu. Mae'r rhaglen yn canolbwyntio ar dechnegau yn seiliedig ar ddelweddu cyseiniant magnetig (MRI), gan gynnwys MRI swyddogaethol, delweddu anatomegol, delweddu tensor trylediad, a sbectrosgopeg. Trafodir technegau delweddu gan gyfeirio at gymwysiadau biofeddygol perthnasol. Mae'r MSc yn cynnwys pedwar modiwl ar niwroddelweddu. Mae dau ohonynt yn canolbwyntio ar agweddau methodolegol. Mae'r ddau arall yn rhoi cyflwyniad manwl i dechnegau delweddu arbenigol a ddefnyddir i ddeall bioleg gweithrediad yr ymennydd ar adegau o iechyd a chlefyd.

Rhoddir pwyslais cryf ar ddatblygu eich sgiliau ymarferol, gan eich paratoi at waith pellach ym maes niwroddelweddu. Mewn labordy cyfrifiadurol pwrpasol, byddwch yn dysgu ac yn ymarfer technegau dadansoddi a delweddu. O dan oruchwyliaeth staff academaidd rhagorol, byddwch yn ymwneud â chynllunio astudiaeth ddelweddu, i'w chynnal gan ddefnyddio'r sganiwr MRI 3T mewnol.

I bwy mae’r cwrs hwn yn addas?

Mae'r cwrs byr hwn wedi'i gynllunio i bawb sydd â diddordeb yn agweddau ymarferol dadansoddi data niwroddelweddu gydag MRI. Mae'n berthnasol iawn i ymchwilwyr, gweithwyr proffesiynol gofal iechyd, seicolegwyr, ffisegwyr, peirianwyr, gwyddonwyr cyfrifiadurol, a phawb sy'n awyddus i ennill profiad ymarferol o dechnegau niwroddelweddu. P'un a ydych am ddatblygu sgiliau dadansoddi data ymarferol neu ddyfnhau eich dealltwriaeth o sut mae niwrowyddonwyr gwybyddol a meddygon yn astudio gweithrediad yr ymennydd, mae'r cwrs yn darparu profiad dysgu diddorol a chymhwysol.

Pam astudio’r cwrs?

Mae'r cwrs byr yn canolbwyntio ar addysgu myfyrwyr yn y camau ymarferol sy’n ymwneud â dadansoddi astudiaethau niwroddelweddu gydag MRI. Bydd y dysgwyr yn datblygu sgiliau allweddol ar gyfer gweithio gyda data niwroddelweddu, gan gynnwys prosesu a dadansoddi data ac astudio’r dylunio a’r gweithredu.
Bydd y cwrs yn ymdrin â’r materion isod:

• Fformatau data niwroddelweddu ac arferion gorau rheoli data.
• Y Model Llinol Cyffredinol (GLM) a'i rôl mewn dadansoddi niwroddelweddu.
• Cynllunio astudiaethau fMRI effeithiol gan ddefnyddio gwybodaeth am y GLM.
• Rhagbrosesu a dadansoddi data MRI a fMRI gyda meddalwedd fel pecynnau MATLAB, FSL, SPM, MRS, a DTI.
• Adrodd a dehongli canlyniadau niwroddelweddu i lywio ymchwil ac ymarfer.

Modiwl yn y labordy ydyw, ac mae'r cwrs yn cynnig profiad ymarferol o ddadansoddi data, delweddu, a rhaglennu, i arfogi’r dysgwyr â'r sgiliau sydd eu hangen i weithio gyda data niwroddelweddu yng nghyd-destun ymchwil neu glinigol.

Pa mor hir mae'n ei gymryd i gwblhau'r cwrs? 

Caiff y cwrs rhan amser ei gynnal dros 12 wythnos yn ystod Semester 1 y flwyddyn academaidd.

Yn y flwyddyn academaidd 2025/26, bydd Semester 1 yn rhedeg o 29 Medi tan 22 Rhagfyr 2025.
 

Gwybodaeth am asesiadau 

Caiff yr asesiadau eu cynllunio i annog datblygiad sgiliau parhaus a chymhwyso gwybodaeth. Maent yn cynnwys:

• Aseiniadau gwaith cwrs ymarferol wythnosol - 50% o'r marc cyffredinol. Mae'r rheini’n cynnal y dysgu o wythnos i wythnos, gan sicrhau dilyniant cyson o ran sgiliau.
• Project dadansoddi terfynol - 30% o'r marc gyffredinol. Bydd y myfyrwyr yn prosesu ac yn dadansoddi tair set ddata niwroddelweddu, gan gymhwyso'r technegau a ddysgwyd ar y cwrs.

Tiwtor

yr athro Paul Mullins

Athro Delweddu Niwrolegol ac Uwch Ffisegydd yn Ganolfan Ddelweddu Bangor yn yr Ysgol Seicoleg a Gwyddorau Chwaraeon.

Mae fy ymchwil yn cwmpasu tri maes eang: defnyddio delweddu cyseiniant magnetig a sbectrosgopeg i ymchwilio i brosesau niwrolegol a ffisiolegol sylfaenol mewn iechyd a chlefyd; defnyddio'r technegau hyn i fesur newidiadau sy'n gysylltiedig â throsglwyddo niwrodrosglwyddyddion a gweithgaredd niwral mewn iechyd a chlefyd; ac ymchwilio i effeithiau heriau ffisiolegol (e.e. hypocsia, clwyf pen, ymarfer corff) ar yr ymennydd.

Rwyf hefyd yn rhyngweithio â chydweithwyr o'r Coleg Meddygaeth a Gwyddorau Iechyd ar ddylunio astudiaethau MRI, caffael data a phrosesu a'r adnoddau sydd ar gael i helpu gyda'u cwestiynau ymchwil, fy nod yw cadw Uned Ddelweddu Bangor yn ganolfan o'r radd flaenaf ar gyfer ymchwil delweddu niwrolegol yng Ngogledd Cymru

Beth fyddwch chi’n ei astudio ar y cwrs yma?

Bydd pawb yn cael profiad ymarferol o ddadansoddi data niwroddelweddu, gan gwmpasu:

• Deall fformatau data niwroddelweddu modern ac arferion gorau rheoli data.
• Defnyddio’r Model Llinol Cyffredinol (GLM) a'i rôl mewn dadansoddi niwroddelweddu.
• Cynllunio astudiaethau fMRI effeithiol yn seiliedig ar ddealltwriaeth gadarn o'r GLM.
• Rhagbrosesu a dadansoddi data MRI a fMRI gan ddefnyddio meddalwedd safonol y diwydiant.
• Adrodd a dehongli canlyniadau astudiaethau fMRI yn hyderus.

Mae'r cwrs yn cynnig sylfaen gref mewn dadansoddi niwroddelweddu, paratoi dysgwyr i ddylunio, cynnal, a dehongli eu hastudiaethau niwroddelweddu eu hunain

I fod yn gymwys ar gyfer y cwrs, bydd angen yr isod ar ymgeiswyr:

• Gradd israddedig (2:1 neu uwch).

Fel arall, gallwn ystyried ymgeiswyr gydag o leiaf tair blynedd o brofiad gwaith perthnasol a thystiolaeth o astudiaeth ddiweddar neu ddatblygiad proffesiynol (sy'n dangos parodrwydd i astudio ar Lefel 6/7).

Os nad ydych yn bodloni’r gofynion academaidd safonol, cysylltwch ag arweinydd y cwrs i drafod eich cymhwystra.

Sut i wneud cais

Gwnewch yn siŵr eich bod yn darllen ac yn dilyn y canllaw cais cam wrth gam gan y bydd hyn yn nodi pa adrannau o'r ffurflen gais sy'n orfodol ar gyfer y math o gwrs rydych am wneud cais amdano ac arbed amser i chi.

Paratowch y wybodaeth ganlynol (mewn dogfen Word):

• Manylion cyflogaeth cyfredol;
• Blynyddoedd o brofiad, a hanes cyflogaeth (lle bo hynny'n berthnasol)
• Enw'r aelod staff a'r sefydliad sydd wedi cymeradwyo eich cyllid ar gyfer y modiwl hwn.

Bydd hyn yn cyflymu'r broses o lenwi'r ffurflen gais.