Deall Personoliaeth (JXH-4102) - Mynediad yn

Mae hwn yn gwrs byr hyblyg ar lefel ôl-raddedig sy'n cael ei gyflwyno ar-lein.

A ydych eisiau deall beth sy’n ysgogi pobl a deall mwy amdanoch chi’ch hun ar yr un pryd? Os felly, byddwch wrth eich bodd â'r modiwl hwn! Nod y modiwl hwn yw deall y cyflwr dynol; pwy ydym ni, ein cymhelliant a sut rydym yn rhyngweithio â phobl eraill. Byddwn yn cynnig tasgau y mae seicolegwyr yn eu defnyddio ar draws pob maes perfformiad, megis chwaraeon, meddygaeth a busnes. 

Ar gyfer pwy mae'r Cwrs Byr hwn yn addas?

Mae'r modiwl dysgu o bell ar-lein hwn ar Ddeall Personoliaeth yn addas ar gyfer unrhyw un sydd â diddordeb mewn deall unigolion, yn enwedig mewn perthynas â pherfformiad elît.

Mae ein dysgwyr wedi cynnwys pobl o bob rhan o’r DU, ac o bob rhan o’r byd. Mae'r cwrs byr yma'n rhan o'r rhaglen MSc Seicoleg Perfformio (dysgu o bell) ac mae cyn-fyfyrwyr yn cynnwys:

• Hyfforddwyr chwaraeon proffesiynol: Rygbi, Criced, Pêl-droed Gaeleg, a Hyfforddwyr Rhedeg Dygnwch
• Aelodau ‘UK Coaching’
• Athletwyr Elitaidd mewn: pêl-droed, pêl-droed Gaeleg, criced, rygbi a golff
• Cyfarwyddwyr Perfformiad ar gyfer Timau Undeb Rygbi Proffesiynol
• Perfformwyr Opera
• Cerddorion Proffesiynol
• Arweinwyr Busnes
• Uwch reolwyr o sefydliadau fel MasterCard a Facebook
• Criw Cefn Hofrennydd yr RAF
• Rheolwyr traffig awyr
• Swyddogion Heddlu
• Meddygon Teulu ac Anesthetyddion
• Rheolwyr GIG

Pam astudio’r cwrs?

Prif amcan y cwrs hwn yw darparu dealltwriaeth ddamcaniaethol ac empirig gref o ddatblygiad personoliaeth, a sut y gallai personoliaeth o'r fath effeithio ar berfformiad mewn amgylcheddau elît.

Pa mor hir mae'r cwrs yn cymryd i'w gwblhau?

Mae'r cwrs byr hwn yn cymryd 12 wythnos i'w gwblhau. Byddwch yn cael mynediad at holl ddeunyddiau’r darlithoedd ar ddechrau'r cwrs a fydd yn eich galluogi i fynd mor gyflym neu mor araf ag y dymunwch yn ôl eich amgylchiadau personol.

Y Gofynion Technegol

Cwrs ar-lein yw hwn a gyflwynir trwy Blackboard Ultra. Bydd angencysylltiad sefydlog â’r rhyngrwyd, adnoddau Technoleg Gwybodaeth a chyfrifiadur a meddalwedd cyfoes, meicroffon a chlustffonau neu seinyddion ar y myfyrwyr.

Asesiad

Mae dwy elfen i’r asesiad:

1. holiadur byr
2. disgrifiad o'r llenyddiaeth ymchwil mewn perthynas â lluniad personoliaeth penodol sy'n arbennig o berthnasol i barthau perfformiad uchel (2,000 gair) 
    

Tiwtor

Yr Athro Tim Woodman

Mae Tim Woodman yn athro seicoleg perfformiad. Mae ganddo ddau ffocws ymchwil. Mae'r cyntaf yn ymwneud â sut y gall athletwyr fynd ati’n wahanredol i uchafu perfformiad dan straen. Mae'r ail yn ymwneud â datblygu model o gymhelliant dynol sydd â risg wrth ei wraidd. Mae Tim yn seicolegydd chwaraeon achrededig, hyfforddwr yoga, a seicotherapydd sy’n canolbwyntio ar y corff. Ar hyn o bryd, mae’n arwain ar ddau grant ymchwil mawr, un gyda Chlwb Pêl-droed Manchester City, yn canolbwyntio ar berfformiad elît, a’r llall gyda Bwrdd Criced Cymru a Lloegr, yn canolbwyntio ar iechyd meddwl. Mae ganddo deulu ifanc, y mae'n ei garu. Mae ganddo alergedd i ffurflenni. Mae'r cyflwr dynol yn ei ryfeddu.

Beth fyddwch chi’n ei astudio ar y cwrs yma?

Byddwch yn dysgu am ddamcaniaethau cynnar a chyfoes o bersonoliaeth a sut mae’r damcaniaethau hyn yn berthnasol i amgylcheddau perfformio. Wrth wneud hynny, byddwn yn ymdrin â’r ymchwil empirig mewn modd beirniadol ac yn cymhwyso hynny i leoliadau’r byd go iawn. Byddwn yn ymdrin â'r safbwyntiau mwyaf traddodiadol am bersonoliaeth a sut mae’r safbwyntiau hyn yn berthnasol i amgylcheddau perfformiad, a byddwn hefyd yn ymdrin â damcaniaethau personoliaeth mewn perthynas yn benodol ag amgylcheddau perfformiad, sef arbenigedd penodol tîm ymchwil y Sefydliad Seicoleg Perfformiad Elît. Mewn geiriau eraill, byddwch yn dysgu'n uniongyrchol gan y tîm sydd wedi gwneud llawer o'r ymchwil hwn.

Unedau Dysgu

• Cyflwyniad i’r modiwl a throsolwg o’r asesiadau 
• Damcaniaeth Gynnar o Bersonoliaeth 
• Damcaniaeth Gyfoes o Bersonoliaeth
• Nodweddion Personoliaeth Penodol mewn Cyd-destunau Perfformiad Penodol
• Yr Achos Penodol o Bersonoliaeth a Chymryd Risg
• Adolygu'r modiwl, seminar/darlith fyw a manylion asesu

• Y ffi ar gyfer blwyddyn academaidd 2024/25 fydd £556 (yn cynnwys TAW).
• Ewch i dudalen Ffioedd a Chyllid Ôl-raddedig er mwyn cael gwybodaeth bellach.

Fel arfer bydd rhaid i ymgeiswyr feddu ar radd anrhydedd 2.ii o leiaf. Rydym hefyd yn annog ceisiadau gan ymgeiswyr nad ydynt yn raddedigion ond sydd â chymwysterau proffesiynol amgen neu sy’n gallu dangos o leiaf 3 blynedd o brofiad gwaith perthnasol mewn amgylchedd perfformiad uchel (e.e. fel athletwr, hyfforddwr, cerddor proffesiynol, gweithredwr busnes neu gyllid neu o fewn amrywiaeth eang o swyddi proffesiynol eraill).

Sut i wneud cais

Gwnewch yn siŵr eich bod yn darllen ac yn dilyn y canllaw cais cam wrth gam gan y bydd hyn yn nodi pa adrannau o'r ffurflen gais sy'n orfodol ar gyfer y math o gwrs rydych am wneud cais amdano ac arbed amser i chi.

Paratowch y wybodaeth ganlynol (mewn dogfen Word):

• Manylion cyflogaeth cyfredol;
• Blynyddoedd o brofiad, a hanes cyflogaeth (lle bo hynny'n berthnasol)
• Enw'r aelod staff a'r sefydliad sydd wedi cymeradwyo eich cyllid ar gyfer y modiwl hwn.

Bydd hyn yn cyflymu'r broses o lenwi'r ffurflen gais.