Seicoleg Perfformiad Unigol XH-4104 (MICRO-GYMHWYSTER) - Mynediad yn

Mae hwn yn gwrs byr hyblyg ar lefel ôl-raddedig sy'n cael ei gyflwyno ar-lein.

Pam fod rhai pobl yn fwy tueddol o weld dirywiad mewn perfformiad nag eraill? Neu, pam y gall lefelau perfformiad amrywio dros amser heb unrhyw reswm amlwg? Mae’r modiwl hwn yn archwilio sut mae personoliaeth, adnoddau seicolegol, emosiynau a gwybyddiaeth yn dylanwadu ar ein gallu i berfformio dan bwysau. 

Ar gyfer pwy mae'r Cwrs Byr hwn yn addas?

Mae ein dysgwyr wedi cynnwys pobl o bob rhan o’r DU, ac o bob rhan o’r byd. Mae'r cwrs byr yma'n rhan o'r rhaglen MSc Seicoleg Perfformio (dysgu o bell) ac mae cyn-fyfyrwyr yn cynnwys:

• Hyfforddwyr chwaraeon proffesiynol: Rygbi, Criced, Pêl-droed Gaeleg, a Hyfforddwyr Rhedeg Dygnwch
• Aelodau ‘UK Coaching’
• Athletwyr Elitaidd mewn: pêl-droed, pêl-droed Gaeleg, criced, rygbi a golff
• Cyfarwyddwyr Perfformiad ar gyfer Timau Undeb Rygbi Proffesiynol
• Perfformwyr Opera
• Cerddorion Proffesiynol
• Arweinwyr Busnes
• Uwch reolwyr o sefydliadau fel MasterCard a Facebook
• Criw Cefn Hofrennydd yr RAF
• Rheolwyr traffig awyr
• Swyddogion Heddlu
• Meddygon Teulu ac Anesthetyddion
• Rheolwyr GIG

Pam astudio’r cwrs?

Prif amcan y cwrs hwn yw tynnu sylw at y rôl bwysig y mae gwahaniaethau unigol yn ei chwarae yn y ffordd yr ydym yn ymateb i bwysau ac yn perfformio o dan bwysau. Fel bodau dynol, mae gan bob un ohonom rai llwybrau unigryw i fethiant o dan bwysau a bydd deall y llwybrau unigol hynny ac ymyrryd ar lefel unigol yn helpu i liniaru perfformiadau gwael i raddau. 

Pa mor hir mae'r cwrs yn cymryd i'w gwblhau?

Cyflwynir y cwrs byr hwn dros gyfnod o 12 wythnos. Fodd bynnag, bydd gennych fynediad i'r holl ddeunydd darlithoedd ar ddechrau'r cwrs a fydd yn eich galluogi i fynd mor gyflym neu mor araf ag y bydd eich amgylchiadau personol yn mynnu. 

Asesiad

Gosodir yr asesiad ar ddiwedd wythnos 12 ac mae'n cynnwys ymyriad unigol lle cyflwynir astudiaeth achos i chi sy'n cynnwys asesiad o ymddygiadau dan bwysau, personoliaeth, a phroffiliau seicolegol eraill.    

Y cyfrif geiriau ar gyfer yr asesiad yw hyd at 2,000 o eiriau. 

Y Gofynion Technegol

Cwrs ar-lein yw hwn a gyflwynir trwy Blackboard Ultra. Bydd angencysylltiad sefydlog â’r rhyngrwyd, adnoddau Technoleg Gwybodaeth a chyfrifiadur a meddalwedd cyfoes, meicroffon a chlustffonau neu seinyddion ar y myfyrwyr.

Tiwtor

Dr Stuart Beattie 

Mae Stuart yn Ddarllenydd mewn Seicoleg Perfformiad, cyfarwyddwr yr MSc mewn Seicoleg Perfformiad (Dysgu o Bell), Seicolegydd Chwaraeon Cofrestredig HCPC, ac aelod o'r Sefydliad Seicoleg Perfformiad Elît (IPEP). 

Mae ei ddiddordebau ymchwil yn cynnwys Gwydnwch Meddyliol, Gwydnwch, a Seicoleg Perfformiad yn Gyffredinol.  

Bu Stuart yn gweithio fel seicolegydd chwaraeon i Gymnasteg Prydain am bum mlynedd ac mae wedi bod yn ymwneud â phrosiectau gwytnwch ar gyfer Camre Cymru a’r Gwasanaeth Cyfiawnder Ieuenctid.  

Mae prosiectau goruchwylio PhD cyfredol yn cynnwys -archwilio prosiectau Gwydnwch, Gwydnwch Meddyliol, a Pherthnasoedd Triadig gyda chlwb Pêl-droed Manchester City, yn ogystal â goruchwylio ymgeiswyr PhD o fewn y GIG.   

Fel rhan o'r MSc Seicoleg Perfformio (dysgu o bell), mae Stuart hefyd yn darparu cefnogaeth oruchwyliol i fyfyrwyr ar draws meysydd Opera, RAF, Busnes, a Hyfforddi Chwaraeon. 

Beth fyddwch chi’n ei astudio ar y cwrs yma?

Bydd y cynnwys wedi’i seilio ar agweddau ar y canlynol: 

• personoliaeth 
• sgiliau seicolegol 
• gwybyddiaeth 
• rheoleiddio emosiynol ac ymddygiadol 
• yr amgylchedd hyfforddi 
• gwytnwch meddyliol 
• ymddygiad meddyliol cadarn wrth hyfforddi a chystadlu 
• gwytnwch 
• perfformiad.  

Bydd y cwrs byr hwn yn eich helpu i archwilio’r cysylltiadau uniongyrchol a rhyngweithiol rhwng personoliaeth, adnoddau seicolegol, emosiynau a gwybyddiaeth wrth baratoi a pherfformio dan bwysau. Gan ddefnyddio gwybodaeth a gasglwyd o amrywiaeth o ffynonellau (data o holiaduron hunan-adrodd, data arsylwi, data perfformiad, a data cyfweliadau) byddwch yn dylunio ymyriad pwrpasol ar gyfer unigolyn a fydd yn eu helpu i berfformio ar lefel fwy cyson dros amser.  

Bydd y deilliannau dysgu’n asesu eich gallu i ddadansoddi gwybodaeth hanfodol trwy driongli dulliau (data perfformiad, data arsylwi, a data o holiaduron) a fydd yn eich galluogi i ddod i gasgliad gwybodus am allu unigolyn i berfformio dan bwysau.   

Byddwch yn asesu ac yn gwerthuso proffil seicolegol cleient yn feirniadol mewn perthynas â phersonoliaeth, gwytnwch meddwl, ymddygiad meddyliol cadarn, gwybyddiaeth, hunanreoleiddio a sgiliau seicolegol, ac yn dangos sut y gallai hyn ddylanwadu ar sut maent yn perfformio dan bwysau.  

Yn olaf, byddwch yn dangos eich gallu i ddylunio ymyriad sy’n seiliedig ar ymchwil a fydd yn lleihau'r tebygolrwydd o amharu ar berfformiad dan bwysau. 

Beth fydd y dysgwr yn ei gael allan o’r cwrs?

Bydd maes llafur y cwrs byr yn ymdrin â’r canlynol:  

• Wythnos 1: Cyflwyniad i’r modiwl a throsolwg o’r asesiadau  
• Wythnos 2: Cyflwyniad i Wytnwch Meddyliol 
• Wythnos 3: Ymddygiad Meddyliol Cadarn 
• Wythnos 4: Datblygu Gwytnwch Meddyliol 1 
• Wythnos 5: Datblygu Gwytnwch Meddyliol 2 
• Wythnos 6: Seminar byw gyda darlithydd y cwrs (dim darlithoedd) 
• Wythnos 7: Personoliaeth a Gwytnwch Meddyliol 
• Wythnos 8: Ymyriadau Gwytnwch Meddyliol 
• Wythnos 9: Amgylcheddau Hyfforddi 
• Wythnos 10: Ymdopi a Gwytnwch Meddyliol 
• Wythnos 11: Personoliaeth, Hyfforddi Dan Bwysau, a Throsolwg o’r Modiwl 
• Wythnos 12: Seminar byw gyda darlithydd y cwrs (dim darlithoedd) 

• Y ffi ar gyfer blwyddyn academaidd 2024/25 fydd £556 (yn cynnwys TAW).
• Ewch i dudalen Ffioedd a Chyllid Ôl-raddedig er mwyn cael gwybodaeth bellach.

Fel arfer bydd rhaid i ymgeiswyr feddu ar radd anrhydedd 2.ii o leiaf. Rydym hefyd yn annog ceisiadau gan ymgeiswyr nad ydynt yn raddedigion ond sydd â chymwysterau proffesiynol amgen neu sy’n gallu dangos o leiaf 3 blynedd o brofiad gwaith perthnasol mewn amgylchedd perfformiad uchel (e.e. fel athletwr, hyfforddwr, cerddor proffesiynol, gweithredwr busnes neu gyllid neu o fewn amrywiaeth eang o swyddi proffesiynol eraill).

Sut i wneud cais

Gwnewch yn siŵr eich bod yn darllen ac yn dilyn y canllaw cais cam wrth gam gan y bydd hyn yn nodi pa adrannau o'r ffurflen gais sy'n orfodol ar gyfer y math o gwrs rydych am wneud cais amdano ac arbed amser i chi.

Paratowch y wybodaeth ganlynol (mewn dogfen Word):

• Manylion cyflogaeth cyfredol;
• Blynyddoedd o brofiad, a hanes cyflogaeth (lle bo hynny'n berthnasol)
• Enw'r aelod staff a'r sefydliad sydd wedi cymeradwyo eich cyllid ar gyfer y modiwl hwn.

Bydd hyn yn cyflymu'r broses o lenwi'r ffurflen gais.