Ynglŷn â’r Cwrs Yma
Mae'r rhaglen radd hon yn rhoi'r cyfle i fyfyrwyr ddilyn llwybr arbenigol CFA (Dadansoddwr Ariannol Siartredig) a chael y sgiliau i sefyll arholiad CFA Lefel 1 (i fyfyrwyr sy'n cael eu derbyn ym mis Medi a mis Ionawr).
Mae gwasanaethau ariannol a bancio yn sector cystadleuol iawn sy’n newid yn gyflym ym mhob economi fodern. Mae newidiadau yng ngofynion cwsmeriaid, technoleg, amodau cystadleuol a rheoleiddio yn golygu bod angen i reolwyr, masnachwyr a dadansoddwyr wneud penderfyniadau cyflym a phellgyrhaeddol ynghylch eu gweithrediadau tymor byr a'u strategaethau tymor hir. Mae'r rhaglenni hyn yn gyfle unigryw i astudio theori ac ymarfer uwch mewn perthynas â'r gwasanaethau ariannol, ac i werthfawrogi achosion ac arwyddocâd datblygiadau cyfredol mewn sector hanfodol a deinamig o'r economi.
Cynlluniwyd y rhaglen MBA Bancio a Chyllid i ddatblygu eich sgiliau presennol trwy astudiaethau arbenigol uwch. Un amcan pwysig yw darparu hyfforddiant dadansoddol perthnasol i chi, er mwyn i chi fod yn gyfarwydd â'r datblygiadau damcaniaethol ac ymarferol diweddaraf sy'n ymwneud â bancio, cyllid a marchnadoedd cyfalaf. Mae'r graddau hyn yn darparu fframwaith damcaniaethol cydlynol ar gyfer y gwahanol feysydd pwnc, ond mae'r pwyslais drwyddi draw ar ddefnyddio technegau ariannol yn ymarferol mewn lleoliad yn y byd go iawn.
Bydd yr MBA yn datblygu swyddogion gweithredol gwybodus a galluog, a fydd yn symud yn gyflym i swyddi allweddol yn y sector ariannol. Mae'r radd yn canolbwyntio ar reolaeth ariannol a strategol banciau a sefydliadau ariannol eraill. Mae astudiaethau achos a materion cyfoes yn rhan amlwg o'r rhaglen MBA.
Llwybr arbenigol CFA (Dadansoddwr Ariannol Siartredig)
Mae llawer o’n rhaglenni gradd yn rhoi'r cyfle i ddilyn llwybr arbenigol CFA (Dadansoddwr Ariannol Siartredig) a chael y sgiliau i sefyll arholiad CFA Lefel 1 (i fyfyrwyr sy'n cael eu derbyn ym mis Medi a mis Ionawr). Erbyn hyn, y CFA yw’r cymhwyster proffesiynol uchaf ei barch ym maes cyllid yn y byd i gyd.
Bydd myfyrwyr sy'n dilyn y llwybr hwn yn astudio modiwl newydd o'r enw Ymchwil Ariannol a Chyfres CFA yn ystod yr haf. Bydd myfyrwyr yn mynd i seminarau ymchwil ym mis Mehefin ac yna’n cael hyfforddiant arbenigol i’w paratoi at yr arholiad CFA Lefel 1 a ddarperir gan Fitch Learning, sy'n ddarparwr addysg CFA cydnabyddedig ac achrededig. Bydd y dysgu’n cynnwys dau ddiwrnod o seminarau ymchwil ym mis Mehefin a phum bloc deuddydd o hyfforddiant, ynghyd â dau floc ychwanegol o adolygu yn ystod mis Gorffennaf a mis Awst. Bydd asesiadau yn dilyn y seminarau a'r hyfforddiant CFA.
Ni chodir unrhyw ffioedd ychwanegol ar fyfyrwyr sy'n dilyn y llwybr hwn.
Ond bydd gofyn i fyfyrwyr gofrestru gyda’r CFA Institute a thalu er mwyn sefyll yr arholiad. Telir ffioedd cofrestru ac arholiad i'r CFA Institute.
Gallwch gofrestru ar y llwybr CFA hwn ar ôl i chi gyrraedd Bangor. Os hoffech wneud ymholiadau ymlaen llaw, cysylltwch ag owain.apgwilym@bangor.ac.uk.
Cynnwys y Cwrs
Modiwlau ar gyfer y flwyddyn academaidd gyfredol
Mae’r rhestrau modiwlau ar gyfer eich arwain yn unig ac fe allant newid. Cymerwch olwg ar yr hyn y mae ein myfyrwyr yn ei astudio ar hyn o bryd ar tudalen Modiwlau Bancio a Chyllid.
Mae cynnwys y cwrs wedi’i nodi i’ch arwain yn unig ac fe all newid.
