Ynglŷn â’r Cwrs Yma
Ar y radd MA Llenyddiaeth Saesneg hon, byddwch yn astudio testunau canonaidd a llai adnabyddus o dros fil o flynyddoedd o hanes llenyddiaeth Saesneg, mewn cymuned glos o fyfyrwyr o’r un anian o bob cwr o’r byd. Cewch gyfle i astudio testunau a ysgrifennwyd yn Saesneg neu a astudir mewn cyfieithiadau o Gymru, Pacistan, India, Nigeria, y Caribî, UDA, De Affrica ac Awstralia.
Mae cyflogadwyedd yn nodwedd allweddol o'r MA Llenyddiaeth Saesneg. Cewch astudio ar fodiwlau sy'n canolbwyntio ar gyflogadwyedd, a datblygu llu o sgiliau trosglwyddadwy hynod werthfawr ar gyfer y gweithle y mae galw amdanynt yma yn y Deyrnas Unedig ac yn byd-eang.
Bu Llenyddiaeth Saesneg yn rhan annatod o Brifysgol Bangor ers i'r Brifysgol agor ei drysau ym 1884. Mae ein cyfadran yn cynnwys awduron arobryn sy'n frwd dros eich profiadau dysgu.
Cewch ddysgu am amrywiaeth o bynciau sy'n seiliedig ar wahanol gysyniadau o'r 'byd' gan arbenigwyr yn eu meysydd. Mae’r dosbarthiadau’n fach sy’n golygu y byddwch yn gweithio'n glos gyda’r staff ar arbenigeddau ymchwil megis llenyddiaethau ôl-drefedigaethol, llenyddiaeth a'r amgylchedd, yn groestoriadol o ran rhywedd, dosbarth a hil, llenyddiaeth ac amser. Cewch hefyd gymryd rhan yn y dosbarthiadau meistr, archwilio adnoddau archifol heb eu hail a chymryd rhan yn rhaglenni seminar a darlithoedd y canolfannau ymchwil sy’n gysylltiedig â’r Ysgol iaith, Diwylliant a’r Celfyddydau.
Sut byddaf yn dysgu?
Byddwch yn dysgu trwy gymysgedd o ddarlithoedd, seminarau a thiwtorialau. Bydd disgwyl i chi hefyd wneud rhywfaint o waith grŵp yn ogystal ag astudio unigol. Ar yr MA Llenyddiaeth Saesneg, byddwch hefyd yn cyfarfod yn rheolaidd â Goruchwylydd eich Traethawd Hir am arweiniad a chyngor.
Sut byddaf yn cael fy asesu?
Mae'r radd MA Llenyddiaeth Saesneg yn cynnig amrywiol ddulliau asesu megis:
- Gwaith Cwrs
- Cyflwyniadau
- Portffolau
- Blogiau
- Posteri Ymchwil
- Traethawd hir
Hyd y Rhaglen
MA: Blwyddyn yn llawn-amser, 2 flynedd yn rhan-amser.
Diploma: 9 mis yn llawn amser (rhan-amser ar gael hefyd).
Helo. Fy enw i yw Esraa Alkandari, rydw i'n astudio llenyddiaeth Saesneg.
Dewisais lenyddiaeth Saesneg yn y lle cyntaf am fy mod wrth fy modd yn darllen.
Mae darllen yn gwneud i mi deimlo fy mod yn gallu teithio drwy amser yn darganfod lleoedd newydd.
Rwy'n cael dysgu am ddiwylliannau eraill. A dyma'n union beth rwy’n ei hoffi am Fangor.
Mae'n lle amrywiol iawn gyda myfyrwyr o bob rhan o'r byd.
Hefyd, mae'r staff yma yn anhygoel. Maen nhw'n garedig iawn. Maen nhw'n groesawgar iawn.
Maen nhw bob amser yn barod i helpu, felly maen nhw’n ateb eich e-byst yn gyflym iawn ac maen nhw hefyd ar gael yn ystod oriau swyddfa i ateb unrhyw gwestiynau.
Beth rwy’n ei garu am Saesneg yma yw bod y dosbarthiadau yn llai o ran maint, sy’n golygu bod y darlithydd yn gallu canolbwyntio ar bob un ohonon ni’n unigol.
Felly mae hynny'n mynd i wneud i chi deimlo eich bod yn rhan o dîm a hefyd yn ei gwneud hi'n haws cwrdd â phobl sy'n rhannu'r un diddordebau â chi.
Fel myfyriwr rhyngwladol, rydw i wir yn teimlo'n ddiogel yma. Mae pawb mor gyfeillgar ac rydw i’n teimlo ein bod ni'n un teulu mawr, felly mae'n teimlo'n union fel adref.
Ar hyn o bryd rydw i’n fyfyriwr PhD yma, roeddwn wrth fy modd ym Mhrifysgol Bangor a doeddwn i ddim yn gallu gadael.
Cynnwys y Cwrs
Beth fyddwch chi’n ei astudio ar y cwrs yma?
Ar y rhaglen MA Llenyddiaeth Saesneg, byddwch yn astudio’r modiwlau canlynol:
- Theori Feirniadol, Ymarfer, ac Ymchwil · I'r Byd (20 credyd)
- Y Traethawd Hir Ôl-radd (60 credyd) - Byddwch yn paratoi traethawd hir 20,000 o eiriau ar bwnc o'ch dewis, wedi'i ymchwilio a'i ysgrifennu dan oruchwyliaeth unigol arbenigwr pwnc.
Rhaid i chi gymryd 80 credyd pellach o blith dewis o'r modiwlau canlynol:
- Adeiladu Bydoedd Eraill: Breuddwydion a Ffantasïau (20 credyd)
- Bydoedd y Dyfodol: · Dystopia ac Iwtopia (20 credyd)
- Traethawd Agored (30 credyd):
- Bydoedd a Fu: Llenyddiaeth a Hanes (20 credyd)
- Y Byd yma: Mynd yn Fyd-eang (20 credyd)
Cofiwch y gall modiwlau newid o flwyddyn i flwyddyn, a bod yr uchod at ddibenion rhoi arweiniad yn unig.
Modiwlau ar gyfer y flwyddyn academaidd gyfredol
Mae’r rhestrau modiwlau ar gyfer eich arwain yn unig ac fe allant newid. Cymerwch olwg ar yr hyn y mae ein myfyrwyr yn ei astudio ar hyn o bryd ar tudalen Modiwlau Llenyddiaeth Saesneg.
Mae cynnwys y cwrs wedi’i nodi i’ch arwain yn unig ac fe all newid.
Gofynion Mynediad
Gradd israddedig 2.ii neu gyfwerth mewn pwnc perthnasol (e.e. Astudiaethau Llenyddol, Hanes, Astudiaethau/Llenyddiaeth Arthuraidd, Astudiaethau Ffilm).
Bydd ymgeiswyr sydd â chymwysterau neu brofiad cyfwerth a cheisiadau gan weithwyr proffesiynol nad oes ganddynt radd yn cael eu hystyried fesul un. Cysylltwch â ni am fwy o wybodaeth.
Yn achos myfyrwyr nad Saesneg yw eu hiaith gyntaf, bydd arnynt angen sgôr IELTS o 6.5 o leiaf (heb i unrhyw elfen fod yn is na 6.0).
Gyrfaoedd
Mae'r cwrs yn cynnig paratoad rhagorol ar gyfer rhaglenni doethurol. Mae'n ychwanegu at gymwysterau'r rhai sy'n bwriadu dilyn gyrfa mewn meysydd diwylliannol a chreadigol fel cyhoeddi, gweinyddu'r celfyddydau, y cyfryngau, cyfathrebu ac addysgu. Gall y profiad o astudiaeth lenyddol ôl-raddedig hefyd wella cyflogadwyedd at y dyfodol, trwy feithrin sgiliau trosglwyddadwy megis: y gallu i wneud gwaith ymchwil annibynnol; cwblhau dadansoddiad datblygedig o destunau a dadleuon; a chyflwyno syniadau yn rhugl ar ffurf ysgrifenedig a llafar. Yn anad dim, mae'r MA yn cynnig cyfle ar gyfer datblygiad personol a deallusol uwch.
