Nyrsio Plant (Dysgu o Bell) BN (Anrh) Israddedig - Mynediad: Medi 2025/26*

Noder os gwelwch yn dda: Mae'r cwrs hwn yn dechrau ym Medi 2025.

Mae nyrsys plant a phobl ifanc yn gofalu am blant a phobl ifanc o bob oedran, o fabanod newydd-anedig hyd at bobl ifanc sydd ag ystod o anghenion iechyd corfforol, emosiynol a meddyliol. Mae nyrsys plant a phobl ifanc yn gweithio'n agos gydag aelodau o'r teulu a gofalwyr i leihau'r effaith o fod yn sâl neu yn yr ysbyty. Bydd y rhaglen gyffrous Nyrsio Plant (Dysgu o Bell)  hon yn rhoi'r wybodaeth a'r sgiliau i chi raddio fel nyrs plant gofrestredig. Yn rhan o hyn byddwch yn gwneud gwaith ymarferol mewn lleoliadau cymunedol ac ysbytai gyda'n sefydliadau partner yng Nghymru, ac yn cael profiadau mewn amrywiaeth o feysydd sy'n gysylltiedig â gofal iechyd plant. Byddwch yn mynd ar leoliadau ym mhob un o dair rhan eich cwrs mewn amrywiaeth o feysydd clinigol ledled Cymru fel ysbytai, unedau babanod gofal arbennig, hosbisau, gwasanaethau iechyd meddwl, timau cymunedol nyrsio plant ac unedau gofal dwys pediatrig arbenigol.

Cefnogir nyrsys cofrestredig i ddysgu ar hyd eu gyrfaoedd. Gwneir hyn yn y lle cyntaf drwy breceptoriaeth sy'n cynnig y gefnogaeth strwythuredig sydd ei hangen i drosglwyddo'ch gwybodaeth yn llwyddiannus i ymarfer bob dydd, a thrwy ddatblygiad proffesiynol parhaus. 

Fel nyrs plant byddwch yn gofalu am blant o bob oedran sydd ag amrywiaeth eang o anghenion. Byddwch yn gweithio mewn partneriaeth ag aelodau o'r teulu a’r gofalwyr i leihau effeithiau salwch neu fod yn yr ysbyty a chynnig cysur a sicrwydd i gleifion a'u rhieni neu ofalwyr mewn amgylchiadau anodd neu ddirdynnol. Gall y swydd fod yn heriol ar brydiau. Eto, mae’n un sy’n rhoi llawer o foddhad yn y byd gofal iechyd ohoni sy'n newid yn gyflym.  Mae nyrsys plant yn cydweithio â gweithwyr gofal iechyd proffesiynol eraill mewn amrywiol leoliadau sy'n dilyn siwrnai’r claf o’r cartref, yn agos i'r cartref neu yn y cartref, gan gynnig amrywiaeth wirioneddol i chi yn eich gyrfa.

Mae swyddogaeth y nyrs plant felly'n amrywiol ac yn cynnwys rhaglenni iechyd ataliol a hybu iechyd, ymchwiliadau, diagnosis a thriniaeth (meddygol a llawfeddygol), cefnogaeth emosiynol a chyda iechyd meddwl a llawer o ymyriadau a therapïau eraill. Mae Gwasanaethau Iechyd Meddwl Plant a Phobl Ifanc (CAMHS), nyrsys meddygfeydd, ymwelwyr iechyd a nyrsys ysgol yn rhai o'r personél gofal iechyd sy'n gweithio gyda phlant, pobl ifanc a'u teuluoedd mewn lleoliad gofal sylfaenol.

Bydd y cwrs Nyrsio Plant (Dysgu o Bell)  yn eich paratoi at fynd yn nyrs plant a phobl ifanc sy'n gallu dangos sgiliau meddwl beirniadol ynghylch materion gofal iechyd cymhleth ac iechyd a lles plant, pobl ifanc a'u teuluoedd. Bydd yn fodd i'ch tosturi ffynnu a hynny trwy ddull sy'n seiliedig ar dystiolaeth. Bydd hefyd yn eich galluogi i gael effaith wirioneddol ar iechyd a lles babanod, plant, pobl ifanc a'u teuluoedd. 

Wrth ichi ddatblygu eich gyrfa mae yna ddigon o bosibiliadau ar gael ac efallai yr hoffech chi arbenigo mewn maes fel: 

• nyrsio gofal dwys i'r newydd-anedig 
• oncoleg pediatreg 
• llosgiadau a phlastigau 
• amddiffyn/gwarchod plant 
• darparu gofal gyda cherdded a symud 
• asthma 
• orthopaedeg   
• diabetes 
• gofal parhaus i blant ag anghenion arbennig 

Efallai y byddwch yn dewis gweithio ym maes rheoli, addysgu neu ymchwil glinigol.  

Mae Bangor yn derbyn ceisiadau drwy gydol y flwyddyn i ddilyn cyrsiau nyrsio, tra bod llefydd ar gael. Gan fod galw mawr am y llwybr hwn, rydym yn argymell eich bod yn cyflwyno eich cais cyn gynted â phosib.

Gall elfennau o'r cwrs fod ar gael trwy gyfrwng y Gymraeg a chewch gefnogaeth i gael mynediad at gymhelliant ariannol y Coleg Cymraeg Cenedlaethol.

Cliciwch yma am ragor o wybodaeth am ddarpariaeth ddwyieithog yr ysgol.

Pam dewis Prifysgol Bangor ar gyfer y cwrs? 

• Cyllid ar gael gan y GIG ar hyn o bryd i dalu ffioedd a chyfraniad at gostau byw. 

Dysgu o bell

Y radd Nyrsio dysgu o bell lawn amser newydd hon yw'r gyntaf o’i bath yng Nghymru. Mae’n cynnig llwybr dysgu o bell amser llawn sy'n eich galluogi i barhau i fyw gartref wrth ddilyn y radd nyrsio ar-lein. Mae hanes rhagorol Prifysgol Bangor o ddarparu graddau nyrsio dros gyfnod maith yn sicrhau mai staff academaidd nyrsio gwybodus a phrofiadol fydd yn eich dysgu a’ch cefnogi. Darperir elfennau hyfforddedig y cwrs hwn drwy ein hamgylchedd dysgu rhithwir rhyngweithiol a fydd yn caniatáu i chi gymryd rhan mewn darlithoedd, seminarau a hyfforddiant sgiliau i'ch helpu i gwblhau’r rhaglen yn eich amser eich hun. Cewch hefyd ddefnyddio'r ystod amrywiol o gyfleusterau sydd ar gael i bob myfyriwr ar ein campysau ym Mangor a Wrecsam, ac mae hybiau dysgu rhanbarthol yn cael eu sefydlu i roi hyblygrwydd gwirioneddol i chi o ran sut a ble rydych chi'n dysgu. Mae'r radd nyrsio dysgu o bell hon yn ymgorffori ac yn darparu cefnogaeth bersonol barhaus trwy gydol y rhaglen, sydd, yn ein barn ni, yn ganolog i'n hethos.

Fel cwrs dysgu o bell mae'r radd amser llawn hon ar gael i ymgeiswyr o bob rhan o'r DU gyda’r dysgu yn cynnwys 50% o waith theori a 50% mewn lleoliadau ymarfer. Fodd bynnag, bydd y lleoliadau gyda Bwrdd Iechyd GIG yng Nghymru yn unig. Trefnir lleoliadau mor agos â phosibl i gyfeiriad cartref y myfyriwr neu gyfeiriad lleoliad sydd wedi ei cael ei gytuno. Fodd bynnag, efallai y bydd angen teithio i leoliadau a chanolfannau i elwa ar yr ystod o brofiadau dysgu sy'n ofynnol i gwblhau'r cwrs. Pan fyddwch yn dysgu ar leoliad, byddwch yn mynd i’ch lleoliad am 37.5 awr yr wythnos. Yn eich lleoliadau, cewch gyfle i ddatblygu a chymhwyso eich gwybodaeth a'ch sgiliau damcaniaethol mewn amgylchedd ymarferol, gan ddysgu am yr arferion gorau a rhagoriaeth gofal cleifion gan ymarferwyr, cleifion, gofalwyr a pherthnasau, a myfyrwyr o broffesiynau eraill fel radiograffeg, bydwreigiaeth, ffisiotherapi a gwaith cymdeithasol.

Dim angen talu ffioedd dysgu

Os ystyrir chi yn fyfyriwr cartref o’r Deyrnas Unedig mewn perthynas â ffioedd dysgu, a all ymrwymo i weithio yng Nghymru am ddwy flynedd ar ôl graddio, gallech gael eich ffioedd dysgu wedi eu talu'n llawn trwy Gynllun Bwrsariaethau GIG Cymru ynghyd â gwneud cais am gyfraniad bwrsariaeth o £1,000 tuag at gostau byw. Gallwch hefyd wneud cais am y fwrsariaeth yn seiliedig ar brawf modd sy'n ddibynnol ar incwm y cartref ac unrhyw gyllid arall. At hyn, mae meini prawf cymhwysedd ar gyfer cymorth gofal plant, lwfans dibynnydd a lwfans i rieni sy’n dysgu. Gallwch hefyd wneud cais am gyllid cynhaliaeth ar sail incwm ac am fenthyciad cyfradd llog isel gan Cyllid Myfyrwyr. Gan fod y cwrs hwn yn cael ei ariannu gan GIG Cymru, ni allwn dderbyn ceisiadau gan fyfyrwyr tramor. 

Mae manylion llawn ar gael ar dudalen gyllid y GIG.

Bwrsariaethau TG Myfyrwyr

Bydd Prifysgol Bangor mewn partneriaeth â HEIW yn sicrhau nad yw mynediad at dechnoleg yn rhwystr i ymgeiswyr â chymwysterau addas sydd eisiau gyrfa ym maes gofal iechyd. Dan y cynllun hwn mae ymgeiswyr ar y cwrs hwn yn gymwys i gael bwrsariaeth* gwerth £400 i fynd tuag at brynu cyfrifiadur os ydynt yn byw yn un o'r 20% o ardaloedd isaf (ardaloedd 1-382) ym Mynegai Amddifadedd Lluosog Cymru. Gallwch weld a yw eich cod post yn eich gwneud yn gymwys ar y dudalen hon ar wefan Llywodraeth Cymru: https://wimd.gov.wales/?lang=cy. *mae telerau ac amodau yn berthnasol.

Gofynion technegol i astudio'r cwrs dysgu o bell hwn 

• Cyfrifiadur PC neu Mac, gwe-gamera a chlustffonau. Bydd y mwyafrif o gyfrifiaduron o dan 5 oed yn ddigon da.
• Mynediad i'r rhyngrwyd cyflymder lleiaf o 2Mbit yr eiliad - nodwch, os oes rhywun arall yn eich cartref yn defnyddio eich cysylltiad rhyngrwyd ar yr un pryd, bydd angen cyflymder cyflymach arnoch neu fod yr unig un yn y tŷ sy’n defnyddio’r cysylltiad yn ystod sesiynau.
• Mynediad i borwr gwe Chrome (mae hwn am ddim i'w lawrlwytho i ddefnyddwyr Mac a Windows) 
• Bydd angen copi o Microsoft Office 365 arnoch hefyd - mae gan fyfyrwyr Bangor hawl i gael copi am ddim i'w ddefnyddio yn ystod eu hastudiaethau. Gellir lawrlwytho hwn ar ôl i fyfyrwyr gofrestru ar eu cwrs a chael eu manylion TG Bangor.
• Sylwer nad yw Chromebooks yn cael eu hystyried yn addas i'w defnyddio gan fyfyrwyr sy'n astudio ar gyrsiau o bell/gwasgaredig. 

Mae'n hanfodol ar gyfer y cwrs hwn bod gennych fynediad i'r rhyngrwyd a lle pwrpasol i astudio a defnyddio'r adnoddau yn eich amser eich hun dros gwrs y rhaglen 3 blynedd.
Bydd yn orfodol i chi wneud astudiaeth ddamcaniaethol a lleoliadau clinigol mewn ysbytai a lleoliadau cymunedol a/neu breswyl yng Nghymru. Mae lleoliadau yn darparu profiadau dysgu rhagorol yn seiliedig ar ymarfer ar draws Cymru i fyfyrwyr sy’n dilyn y rhaglen ddysgu. Mae'r lleoliadau dan oruchwyliaeth hyn yn eich galluogi i arsylwi gweithwyr proffesiynol yn y gwaith, arsylwi gwaith tîm o ansawdd uchel, ac i gyfrannu at ddarparu gofal nyrsio gyda chefnogaeth gan ddatblygu eich hyder a'ch sgiliau mewn sawl maes o ymarfer nyrsio.

Cewch gefnogaeth ragorol gan diwtor personol sy'n nyrs gofrestredig ac yn aelod staff academaidd. Ar gyfer y rhaglen hon byddwch yn cael cyfarfodydd rheolaidd trwy lwyfannau technolegol sy'n caniatáu trafod a chefnogi sawl agwedd ar ddysgu damcaniaethol a chlinigol.

Yn ystod lleoliadau, cewch eich goruchwylio a'ch asesu gan nyrsys cofrestredig a phrofiadol sy’n ymarfer a gweithwyr proffesiynol eraill. Caiff gwaith theori a gwaith ymarferol ei asesu trwy aseiniadau, arholiadau, cyflwyniadau a thrwy Bortffolio Asesu Ymarfer Clinigol Cymru Gyfan.

Ble byddaf yn astudio?

Cyflwynir elfennau hyfforddedig y cwrs hwn o bell gan ddefnyddio ystod o lwyfannau ar-lein a rhithwir.  Caiff lleoliadau ymarferol eu dyrannu i bob myfyriwr yn unigol ac mor agos i'w cartref â phosib. 

Beth fyddwch chi’n ei astudio ar y cwrs yma?

Mae'r gallu i astudio wrth eich pwysau gan ddefnyddio deunyddiau ac adnoddau a ddatblygwyd yn arbennig ac a ddarperir trwy gyfryngau lluosog yn rhan allweddol o ddysgu yn y rhaglen hon. Mae'n hanfodol bod gennych le i astudio gyda mynediad i'r rhyngrwyd.

Athroniaeth sylfaenol Prifysgol Bangor yw hyrwyddo caredigrwydd deallus ac arweinyddiaeth dosturiol, ac mae'r rhain yn rhan annatod o’r cwricwlwm i gyd. Mae modiwlau rhyngbroffesiynol yn hyrwyddo dull sy’n canolbwyntio ar y myfyriwr ac yn cydnabod gwerth dysgu o brofiadau'r gorffennol a'r presennol, yn ogystal â dysgu o brofiad defnyddwyr gwasanaeth a thrwy gyflwyno gwybodaeth newydd. Mae'r strategaethau dysgu, addysgu ac asesu wedi eu llunio i gynorthwyo'r myfyrwyr i fod yn ddysgwr annibynnol a datblygu i fod yn ymarferydd cofrestredig. 

Cynlluniwyd y strategaeth asesu ar draws y rhaglen i fod yn flaengar a bydd yn eich annog i ddatblygu sgiliau dadansoddi a meddwl yn feirniadol. Mae'r modiwlau'n meithrin dysgu adfyfyriol; gall dysgwyr adfyfyriol gymryd rhan mewn adfyfyrio annibynnol er mwyn cyflawni dysgu personol ac er mwyn mynd ar drywydd rhagoriaeth wrth ymarfer. Fel prifysgol sy’n rhoi pwys mawr ar ymchwil, rydym wedi ymgorffori egwyddorion a sgiliau ymchwilio ac ymholi i’r modiwlau hyn mewn modd blaengar gan alluogi'r myfyriwr i ddatblygu o ddod o hyd i dystiolaeth (blwyddyn un) i werthuso tystiolaeth (blwyddyn dau) ac yn olaf i gymhwyso tystiolaeth (blwyddyn tri). 

Yn y rhaglen nyrsio dysgu o bell, bydd addysg ryngbroffesiynol yn rhan allweddol o ddysgu ymarfer gofal iechyd; ei nod yw darparu’r wybodaeth, y sgiliau a'r agweddau sy'n angenrheidiol at ymarfer cydweithredol sy'n canolbwyntio ar y claf. Bydd y rhaglen hon yn cynnwys addysg ryngbroffesiynol sy'n ddull dysgu rhyngweithiol penodol sy'n annog cydweithredu gweithredol rhwng proffesiynau.

O ddefnyddio'r fethodoleg hon ar y rhaglen, bydd gennych y gallu i ddatblygu'r wybodaeth, y sgiliau a'r cymhwysedd angenrheidiol mewn perthynas â gwerthoedd, moeseg, swyddogaethau, cyfrifoldebau a chyfathrebu rhyngbroffesiynol. Mae addysg ryngbroffesiynol yn rhoi cyfle i chi brofi sut mae disgyblaethau eraill yn rhoi pwyslais gwahanol ar feysydd fel moeseg broffesiynol a chydweithio i ddarparu gofal cynhwysfawr i gleifion.

Pan fyddwch ar leoliad, cewch gyfleoedd i gydweithio â gweithwyr proffesiynol fel ffisiotherapyddion, radiograffwyr, bydwragedd a gweithwyr cymdeithasol. Mae Prifysgol Bangor yn datblygu modelau ar gyfer lleoliadau rhithwir o fewn safonau’r Cyngor Nyrsio a Bydwreigiaeth ac yn datblygu defnydd o rithwirionedd yn ei rhaglenni cyfredol er mwyn rhoi’r sgiliau a'r wybodaeth i fyfyrwyr fod yn ymarferwyr hyfedr mewn gweithlu rhyngbroffesiynol, o fewn canllawiau arfer gorau, ac er budd gofal cleifion yn y dyfodol.

Trwy ymroi’n llawn i’r rhaglen hon byddwch yn datblygu sgiliau mewn gofal teulu-ganolog, hybu iechyd yn effeithiol, dysgu am effeithiau a rheolaeth afiechydon acíwt a thymor hir plentyndod, asesu poen ac ymatebion seicolegol i afiechyd a dysgu technegau chwarae a dwyn sylw a llawer o dechnegau eraill. Mi wnaiff hynny eich galluogi i ddarparu gofal nyrsio plant o ansawdd uchel mewn amgylchedd sy'n newid yn gyflym.  

Ar gyfer y cwrs sy’n dechrau yn 2022 mae'r rhaglen Nyrsio Plant (Dysgu o Bell) wedi ei lunio yn unol â Safonau Hyfedredd i Nyrsys Cofrestredig 2018 y Cyngor Nyrsio a Bydwreigiaeth a Nyrs y Dyfodol: Safonau Cymhwysedd.  Mae'r rhaglen newydd yn sicrhau fod gan nyrsys well dealltwriaeth o anghenion cleifion/cleientiaid ym mhob un o'r pedwar maes ymarfer nyrsio, ond gan barhau i ganolbwyntio ar faes penodol.  Mae'r rhaglen yn darparu nyrsys cofrestredig y dyfodol gyda sgiliau gweithio mewn tîm a sgiliau arweinyddiaeth a chyda rhagor o wybodaeth am iechyd y cyhoedd, sydd ei angen i ddarparu gofal mewn gwahanol leoliadau i gefnogi iechyd a lles y bobl byddwch yn gofalu amdanynt.  

Modiwlau ar gyfer y flwyddyn academaidd gyfredol

Mae’r rhestrau modiwlau ar gyfer eich arwain yn unig ac fe allant newid. Cymerwch olwg ar yr hyn y mae ein myfyrwyr yn ei astudio ar hyn o bryd ar tudalen Modiwlau Nyrsio Plant (Dysgu o Bell) BN (Anrh).

Mae cynnwys y cwrs wedi’i nodi i’ch arwain yn unig ac fe all newid.

• Mae Blackboard, sef amgylchedd dysgu ar-lein Prifysgol Bangor, yn caniatáu i chi gyrchu cynnwys modiwl, deunydd cwrs wedi ei recordio ymlaen llaw, seminarau, byrddau trafod a mynediad at ddarlithoedd byw os oes angen. Gellir cyrchu'r cynnwys ar unrhyw adeg sy'n gyfleus i chi, ac mae modd rhyngweithio gyda myfyrwyr eraill mewn ystafell gyffredin rithwir.
• Mae ein dull o ddysgu yn eich rhoi chi yn y canol, rydym yn defnyddio llawer o wahanol lwyfannau meddalwedd - fel Teams, OneDrive a Microsoft SWAY ac ati.
• Bydd sgiliau clinigol yn cael eu cyflwyno mewn amgylchedd rhithwir deinamig a rhyngweithiol i efelychu'r profiad dysgu ymarfer a’ch galluogi i ddatblygu sgiliau clinigol. Rydym yn defnyddio meddalwedd Laerdal vSim sy'n system efelychu rhithwir ar y we fydd yn helpu i fagu eich hyder a chymhwysedd wrth ddarparu gofal i gleifion gan ei fod yn caniatáu i fyfyrwyr ryngweithio â chleifion ar-lein mewn amgylchedd diogel a realistig ac mae’n darparu adborth unigol. Rydym hefyd yn defnyddio llwyfan sgiliau clinigol ar-lein i gefnogi ein haddysgu sgiliau clinigol ac i fyfyrwyr roi arfer gorau ar waith. 
• Yn ystod y lleoliad bydd gennych gefnogaeth tiwtor cyswllt o'r brifysgol ac mae gennym hefyd hwyluswyr addysg ymarfer/hwyluswyr addysg ysbyty cymunedol sydd hefyd yn cefnogi myfyrwyr trwy gydol y lleoliad.

Byrddau iechyd ledled Cymru yw prif gyflogwr llawer o'n graddedigion. Yn y GIG a lleoliadau iechyd a gofal eraill, ceir strwythur gyrfa clir yn cefnogi nyrsys yn eu datblygiad o nyrs staff sy'n gweithio ar ward, er enghraifft, i nyrsys ymgynghorol annibynnol sy'n rheoli baich achosion o gleifion yn y gymuned.  Yn ogystal â hyn, bydd cyfleoedd i ddefnyddio eich cymwysterau dramor.

Mae nyrsio yn broffesiwn arloesol sy'n datblygu’n barhaus ac mae nyrsys yn gweithio mewn timau aml-broffesiynol mewn amryfal leoliadau iechyd a gofal. Mae nyrsys mewn sefyllfa unigryw i ddarparu gofal mewn partneriaeth â phobl a gofalwyr, i bwy bynnag sydd angen gofal. Yn gyffredinol yn y system iechyd a gofal ceir mwy o bwyslais ar atal afiechyd, galluogi pobl i ofalu am eu hunain, bod yn bartneriaid yn eu gofal a chael gwell ansawdd bywyd. Mae cyflymder y datblygiadau mewn gofal meddygol a gofal nyrsio, ac o ran triniaethau a thechnoleg, yn creu cyfleoedd gyrfa newydd i nyrsys gyda datblygiadau mewn gwahanol agweddau ar wasanaethau a gwahanol ffyrdd o weithio. Mae’r cyfleoedd gyrfaol yn amrywiol gan gynnwys swyddi staff y rheng flaen a swyddi arweinyddiaeth neu reoli, swyddi nyrsys arbenigol neu nyrsys ymgynghorol ynghyd â llu o bosibiliadau eraill hynod gyffrous. 

Mae gyrfaoedd graddedigion fel nyrsys plant yn cynnwys gweithio gyda phlant sydd â chyflyrau cymharol fach hyd at rai sydd â chyflyrau difrifol, cronig a/neu gyflyrau sy’n peryglu bywyd. Gall yr yrfa hefyd gynnwys rheoli pobl ac adnoddau, ynghyd ag ymchwilio a datblygu gwasanaethau newydd a chyfredol. 

Mae'r gwaith yn ymwneud cymaint â rhoi sicrwydd i deulu'r plentyn ag y mae â darparu gofal i'r plentyn. Yn y rhan fwyaf o achosion darperir llawer o'r gofal gan y teulu a rôl y nyrs yw gweithio gyda'r teulu i addysgu, meithrin hyder, grymuso a'u cefnogi i ofalu am eu plentyn. 

Bydd eich gradd nyrsio yn arbenigo mewn nyrsio plant. Mae sawl ysbyty plant arbenigol yn y wlad a bydd gan ymddiriedolaethau acíwt cyffredinol o leiaf un ward plant hefyd. Mae nyrsys plant hefyd yn gweithio yn yr adran achosion brys ac yng ngwasanaethau iechyd meddwl y plant a phobl ifanc. Byddai disgwyl i nyrs sydd newydd gymhwyso atgyfnerthu eu dysgu i ddechrau trwy fod yn gyfrifol am ofal grŵp o gleifion ac yna ymgymryd â swyddogaethau mwy cymhleth wrth ddatblygu'n broffesiynol. 

Mae nyrsys plant yn datrys problemau ac yn hynod sylwgar a hyblyg. Gallant adnabod a gweithredu ar fyrder os aiff plentyn yn sâl yn gyflym iawn. Maent yn eiriol dros y plentyn pryd bynnag a lle bynnag y bo angen. Mae sgiliau cyfathrebu da a sgiliau da gyda phobl yn hanfodol, ond mae angen i nyrsys plant hefyd ddangos ymwybyddiaeth emosiynol, deallusrwydd a gwytnwch.

Bydd y radd yn eich galluogi i gofrestru fel nyrs plant cymwys gyda'r Cyngor Nyrsio a Bydwreigiaeth (NMC), ar ôl datblygu'r wybodaeth, y sgiliau a'r agweddau sydd eu hangen i helpu cynllunio, cydlynu a darparu gofal yn ddiogel, yn dosturiol ac yn effeithiol.

Cyfleoedd ym Mangor

Mae Gwasanaeth Sgiliau a Chyflogadwyedd y Brifysgol yn cynnig amryw o adnoddau i’ch helpu i gyflawni eich amcanion ar ôl graddio.

Rhaglen Interniaeth Prifysgol Bangor

Mae Prifysgol Bangor yn cynnal cynllun interniaeth â thâl yn adrannau academaidd a gwasanaethau’r Brifysgol.

Gwirfoddoli

Mae gwirfoddoli yn ehangu eich profiadau ac yn gwella eich cyflogadwyedd. Cewch fwy o wybodaeth am wirfoddoli ar wefan Undeb y Myfyrwyr.

Gweithio tra'n astudio

Mae TARGETconnect yn hysbysebu swyddi lleol, cenedlaethol a rhyngwladol i raddedigion, cyfleodd profiad gwaith ac interniaethau a chyfleon gwirfoddol.

Adroddiad Cyflawniad Addysg Uwch (HEAR)

Ceir pob myfyriwr sy’n graddio adroddiad terfynol HEAR. Mae’r adroddiad yn rhestru holl gyflawniadau academaidd ac allgyrsiol fel bod darpar gyflogwyr yn ymwybodol o’r sgiliau ychwanegol rydych wedi eu hennill tra yn y Brifysgol.