Bioleg gyda Biotechnoleg BSc (Anrh) Israddedig - Mynediad: Medi 2025/26*

Mae biotechnoleg wedi cael effaith sylweddol ar fywyd y ddynoliaeth - mae’n ein galluogi i fanteisio ar allu eplesol micro-organebau i gynhyrchu cynhyrchion bwyd megis bara, caws, cwrw a gwin. Mae biotechnoleg yn cynnig cynhyrchion a thechnolegau arloesol i frwydro yn erbyn afiechydon, lleihau ein heffaith ar yr amgylchedd, darparu ynni glanach, a chynhyrchu prosesau diwydiannol glanach a mwy diogel ac effeithlon. Bydd y radd hon yn eich grymuso i fynd i'r afael â materion byd-eang mewn modd arloesol i gynnig gwellhad, tanwydd a bwyd i’r byd.

Mae biotechnoleg yn ymwneud â chymhwyso prosesau biolegol i wella ansawdd bywyd ac iechyd ein planed. Gwneir hyn trwy ddefnydd arloesol o brosesau cellog a moleciwlaidd i ddatblygu technolegau a chynhyrchion buddiol. 

Yn hanesyddol, mawr fu effaith biotechnoleg ar fywyd dynoliaeth. Bu'r biotechnolegwyr cynharaf yn defnyddio gallu eplesol micro-organebau i gynhyrchu bwyd fel bara, caws, cwrw a gwin. Yn y byd sydd ohoni mae biotechnoleg fodern yn cynnig cynhyrchion a thechnolegau arloesol i frwydro yn erbyn afiechydon, lleihau ein heffaith ar yr amgylchedd, bwydo'r newynog, lleihau'r angen am ynni, darparu ynni glanach, a chynhyrchu prosesau diwydiannol diogelach, glanach a mwy effeithlon.  Bydd y radd hon yn eich grymuso chi, gwyddonydd y genhedlaeth nesaf i ymdrin â phroblemau byd-eang er mwyn gwella, cyflenwi a bwydo'r byd. 

Cewch hyfforddiant sy'n ymdrin ag agweddau esblygiadol, ecolegol, amgylcheddol, moleciwlaidd a cellog bioleg, a chyfle i ddilyn agweddau cymhwysol ar fioleg yn ogystal â dysgu am brosesau a mecanweithiau sylfaenol. Mae ymchwil a gydnabyddir yn rhyngwladol yn sail i’n haddysgu. Mae ein staff academaidd yn arbenigwyr mewn ymchwil biotechnoleg, o nifer o ddisgyblaethau biolegol sy'n ymwneud â microbioleg feddygol ac amgylcheddol, bioleg planhigion, bioamrywiaeth a geneteg, a bioleg celloedd a genomau. Rydym hefyd yn darparu amrywiaeth o brofiad ymarferol, profiad labordy a phrofiad maes, fel y gallwch ennill sgiliau trosglwyddadwy (dadansoddi data, gwaith grŵp, sgiliau ysgrifennu a chyflwyno, sgiliau TG). Rydym yn gwneud defnydd helaeth o'n hamgylchedd lleol, mae gennym amrywiaeth eithriadol o gynefinoedd daearol a dyfrol lleol ar garreg ein drws, ac rydym yn eu defnyddio ar gyfer cyrsiau maes a dosbarthiadau ymarferol. Mae gennym ein gerddi botaneg ein hunain gyda chynefinoedd amrywiol ar gyfer astudiaethau biolegol. Rydym hefyd yn rhan o Ganolfan yr Amgylchedd Cymru, sydd yn fenter bartneriaeth rhwng Prifysgol Bangor a Chanolfan Ecoleg a Hydroleg (CEH) Cyngor Ymchwil yr Amgylchedd Naturiol. 

Pam dewis Prifysgol Bangor ar gyfer y cwrs hwn?     

• Mae'r cyflwynydd teledu Steve Backshall bellach yn rhan o'n tîm addysgu.
• Mae ein cyfleusterau yn cynnwys dau labordy ymchwil microbioleg gyda'r offer diweddaraf sy’n cynnwys y Ganolfan Biotechnoleg Amgylcheddol, y buddsoddwyd miliynau o bunnau yn ei datblygu; gardd fotaneg; amgueddfa byd natur sy'n cynnwys casgliad cynhwysfawr o ddeunydd infertebratau a fertebratau; ac acwaria môr a dŵr croyw helaeth. 
• Mae ein lleoliad yn darparu gwahanol fathau o bridd, hinsawdd a thopograffeg, ac amrywiaeth o gynefinoedd, pob un o fewn cyrraedd hwylus ar gyfer astudiaethau maes.

Opsiynau Cwrs Ychwanegol

Bydd gofyn i chi ddilyn 120 o gredydau’r flwyddyn fydd yn cynnwys darlithoedd, sesiynau ymarferol ac ymarferion rhyngweithiol, yn ogystal â chyrsiau maes a thiwtorialau ym mlwyddyn 1 a 2.  Mae'r flwyddyn olaf yn cynnwys project traethawd hir, dan oruchwyliaeth aelod staff. Mae’r modiwlau’n fwy arbenigol wrth i chi fynd trwy’r radd a nifer y modiwlau gorfodol yn amrywio o’r naill flwyddyn i’r llall.  Asesir trwy gyfuniad o arholiadau ffurfiol ac asesu parhaus. Mae modiwlau cyfrwng Cymraeg ar gael hefyd. 

Rhoddir nifer y credydau mewn cromfachau ar ôl enw pob modiwl.  Bydd rhai modiwlau yn cynnwys darlithoedd, sesiynau ymarferol ac ymarferion rhyngweithiol. Mae graddau biotechnoleg yn cyfuno amrywiaeth eang o fodiwlau dewisol (tebyg i'r rhai sydd ar gael i fiolegwyr) â chynnwys biotechnoleg arbenigol, yn enwedig ym mlwyddyn 3. 

Modiwlau ar gyfer y flwyddyn academaidd gyfredol

Mae’r rhestrau modiwlau ar gyfer eich arwain yn unig ac fe allant newid. Cymerwch olwg ar yr hyn y mae ein myfyrwyr yn ei astudio ar hyn o bryd ar tudalen Modiwlau Bioleg gyda Biotechnoleg BSc (Anrh).

Mae cynnwys y cwrs wedi’i nodi i’ch arwain yn unig ac fe all newid.

Mae ein cyfleusterau rhagorol yn cynnwys y canlynol: 

• Gardd fotaneg, sy'n cynnig cyfleoedd i wneud projectau ecolegol, gwaith maes a gwirfoddoli; 

• Amgueddfa Hanes Naturiol ein hunain sy'n cynnwys casgliad cynhwysfawr o ddeunydd infertebratau a fertebratau, sbesimenau daearegol a phlanhigion; 

• acwaria morol a dŵr croyw helaeth; 

• Labordy Robert Edwards i ddysgu bioleg celloedd a bioleg foleciwlaidd; 

• labordai gwyddonol sy’n ymdrin ag amrywiol agweddau ar fioleg o ffisioleg i esblygiad a datblygiad, gan gynnig projectau amrywiol i fyfyrwyr y drydedd flwyddyn; 

• mynediad i fyfyrwyr project i gyfleusterau yng Nghanolfan yr Amgylchedd Cymru a'r Ganolfan Biotechnoleg Amgylcheddol; 

Costau Cyffredinol yn y Brifysgol

Myfyrwyr Cartref (DU)

• Cost cwrs israddedig llawn-amser yw £9,250 y flwyddyn (2025/26).
• Y ffi ar gyfer pob blwyddyn dramor integredig yw £1,385 (2025/26).
• Y ffi ar gyfer blwyddyn mewn diwydiant integredig fel rhan o'r cwrs yw £1,850 (2025/26).

Mwy o wybodaeth am ffioedd a chyllid i fyfyrwyr Cartref (DU).

Myfyrwyr Rhyngwladol (yn cynnwys yr UE)

• Ffioedd Dysgu Myfyrwyr Rhyngwladol
• Costau Byw ac Ysgoloriaethau Myfyrwyr Rhyngwladol

Costau Ychwanegol
Mae yna hefyd rai costau ychwanegol cyffredin sy'n debygol o godi i fyfyrwyr ar bob cwrs, er enghraifft:

• Os dewiswch chi astudio dramor neu gymryd y Flwyddyn Profiad Rhyngwladol fel rhan o'ch cwrs.
• Os ydych chi'n mynd i'ch Seremoni Raddio, bydd cost llogi gŵn (£25- £75) a chost am docynnau i westeion ychwanegol (tua £12 yr un).

Costau ychwanegol cwrs-benodol

Yn dibynnu ar y cwrs rydych chi'n ei astudio, efallai y bydd costau ychwanegol cwrs-benodol y bydd gofyn i chi eu talu. Gellir rhoi'r costau hyn mewn tri chategori:

1. Costau Gorfodol: mae'r rhain yn gysylltiedig â modiwl craidd neu orfodol penodol y mae'n ofynnol i chi ei gwblhau i gwblhau eich cymhwyster e.e. teithiau maes gorfodol, gwisgoedd i fyfyrwyr ar leoliad, gwiriad gan y Gwasanaeth Datgelu a Gwahardd (DBS).
2. Costau Angenrheidiol: efallai na fydd pob myfyriwr yn cael y costau hyn, a bydd yn amrywio yn dibynnu ar y cwrs e.e. aelodaeth o gorff proffesiynol, teithio i leoliadau, meddalwedd arbenigol, cyfarpar diogelu personol.
3. Costau Dewisol: mae'r rhain yn dibynnu ar eich dewis o fodiwlau neu weithgaredd, ac fe'u dangosir er mwyn rhoi syniad ichi o'r costau dewisol a allai godi i sicrhau bod cymaint o wybodaeth â phosibl ar gael i chi cyn i chi wneud eich dewis. Gall y rhain gynnwys digwyddiadau graddio ar gyfer eich cwrs, teithiau maes dewisol, tripiau Wythnos Groeso.

Gofynion Cyffredinol y Brifysgol

I astudio cwrs gradd mae’n rhaid i chi gael isafswm o bwyntiau tariff UCAS. Am eglurhad manwl o bwyntiau tariff UCAS, ewch i www.ucas.com.

Rydym yn derbyn myfyrwyr â phob math o gymwysterau a chefndiroedd ac yn ystyried pob cais yn unigol.

Mae’n rhaid i bob ymgeisydd gael sgiliau sylfaenol da ond mae’r Brifysgol hefyd yn gweld pwysigrwydd sgiliau cyfathrebu a thechnoleg gwybodaeth. 

Mae’n bolisi gan y Brifysgol i ystyried ceisiadau gan ddarpar fyfyrwyr anabl yn yr un modd â; phob cais arall.

Rydym yn ystyried ceisiadau gan fyfyrwyr hŷn sy’n medru dangos fod ganddynt y gallu a’r ymrwymiad i astudio rhaglen prifysgol. Bob blwyddyn rydym yn cofrestru nifer sylweddol o fyfyrwyr hŷn. Am fwy o wybodaeth am astudio fel myfyriwr aeddfed, ewch i adran Astudio ym Mangor.  

Fel rhywun sydd wedi graddio o’r cwrs hwn, byddwch yn meddu ar gyfoeth o sgiliau a gwybodaeth a fydd yn berthnasol i lawer o sectorau cyflogaeth gan gynnwys labordai ysbytai, sefydliadau ymchwil, cyrff ymgynghorol amlddisgyblaethol, cwmnïau diwydiannol, elusennau ymchwil, adrannau ac asiantaethau'r llywodraeth, sefydliadau addysgol, cynghorau ymchwil a'r sector preifat. 

Cyfleoedd ym Mangor

Mae Gwasanaeth Sgiliau a Chyflogadwyedd y Brifysgol yn cynnig amryw o adnoddau i’ch helpu i gyflawni eich amcanion ar ôl graddio.

Rhaglen Interniaeth Prifysgol Bangor

Mae Prifysgol Bangor yn cynnal cynllun interniaeth â thâl yn adrannau academaidd a gwasanaethau’r Brifysgol.

Gwirfoddoli

Mae gwirfoddoli yn ehangu eich profiadau ac yn gwella eich cyflogadwyedd. Cewch fwy o wybodaeth am wirfoddoli ar wefan Undeb y Myfyrwyr.

Gweithio tra'n astudio

Mae TARGETconnect yn hysbysebu swyddi lleol, cenedlaethol a rhyngwladol i raddedigion, cyfleodd profiad gwaith ac interniaethau a chyfleon gwirfoddol.

Adroddiad Cyflawniad Addysg Uwch (HEAR)

Ceir pob myfyriwr sy’n graddio adroddiad terfynol HEAR. Mae’r adroddiad yn rhestru holl gyflawniadau academaidd ac allgyrsiol fel bod darpar gyflogwyr yn ymwybodol o’r sgiliau ychwanegol rydych wedi eu hennill tra yn y Brifysgol.

Mae opsiwn 'gyda Blwyddyn Sylfaen' ar gael ar gyfer y cwrs hwn. Gwnewch gais am Bioleg (gyda Blwyddyn Sylfaen).