Eigioneg Ddaearegol MSci Israddedig - Mynediad: Medi 2025/26*

Mae'r radd hon yn canolbwyntio ar swyddogaeth gwaddodion morol a'r cefnforoedd yn Systemau'r Ddaear i ddeall a dehongli amgylcheddau'r gorffennol, y presennol a'r dyfodol. Byddwch yn astudio prosesau gwaddodol (tarddiad, cludiad a dyddodiad gronynnau yn yr amgylchedd morol), gwaddodion morol a chreigiau. Canolbwyntiwn  ar swyddogaethau'r moroedd bas, sy'n amgylchynu'r cyfandiroedd, a'r rhyngweithio sy'n digwydd lle mae'r tir a'r môr yn cwrdd.

Yn debyg i’r radd BSc gysylltiedig, mae'r radd bedair blynedd hon yn canolbwyntio ar astudio gwaddodion môr yng nghyd-destun gwyddoniaeth system y Ddaear. Byddwch yn dysgu am brosesau gwaddodol, tarddiad, cludiad a dyddodiad gronynnau yn amgylchedd y môr a gwaddodion a chreigiau môr, yn enwedig y rhai a ffurfiwyd yn ystod y 2 filiwn o flynyddoedd diwethaf, ond hefyd ymhellach yn ôl mewn amser. Mae'r radd MSci hon yn wahanol i’r cwrs BSc am ei bod yn rhoi pwyslais ar ddysgu sgiliau a gwybodaeth sy'n uniongyrchol berthnasol i faes mesur gwely'r môr a'r diwydiant hydrocarbon alltraeth.

Mae angen Eigionegwyr Daearegol i roi sylw i faterion megis archwilio safleoedd alltraeth mewn perthynas ag isadeiledd ynni adnewyddadwy a chwilio am olew a nwy, newid yn yr hinsawdd ac yn lefel y môr, ac erydu arfordirol. Mae'r rhain yn feysydd datblygu heriol a phrysur; ar hyn o bryd mae diffyg pobl â chymwysterau addas i wneud swyddi o'r fath. Ar ôl graddio, nid yn unig bydd gennych ddealltwriaeth drylwyr o 'systemau daear', ond bydd gennych hefyd ystod eang o sgiliau ymarferol mewn gwaddodeg, geoffiseg a geotechneg. Mae'r sgiliau integreiddio data yr ydym yn eu haddysgu ar y radd hon yn brin yn y diwydiant alltraeth, mae hyn yn golygu y bydd gennych gyfle da o gael swydd ragorol ar ôl i chi raddio.

Rydym yn un o'r canolfannau prifysgol mwyaf sy'n dysgu gwyddor y môr yn y Deyrnas Unedig ac yn un o'r mwyaf yn Ewrop. 

Mae gan y daearegwyr ar ein staff arbenigedd yn y meysydd pwnc perthnasol ac mae gennym gysylltiadau cryf â'r diwydiant alltraeth a hydrocarbon.
Rydym yn unigryw yn y Deyrnas Unedig o ran cynnig gwaddodeg / geoffiseg / geotechneg fel cyfuniad o feysydd pwnc - ac mae gan yr Ysgol Gwyddorau Eigion enw da iawn ymysg gweithwyr proffesiynol am ddarparu gweithwyr o ansawdd uchel i'r sector alltraeth.

Pam dewis Prifysgol Bangor ar gyfer y cwrs?     

• Mae ein harbenigedd yn ymdrin â phob agwedd ar wyddorau'r môr, ac mae gennym gryfderau penodol mewn eigioneg ffisegol a'r geowyddorau. Mae gwaith maes lleol yn digwydd yn ngeobarc GeoMôn sy'n ddynodedig gan UNESCO, Parc Cenedlaethol Eryri, Afon Menai a Môr Iwerddon.
• Ymhlith y cyfleusterau mae llong ymchwil, uwchgyfrifiaduron ac offer arolygu o'r radd flaenaf ac angorfeydd eigioneg ar gyfer casglu data.
• Ymhlith ein cysylltiadau byd-eang mae'r Ganolfan Eigioneg Genedlaethol,  Y Swyddfa Dywydd, a'r diwydiannau alltraeth, hydrocarbon a diwydiannau adnewyddadwy'r môr. 
• Mae'r radd hon yn rhoi pwyslais ar ennill sgiliau a gwybodaeth a fydd yn ddefnyddiol i ddiwydiant. 

Opsiynau Cwrs Ychwanegol

Mae'r cwrs hwn yn cynnwys hyd at 25-35 awr yr wythnos o ddarlithoedd, sesiynau ymarferol gwaith labordy a gwaith maes, astudiaeth breifat, tiwtorialau a gwaith project. Byddwch hefyd yn cwblhau adolygiadau o lenyddiaeth, ymarferion, traethodau, adroddiadau am waith ymarferol a gwaith maes ac yn gwneud eich ymchwil eich hun.

Yn y flwyddyn olaf byddwch yn gweithio ar broject ymchwil ymarferol trwy gydol y ddau semester. Mae gwaith ymarferol yn elfen bwysig ac mae'n cynnwys gwibdeithiau dydd am ddim yn ogystal â'r cwrs maes preswyl yn Ne Cymru.

Yn y drydedd flwyddyn a'r flwyddyn olaf, cewch wahoddiad i gyfres o ddarlithoedd gwadd, ac yn aml i gyfweliadau â darpar gyflogwyr; a chael cynnig i ymweld â gwahanol gyfarfodydd diwydiant cenedlaethol (e.e. eigioneg, busnes cefnfor).

Modiwlau ar gyfer y flwyddyn academaidd gyfredol

Mae’r rhestrau modiwlau ar gyfer eich arwain yn unig ac fe allant newid. Cymerwch olwg ar yr hyn y mae ein myfyrwyr yn ei astudio ar hyn o bryd ar tudalen Modiwlau Eigioneg Ddaearegol MSci.

Mae cynnwys y cwrs wedi’i nodi i’ch arwain yn unig ac fe all newid.

Costau Cyffredinol yn y Brifysgol

Myfyrwyr Cartref (DU)

• Cost cwrs israddedig llawn-amser yw £9,250 y flwyddyn (2025/26).
• Y ffi ar gyfer pob blwyddyn dramor integredig yw £1,385 (2025/26).
• Y ffi ar gyfer blwyddyn mewn diwydiant integredig fel rhan o'r cwrs yw £1,850 (2025/26).

Mwy o wybodaeth am ffioedd a chyllid i fyfyrwyr Cartref (DU).

Myfyrwyr Rhyngwladol (yn cynnwys yr UE)

• Ffioedd Dysgu Myfyrwyr Rhyngwladol
• Costau Byw ac Ysgoloriaethau Myfyrwyr Rhyngwladol

Costau Ychwanegol
Mae yna hefyd rai costau ychwanegol cyffredin sy'n debygol o godi i fyfyrwyr ar bob cwrs, er enghraifft:

• Os dewiswch chi astudio dramor neu gymryd y Flwyddyn Profiad Rhyngwladol fel rhan o'ch cwrs.
• Os ydych chi'n mynd i'ch Seremoni Raddio, bydd cost llogi gŵn (£25- £75) a chost am docynnau i westeion ychwanegol (tua £12 yr un).

Costau ychwanegol cwrs-benodol

Yn dibynnu ar y cwrs rydych chi'n ei astudio, efallai y bydd costau ychwanegol cwrs-benodol y bydd gofyn i chi eu talu. Gellir rhoi'r costau hyn mewn tri chategori:

1. Costau Gorfodol: mae'r rhain yn gysylltiedig â modiwl craidd neu orfodol penodol y mae'n ofynnol i chi ei gwblhau i gwblhau eich cymhwyster e.e. teithiau maes gorfodol, gwisgoedd i fyfyrwyr ar leoliad, gwiriad gan y Gwasanaeth Datgelu a Gwahardd (DBS).
2. Costau Angenrheidiol: efallai na fydd pob myfyriwr yn cael y costau hyn, a bydd yn amrywio yn dibynnu ar y cwrs e.e. aelodaeth o gorff proffesiynol, teithio i leoliadau, meddalwedd arbenigol, cyfarpar diogelu personol.
3. Costau Dewisol: mae'r rhain yn dibynnu ar eich dewis o fodiwlau neu weithgaredd, ac fe'u dangosir er mwyn rhoi syniad ichi o'r costau dewisol a allai godi i sicrhau bod cymaint o wybodaeth â phosibl ar gael i chi cyn i chi wneud eich dewis. Gall y rhain gynnwys digwyddiadau graddio ar gyfer eich cwrs, teithiau maes dewisol, tripiau Wythnos Groeso.

Gofynion Cyffredinol y Brifysgol

I astudio cwrs gradd mae’n rhaid i chi gael isafswm o bwyntiau tariff UCAS. Am eglurhad manwl o bwyntiau tariff UCAS, ewch i www.ucas.com.

Rydym yn derbyn myfyrwyr â phob math o gymwysterau a chefndiroedd ac yn ystyried pob cais yn unigol.

Mae’n rhaid i bob ymgeisydd gael sgiliau sylfaenol da ond mae’r Brifysgol hefyd yn gweld pwysigrwydd sgiliau cyfathrebu a thechnoleg gwybodaeth. 

Mae’n bolisi gan y Brifysgol i ystyried ceisiadau gan ddarpar fyfyrwyr anabl yn yr un modd â; phob cais arall.

Rydym yn ystyried ceisiadau gan fyfyrwyr hŷn sy’n medru dangos fod ganddynt y gallu a’r ymrwymiad i astudio rhaglen prifysgol. Bob blwyddyn rydym yn cofrestru nifer sylweddol o fyfyrwyr hŷn. Am fwy o wybodaeth am astudio fel myfyriwr aeddfed, ewch i adran Astudio ym Mangor.  

Mae'r cwrs hwn yn baratoad delfrydol ar gyfer gyrfaoedd yn ymchwilio i safleoedd alltraeth cysylltiedig ag isadeiledd ynni adnewyddadwy a’r diwydiant alltraeth, ymchwil, asesu effaith amgylcheddol, y diwydiant cyflenwi dŵr, rheoli parthau arfordirol, cyrff cynghori'r llywodraeth a'r cyfryngau gwyddonol. 

Cyfleoedd ym Mangor

Mae Gwasanaeth Sgiliau a Chyflogadwyedd y Brifysgol yn cynnig amryw o adnoddau i’ch helpu i gyflawni eich amcanion ar ôl graddio.

Rhaglen Interniaeth Prifysgol Bangor

Mae Prifysgol Bangor yn cynnal cynllun interniaeth â thâl yn adrannau academaidd a gwasanaethau’r Brifysgol.

Gwirfoddoli

Mae gwirfoddoli yn ehangu eich profiadau ac yn gwella eich cyflogadwyedd. Cewch fwy o wybodaeth am wirfoddoli ar wefan Undeb y Myfyrwyr.

Gweithio tra'n astudio

Mae TARGETconnect yn hysbysebu swyddi lleol, cenedlaethol a rhyngwladol i raddedigion, cyfleodd profiad gwaith ac interniaethau a chyfleon gwirfoddol.

Adroddiad Cyflawniad Addysg Uwch (HEAR)

Ceir pob myfyriwr sy’n graddio adroddiad terfynol HEAR. Mae’r adroddiad yn rhestru holl gyflawniadau academaidd ac allgyrsiol fel bod darpar gyflogwyr yn ymwybodol o’r sgiliau ychwanegol rydych wedi eu hennill tra yn y Brifysgol.

Mae opsiwn 'gyda Blwyddyn Sylfaen' ar gael ar gyfer y cwrs hwn. Gwnewch gais am Eigioneg Ddaearegol (gyda Blwyddyn Sylfaen).