Gwyddorau'r Amgylchedd MEnvSci Israddedig - Mynediad: Medi 2025/26*

Mae ar ddiwydiant, llywodraeth a chymdeithas angen gwyddonwyr amgylcheddol yn fwy nag erioed. Mae'r radd hon yn dwyn gwybodaeth ynghyd o ystod eang o bynciau i archwilio’r materion amgylcheddol pwysicaf, megis newid hinsawdd, llygredd, ynni adnewyddadwy a diogelu'r cyflenwad bwyd. Mae'r radd yn cynnwys bioleg (sy'n rhoi dealltwriaeth i chi o organebau, eu hamgylcheddau a'u cymunedau), cemeg (sy'n rhoi dealltwriaeth i chi o nifer o brosesau amgylcheddol naturiol a llygredd), gwyddorau daear (sy'n rhoi cefndir i chi mewn prosesau byd-eang) a rheoli adnoddau tir a dŵr. Mae'r cyfuniad yma o feysydd pwnc, ynghyd â nifer fawr o sesiynau ymarferol a theithiau maes, yn creu gradd sy'n hynod o ddiddorol ac yn werth chweil.

Os dewiswch ddilyn y radd MEnvSci 4 blynedd hon, mae Blynyddoedd 1 a 2 yr un fath â'r radd BSc; ond ni fyddwch yn ymgymryd â phroject anrhydedd ym Mlwyddyn 3, byddwch yn hytrach yn dewis mwy o fodiwlau dewisol. Byddwch yn cwblhau project ymchwil annibynnol ar lefel Meistr ar bwnc o'ch dewis. Byddwch ar leoliad gwaith am o leiaf 4 wythnos mewn lleoliad o'ch dewis. Byddwch hefyd yn ymgymryd â modiwlau sy'n canolbwyntio ar bwysigrwydd cynaliadwyedd amgylcheddol ar gyfer busnes modern a rheolaeth amgylcheddol strategol, a fydd yn eich arfogi â sgiliau a gydnabyddir yn broffesiynol.

Ni fu erioed amser gwell i astudio ein gradd Gwyddorau’r Amgylchedd. Mae'r byd yn wynebu materion amgylcheddol hynod bwysig, a bydd yr angen i ddatrys y rhain yn dod â chyfleoedd sylweddol, yn ogystal â heriau.  Bydd cwblhau'r radd hon yn rhoi cymhwyster Meistr lefel uchel i chi yn y pwnc hwn, a fydd yn eich rhoi mewn grŵp dethol iawn o bobl.   

Mae Gwyddorau’r Amgylchedd yn dod â nifer o ddisgyblaethau ynghyd i edrych ar y materion amgylcheddol hyn mewn ffordd gynhwysfawr, ac yn archwilio sut y gellir dod â thechnoleg, ymchwil, newid ymddygiad, rheoliadau a dull gwyddonol cadarn ynghyd i gael hyd i atebion.   

Mae'r radd hon yn cynnwys bioleg (gan roi dealltwriaeth i chi o organebau, eu hamgylcheddau, a'u cymunedau), cemeg (gan ddarparu dealltwriaeth o lawer o brosesau amgylcheddol naturiol a llygredd), gwyddor daear (gan roi cefndir i chi mewn prosesau byd-eang), a  rheoli adnoddau tir a dŵr.  Mae cyfuno'r meysydd pwnc hyn, ynghyd â llawer o sesiynau ymarferol a theithiau maes, yn creu gradd sy'n hynod ddiddorol ac yn werth chweil. 

Mae Bangor yn un o'r prifysgolion sydd yn y lleoliad gorau i chi astudio Gwyddorau’r Amgylchedd. Mae gennym fynediad i amrywiaeth eang o amgylcheddau naturiol yn amrywio o'r arfordir i dirwedd amrywiol Parc Cenedlaethol Eryri gyda’i hanes hir o ddefnyddio’r tir at wahanol ddibenion, gan gynnwys mwyngloddio a chwarela. Mae teithiau maes yn ganolog trwy gydol y radd hon. Yn ogystal â theithiau lleol, mae gennym deithiau preswyl ymhellach i ffwrdd.  

Mae gennym gysylltiadau agos â sefydliadau lleol, cenedlaethol a rhyngwladol sy'n cyflogi gwyddonwyr amgylcheddol ac yn sicrhau bod ein gradd yn berthnasol ac yn gyfredol. 

Caiff y radd hon ei hachredu gan Sefydliad Gwyddorau’r Amgylchedd (Institution of Environmental Sciences (IES)) .  Bydd hyn yn gwella’ch  cyflogadwyedd a byddwch yn derbyn nifer o fuddion, megis cylchlythyr misol a chylchgrawn gyda chyfleoedd i gyhoeddi erthyglau mewn rhifynnau cyfredol, newyddion am swyddi, a mynediad am ddim neu am bris gostyngedig i ddigwyddiadau perthnasol. Dyma hefyd y cam cyntaf ar lwybr i yrfa amgylcheddol a allai fynd â chi i Statws Siartredig.  

Pam dewis Prifysgol Bangor ar gyfer y cwrs?

• Mae'r cyflwynydd teledu Steve Backshall bellach yn rhan o'n tîm addysgu.
• Mae llawer o'n staff wedi derbyn gwobrau i gydnabod eu cyfraniadau at addysgu a chefnogaeth fugeiliol  
• Mae'r radd hon yn tynnu ar ein cryfderau mewn gwyddorau biolegol, gwyddorau'r eigion a chemeg. 
• Mae ein lleoliad yn golygu bod Bangor yn lle delfrydol i astudio gwyddorau'r amgylchedd gan fod gennym labordy naturiol ar garreg ein drws. O'r arfordir i dirwedd amrywiol Parc Cenedlaethol Eryri â'i hanes hir o ddulliau lluosog o ddefnyddio’r tir, mwyngloddio a chwarela.
• Mae teithiau maes yn elfen allweddol o'r radd hon.
• Mae nifer o staff wedi derbyn cydnabyddiaeth trwy amrywiol wobrau am eu brwdfrydedd a'u harbenigedd mewn addysgu.

Opsiynau Cwrs Ychwanegol

Mae ein hamrywiaeth eang o ddulliau addysgu yn cynnwys darlithoedd, sesiynau ymarferol, gwaith maes, seminarau a thiwtorialau. Rhyngddynt, maent yn rhoi'r sgiliau damcaniaethol ac ymarferol y mae cyflogwyr yn chwilio amdanynt mewn Gwyddonwyr Amgylcheddol graddedig. Byddwch yn gorffen y radd gyda dealltwriaeth ddofn o'r maes pwnc, ac yn gallu dod â gwybodaeth berthnasol ynghyd o amrywiaeth o wahanol ddisgyblaethau i fynd i'r afael â materion amgylcheddol ac archwilio enillion amgylcheddol. Rydym yn integreiddio'r canfyddiadau diweddaraf o'n hymchwil ein hunain ac ymchwil eraill i'r cwrs, yn ogystal â'r diweddaraf o bolisi a deddfwriaeth; gan sicrhau bod eich cwrs bob amser yn ffres ac yn gyfredol. Trwy gydol y radd, mae'r awyrgylch hamddenol ac anffurfiol hefyd yn annog trafodaeth fywiog ar faterion amgylcheddol cyfredol fel y byddwch chi a'ch cyfoedion yn cymryd rhan lawn yn y dysgu.  

Byddwch yn astudio 120 credyd ym mhob blwyddyn, trwy amrywiaeth o fodiwlau. Mae rhai modiwlau’n orfodol, mae rhai eraill yn ddewisol, gan eich galluogi i ymestyn eich astudiaethau i feysydd newydd neu ddatblygu arbenigeddau sydd o ddiddordeb arbennig i chi.  

Caiff cyrsiau eu hasesu gan ddefnyddio amrywiaeth o ddulliau ac ar gyfartaledd mae'r rhaniad yn 60% gwaith cwrs a 40% arholiad. Yn y flwyddyn olaf, gwneir yr asesu bron yn gyfan gwbl trwy waith cwrs. Rydym yn datblygu eich sgiliau mewn meysydd hanfodol fel cyflwyniadau, ysgrifennu adroddiadau a chyfweliadau; gan helpu i'ch paratoi ar gyfer cyflogaeth. Rydym yn gwahodd siaradwyr gwadd yn rheolaidd i roi darlithoedd, a byddwch hefyd yn cwrdd â darpar gyflogwyr yn ystod teithiau maes.  

Beth fyddwch chi’n ei astudio ar y cwrs yma?

Blwyddyn 1 a 2 

Yn ystod yr amser hwn, byddwch yn dod i ddeall sylfeini Gwyddorau’r Amgylchedd a dyfnhau eich dealltwriaeth o'r pwnc. Bydd amrywiaeth o fodiwlau diddorol a chyffrous yn dod â'r pwnc gwych hwn yn fyw i chi! Byddwch yn gweld ac yn clywed o lygad y ffynnon am brojectau ymchwil gyda’r gorau yn y byd sy'n cael eu cynnal yn ein hysgol wrth i ni integreiddio ymchwil i'n haddysgu.  

Blwyddyn 3 

Yn ogystal â'r modiwlau gorfodol, mae yna amrywiaeth eang iawn o fodiwlau dewisol i chi eu dewis, gan sicrhau bod y radd yn bersonol i chi. Bydd y rhain yn gwella'ch set sgiliau a'ch gwybodaeth fel Gwyddonydd Amgylcheddol uchelgeisiol.  

Mae'r opsiynau'n cynnwys cwrs maes i Tenerife, lle rydym yn astudio'r nifer o wahanol bwysau amgylcheddol sy'n wynebu'r ynys, a sut y gellir eu lliniaru. 

Blwyddyn 4  

Yn eich blwyddyn olaf, byddwch yn cwblhau project ymchwil annibynnol ar lefel Meistr ar bwnc o'ch dewis, gan roi'r cyfle i chi ddangos eich potensial wrth gyflawn darn o waith o safon, i lefel uchel. Byddwch ar leoliad gwaith perthnasol am o leiaf 4 wythnos mewn lleoliad o'ch dewis, unrhyw le yn y byd. Byddwch hefyd yn gwneud modiwlau sy'n canolbwyntio ar bwysigrwydd cynaliadwyedd amgylcheddol ar gyfer busnes modern a Rheolaeth Amgylcheddol Strategol, fel eich bod yn meithrin sgiliau a gydnabyddir yn broffesiynol. 

Modiwlau ar gyfer y flwyddyn academaidd gyfredol

Mae’r rhestrau modiwlau ar gyfer eich arwain yn unig ac fe allant newid. Cymerwch olwg ar yr hyn y mae ein myfyrwyr yn ei astudio ar hyn o bryd ar tudalen Modiwlau Gwyddorau'r Amgylchedd MEnvSci.

Mae cynnwys y cwrs wedi’i nodi i’ch arwain yn unig ac fe all newid.

Bydd gennych fynediad i gyfleusterau gwych i gefnogi'ch dysgu: 

• Ein fferm brifysgol ein hunain, Canolfan Ymchwil Henfaes, lle rydym yn cynnal teithiau maes, a gallwch gynnal eich arbrawf ar raddfa fawr eich hun ar gyfer eich project. 

• Labordai pwrpasol wedi'u hadnewyddu ar gyfer addysgu ac ymchwil 

• Amrywiaeth fawr iawn o offer dadansoddol, fel y gallwch ddysgu sut i ddadansoddi samplau amgylcheddol yn y maes ac yn y labordy 

• Ein casgliad daeareg ein hunain - sydd gyda’r gorau yn y wlad  

• Labordai cyfrifiadurol i ddatblygu eich sgiliau mewn meysydd allweddol fel mapio digidol a modelu amgylcheddol.

• Un o'n cyfleusterau gorau yw'r amgylchedd sydd ar garreg ein drws - cewch gyfle i ymweld â chymaint o wahanol leoedd ar ein teithiau maes, a fydd yn cadarnhau eich dysgu a'ch dealltwriaeth o bynciau   

Costau Cyffredinol yn y Brifysgol

Myfyrwyr Cartref (DU)

• Cost cwrs israddedig llawn-amser yw £9,250 y flwyddyn (2025/26).
• Y ffi ar gyfer pob blwyddyn dramor integredig yw £1,385 (2025/26).
• Y ffi ar gyfer blwyddyn mewn diwydiant integredig fel rhan o'r cwrs yw £1,850 (2025/26).

Mwy o wybodaeth am ffioedd a chyllid i fyfyrwyr Cartref (DU).

Myfyrwyr Rhyngwladol (yn cynnwys yr UE)

• Ffioedd Dysgu Myfyrwyr Rhyngwladol
• Costau Byw ac Ysgoloriaethau Myfyrwyr Rhyngwladol

Costau Ychwanegol
Mae yna hefyd rai costau ychwanegol cyffredin sy'n debygol o godi i fyfyrwyr ar bob cwrs, er enghraifft:

• Os dewiswch chi astudio dramor neu gymryd y Flwyddyn Profiad Rhyngwladol fel rhan o'ch cwrs.
• Os ydych chi'n mynd i'ch Seremoni Raddio, bydd cost llogi gŵn (£25- £75) a chost am docynnau i westeion ychwanegol (tua £12 yr un).

Costau ychwanegol cwrs-benodol

Yn dibynnu ar y cwrs rydych chi'n ei astudio, efallai y bydd costau ychwanegol cwrs-benodol y bydd gofyn i chi eu talu. Gellir rhoi'r costau hyn mewn tri chategori:

1. Costau Gorfodol: mae'r rhain yn gysylltiedig â modiwl craidd neu orfodol penodol y mae'n ofynnol i chi ei gwblhau i gwblhau eich cymhwyster e.e. teithiau maes gorfodol, gwisgoedd i fyfyrwyr ar leoliad, gwiriad gan y Gwasanaeth Datgelu a Gwahardd (DBS).
2. Costau Angenrheidiol: efallai na fydd pob myfyriwr yn cael y costau hyn, a bydd yn amrywio yn dibynnu ar y cwrs e.e. aelodaeth o gorff proffesiynol, teithio i leoliadau, meddalwedd arbenigol, cyfarpar diogelu personol.
3. Costau Dewisol: mae'r rhain yn dibynnu ar eich dewis o fodiwlau neu weithgaredd, ac fe'u dangosir er mwyn rhoi syniad ichi o'r costau dewisol a allai godi i sicrhau bod cymaint o wybodaeth â phosibl ar gael i chi cyn i chi wneud eich dewis. Gall y rhain gynnwys digwyddiadau graddio ar gyfer eich cwrs, teithiau maes dewisol, tripiau Wythnos Groeso.

Gofynion Cyffredinol y Brifysgol

I astudio cwrs gradd mae’n rhaid i chi gael isafswm o bwyntiau tariff UCAS. Am eglurhad manwl o bwyntiau tariff UCAS, ewch i www.ucas.com.

Rydym yn derbyn myfyrwyr â phob math o gymwysterau a chefndiroedd ac yn ystyried pob cais yn unigol.

Mae’n rhaid i bob ymgeisydd gael sgiliau sylfaenol da ond mae’r Brifysgol hefyd yn gweld pwysigrwydd sgiliau cyfathrebu a thechnoleg gwybodaeth. 

Mae’n bolisi gan y Brifysgol i ystyried ceisiadau gan ddarpar fyfyrwyr anabl yn yr un modd â; phob cais arall.

Rydym yn ystyried ceisiadau gan fyfyrwyr hŷn sy’n medru dangos fod ganddynt y gallu a’r ymrwymiad i astudio rhaglen prifysgol. Bob blwyddyn rydym yn cofrestru nifer sylweddol o fyfyrwyr hŷn. Am fwy o wybodaeth am astudio fel myfyriwr aeddfed, ewch i adran Astudio ym Mangor.  

Bydd dilyn y radd hon yn rhoi’r hyn y mae cyflogwyr yn chwilio amdano: rhagoriaeth mewn amrywiaeth o sgiliau pwnc-benodol a generig, a phrofiad. Ychydig o fyfyrwyr sy'n graddio gyda'r ddau bwnc, sy'n golygu y bydd cyfleoedd sylweddol o ran gyrfa. Bydd eich cymhwyster lefel uwch yn eich gwneud yn ddeniadol i gyflogwyr, amrywiaeth eang o asiantaethau cynghori, rheoleiddwyr, ymgynghoriaethau, llywodraeth leol a chenedlaethol, ac ym maes ymchwil a datblygu, yn lleol a thramor. O ran diwydiannau, mae'r 'economi werdd' yn tyfu'n gyflym, a bydd cyfleoedd mewn sectorau fel ynni adnewyddadwy, rheoli gwastraff, niwclear, adeiladu, amaethyddiaeth a thrafnidiaeth. Mae’r cwrs hefyd yn rhoi sylfaen dda ar gyfer dysgu a gweithio yn y cyfryngau  Gall eich cymhwyster lefel uwch arwain at ystyried astudiaethau ôl-radd, e.e. cwrs MSc proffesiynol, neu ymchwil yn arwain at PhD.  Ni fu erioed gymaint o gyfleoedd gwaith ym maes Gwyddorau’r Amgylchedd - bydd ennill y radd hon yn eich rhoi mewn sefyllfa dda i gael un o’r swyddi hyn.  

Cyfleoedd ym Mangor

Mae Gwasanaeth Sgiliau a Chyflogadwyedd y Brifysgol yn cynnig amryw o adnoddau i’ch helpu i gyflawni eich amcanion ar ôl graddio.

Rhaglen Interniaeth Prifysgol Bangor

Mae Prifysgol Bangor yn cynnal cynllun interniaeth â thâl yn adrannau academaidd a gwasanaethau’r Brifysgol.

Gwirfoddoli

Mae gwirfoddoli yn ehangu eich profiadau ac yn gwella eich cyflogadwyedd. Cewch fwy o wybodaeth am wirfoddoli ar wefan Undeb y Myfyrwyr.

Gweithio tra'n astudio

Mae TARGETconnect yn hysbysebu swyddi lleol, cenedlaethol a rhyngwladol i raddedigion, cyfleodd profiad gwaith ac interniaethau a chyfleon gwirfoddol.

Adroddiad Cyflawniad Addysg Uwch (HEAR)

Ceir pob myfyriwr sy’n graddio adroddiad terfynol HEAR. Mae’r adroddiad yn rhestru holl gyflawniadau academaidd ac allgyrsiol fel bod darpar gyflogwyr yn ymwybodol o’r sgiliau ychwanegol rydych wedi eu hennill tra yn y Brifysgol.

Mae opsiwn 'gyda Blwyddyn Sylfaen' ar gael ar gyfer y cwrs hwn. Gwnewch gais am Gwyddor yr Amgylchedd (gyda Blwyddyn Sylfaen).