Marchnata BSc (Anrh) Israddedig - Mynediad: Medi 2025/26*

Mae ein hacademyddion cymwys a phrofiadol iawn wedi'u hysbrydoli gan yr heriau marchnata y mae sefydliadau yn eu hwynebu. Yn eu tro, maent yn cynnig sylwebaeth feirniadol a chyfoes yn seiliedig ar brofiadau'r byd go iawn i ysbrydoli myfyrwyr. Gyda'n cefnogaeth ni, bydd astudio ar y cwrs gradd hwn (wedi'i achredu gan y Sefydliad Marchnata Siartredig) yn caniatáu ichi ddatblygu i fod yn weithiwr marchnata proffesiynol rhagorol, ac yn gwbl barod i ddechrau ar yrfa gyffrous. Mae natur bersonol y cwrs yn golygu eich bod chi'n fwy nag enw yma. Rydym yn gwerthfawrogi natur unigryw pawb ac yn caniatáu ichi ddatblygu eich gwybodaeth a'ch sgiliau gyda chi eich hun yn gyfrifol am deilwra’r rhaglen radd. Er mwyn eich cynorthwyo trwy gydol eich cwrs gradd, cewch eich mentora a'ch cefnogi gan eich Tiwtor Personol ymroddedig. Bydd eich llais yn cael ei glywed trwy Undeb y Myfyrwyr, sy’n gorff gweithgar iawn, a thrwy ein system cynrychiolwyr cyrsiau. 
 
Byddwch yn meithrin sgiliau gydol oes i lwyddo ym myd busnes heddiw sy’n esblygu yn barhaol. Mae datblygu sgiliau, ochr yn ochr â gwybodaeth ac agweddau ymarferol, wrth wraidd ein gradd. Bydd eich taith ddysgu yn eich arfogi â'r wybodaeth a'r sgiliau marchnata allweddol, nid yn unig at heddiw ond am flynyddoedd i ddod. Bydd hyn yn rhoi mantais i chi ym myd cystadleuol marchnata. 

Mae ein hasesiadau yn adlewyrchu sefyllfaoedd ac amgylcheddau marchnata bywyd go iawn. Rydym yn defnyddio amrywiaeth eang o ddulliau asesu i sicrhau y byddwch yn meistroli sgiliau busnes eang ac yn datblygu'r rhain wrth ichi ddilyn eich gradd. Mae'r rhain yn cynnwys sgiliau ysgrifenedig, cyfathrebu, rhwydweithio a gwneud penderfyniadau. Rydym hefyd yn defnyddio gemau efelychu blaenllaw i greu heriau marchnata sydd mor agos at realiti â phosibl. At hyn, rhoddwn hefyd gyfleoedd dysgu yn y gwaith i chi, a byddwn yn galluogi i ymgymryd â phrosiectau go iawn o’r byd gwaith yn eich blwyddyn olaf. 

Pam dewis Prifysgol Bangor ar gyfer y cwrs?

• Ceir eithriadau awtomatig o ystod o gymwysterau proffesiynol (e.e. Tystysgrif/Diploma mewn Marchnata Proffesiynol a Marchnata Digidol.
• Mae ein myfyrwyr yn cymryd rhan mewn cystadlaethau cenedlaethol megis Her Fusnes IBM a 'The Pitch', her farchnata a llunio cynllun busnes a gynhelir ledled y Deyrnas Unedig.
• 3ydd ar gyfer Ansawdd Addysgu: Busnes, Rheolaeth a Marchnata (Times & Sunday Times: Good University Guide)
• Mae ein staff yn ymchwilwyr cynhyrchiol yn eu meysydd pwnc gydag enw da yn rhyngwladol.
• Ymhlith y 10 uchaf am Foddhad Myfyrwyr o fewn Marchnata (Complete University Guide 2023). 

Opsiynau Cwrs Ychwanegol

O ddiwrnod cyntaf eich cwrs gradd marchnata, byddwch yn dechrau dysgu'r sgiliau i ddatblygu o fod yn fyfyriwr i fod yn arbenigwr marchnata. Bydd modd i chi ddefnyddio cyfleusterau, adnoddau a chyfarpar technoleg gwybodaeth ragorol i gefnogi'ch taith ddysgu. Gwahoddir gweithwyr proffesiynol marchnata allanol i gyflwyno sesiynau i ddatblygu eich gwybodaeth a'ch cysylltiadau ehangach yn y byd go iawn. Gallwch hefyd fanteisio ar gefnogaeth drylwyr i sicrhau lleoliad gwaith dewisol 10-12 mis i ddatblygu eich proffil cyflogadwyedd. 

Cewch eich dysgu trwy gyfuniad o ddarlithoedd, gweithdai a seminarau. Gallwch ddisgwyl cael o leiaf 12 awr o amser cyswllt yn ystod pob wythnos addysgu. Disgwylir i chi hefyd ymgymryd ag astudio annibynnol a gwaith grŵp, a chymryd rhan mewn gweithgareddau a thrafodaethau ar-lein gan ddefnyddio ein hamgylchedd dysgu rhithwir.

Yn eich blwyddyn gyntaf, byddwch yn dysgu cysyniadau a damcaniaethau marchnata sylfaenol ac yn dechrau cymhwyso hyn yn ymarferol. At hyn, byddwch yn dechrau adeiladu eich portffolio proffesiynol gyda phrosiectau marchnata go iawn. 

Yn eich ail flwyddyn, byddwch yn mireinio’r wybodaeth a'r sgiliau a enillwyd ac yn eu cyfuno i archwilio ystod o swyddogaethau marchnata allweddol, gan ganolbwyntio ar swyddogaeth y cyfryngau digidol. Byddwch yn ennill sgiliau ychwanegol yn agweddau gweithredol a strategol marchnata, ac yn dysgu am swyddogaeth marchnata mewn perthynas â swyddogaethau busnes allweddol eraill.  

Yn eich trydedd flwyddyn, byddwch yn datblygu eich arbenigedd mewn ffordd fwy heriol. Byddwch yn edrych yn fwyfwy strategol ar farchnata i gymhwyso hynny i'ch dysgu, ac i ddatblygu sgiliau i ymdopi â'r heriau bywyd go iawn y mae marchnatwyr proffesiynol yn eu hwynebu yn yr oes ddigidol fyd-eang. Gan weithio mewn grwpiau, byddwch yn cymryd rhan mewn pecyn efelychu marchnata ar-lein a fydd yn rhoi'r profiad i chi o wneud penderfyniadau marchnata yn seiliedig ar eich dadansoddiad o ddata'r farchnad a data cwmni.

Beth fyddwch chi’n ei astudio ar y cwrs yma?

Ym mlwyddyn un bydd myfyrwyr yn cymryd 80 credyd o'r pynciau canlynol, Hanfodion Marchnata Digidol, Egwyddorion Marchnata, Marchnata Ymarferol a Sgiliau Marchnata Proffesiynol. Mae modiwlau opsiynol hefyd ar gael mewn pynciau megis Cyflwyniad i Faterion Rheolaeth Gyfoes mewn Moeseg, Cynaliadwyedd, Rheoli Adnoddau Dynol, a Thwristiaeth a Thechnoleg mewn Marchnata. Gall myfyrwyr hefyd ddewis modiwlau dewisol o fodiwlau lefel 4 eraill yr Ysgol Busnes neu o bynciau eraill yn y Brifysgol, yn amodol ar gyfyngiadau amserlen.

Yn yr ail flwyddyn bydd myfyrwyr yn cymryd 80 credyd o'r pynciau canlynol, Ymddygiad Defnyddwyr, Ymchwil Marchnata a CRM a Chyfathrebu Marchnata a Chyfryn. Mae modiwlau opsiynol hefyd ar gael mewn pynciau megis Rheoli Brand a Manwerthu a Marchnata Cynnwys Creadigol. Gall myfyrwyr hefyd ddewis modiwlau dewisol o fodiwlau lefel 5 eraill yr Ysgol Busnes neu o bynciau eraill yn y Brifysgol, yn amodol ar gyfyngiadau amserlen.

Yn y drydedd flwyddyn bydd myfyrwyr yn cymryd 80 credyd o'r pynciau canlynol, Prosiect Mewnwelediad Cwsmeriaid, Marchnata Strategol Rhyngwladol a Marchnata a Chymdeithas. Mae modiwlau opsiynol hefyd ar gael mewn pynciau megis Rheoli Brand a Manwerthu, Marchnata Cynnwys Creadigol, Materion a Thueddiadau mewn Marchnata a Phrosiect Marchnata Cymhwysol. Gall myfyrwyr hefyd dewis gwneud Traethawd Marchnata.

Mae cynnwys y cwrs wedi'i nodi i’ch arwain yn unig ac fe all newid. 

Mae gennym ddewis eang o fodiwlau a dulliau i chi allu astudio yn y Gymraeg, ond efallai nid fydd pob un o'r pynciau uchod ar gael drwy Gyfrwng y Gymraeg.

Costau Cyffredinol yn y Brifysgol

Myfyrwyr Cartref (DU)

• Cost cwrs israddedig llawn-amser yw £9,250 y flwyddyn (2025/26).
• Y ffi ar gyfer pob blwyddyn dramor integredig yw £1,385 (2025/26).
• Y ffi ar gyfer blwyddyn mewn diwydiant integredig fel rhan o'r cwrs yw £1,850 (2025/26).

Mwy o wybodaeth am ffioedd a chyllid i fyfyrwyr Cartref (DU).

Myfyrwyr Rhyngwladol (yn cynnwys yr UE)

• Ffioedd Dysgu Myfyrwyr Rhyngwladol
• Costau Byw ac Ysgoloriaethau Myfyrwyr Rhyngwladol

Costau Ychwanegol
Mae yna hefyd rai costau ychwanegol cyffredin sy'n debygol o godi i fyfyrwyr ar bob cwrs, er enghraifft:

• Os dewiswch chi astudio dramor neu gymryd y Flwyddyn Profiad Rhyngwladol fel rhan o'ch cwrs.
• Os ydych chi'n mynd i'ch Seremoni Raddio, bydd cost llogi gŵn (£25- £75) a chost am docynnau i westeion ychwanegol (tua £12 yr un).

Costau ychwanegol cwrs-benodol

Yn dibynnu ar y cwrs rydych chi'n ei astudio, efallai y bydd costau ychwanegol cwrs-benodol y bydd gofyn i chi eu talu. Gellir rhoi'r costau hyn mewn tri chategori:

1. Costau Gorfodol: mae'r rhain yn gysylltiedig â modiwl craidd neu orfodol penodol y mae'n ofynnol i chi ei gwblhau i gwblhau eich cymhwyster e.e. teithiau maes gorfodol, gwisgoedd i fyfyrwyr ar leoliad, gwiriad gan y Gwasanaeth Datgelu a Gwahardd (DBS).
2. Costau Angenrheidiol: efallai na fydd pob myfyriwr yn cael y costau hyn, a bydd yn amrywio yn dibynnu ar y cwrs e.e. aelodaeth o gorff proffesiynol, teithio i leoliadau, meddalwedd arbenigol, cyfarpar diogelu personol.
3. Costau Dewisol: mae'r rhain yn dibynnu ar eich dewis o fodiwlau neu weithgaredd, ac fe'u dangosir er mwyn rhoi syniad ichi o'r costau dewisol a allai godi i sicrhau bod cymaint o wybodaeth â phosibl ar gael i chi cyn i chi wneud eich dewis. Gall y rhain gynnwys digwyddiadau graddio ar gyfer eich cwrs, teithiau maes dewisol, tripiau Wythnos Groeso.

Gofynion Cyffredinol y Brifysgol

I astudio cwrs gradd mae’n rhaid i chi gael isafswm o bwyntiau tariff UCAS. Am eglurhad manwl o bwyntiau tariff UCAS, ewch i www.ucas.com.

Rydym yn derbyn myfyrwyr â phob math o gymwysterau a chefndiroedd ac yn ystyried pob cais yn unigol.

Mae’n rhaid i bob ymgeisydd gael sgiliau sylfaenol da ond mae’r Brifysgol hefyd yn gweld pwysigrwydd sgiliau cyfathrebu a thechnoleg gwybodaeth. 

Mae’n bolisi gan y Brifysgol i ystyried ceisiadau gan ddarpar fyfyrwyr anabl yn yr un modd â; phob cais arall.

Rydym yn ystyried ceisiadau gan fyfyrwyr hŷn sy’n medru dangos fod ganddynt y gallu a’r ymrwymiad i astudio rhaglen prifysgol. Bob blwyddyn rydym yn cofrestru nifer sylweddol o fyfyrwyr hŷn. Am fwy o wybodaeth am astudio fel myfyriwr aeddfed, ewch i adran Astudio ym Mangor.  

Bydd gennych amrywiaeth o ddewisiadau gyrfa ar ôl cwblhau'r radd hon. Byddwch yn barod am yrfa mewn marchnata ond fe allech chi hefyd fod yn barod ar gyfer gyrfa mewn busnes neu reoli yn fwy cyffredinol, yn dibynnu ar sut rydych chi’n dewis teilwra’ch gradd. Gallwch ddilyn ôl troed graddedigion o'r radd hon sydd bellach yn gweithio mewn sawl maes fel gwerthu, hysbysebu, rheoli a marchnata mewn sefydliadau masnachol ac yn y llywodraeth.  Er enghraifft, mae graddedigion diweddar wedi  cael swyddi yn Llywodraeth Cymru, Banc Lloyds ac mewn Asiantaethau Marchnata Digidol.

Mae'r radd wedi'i hachredu gan y Sefydliad Siartredig Marchnata sef y prif gorff proffesiynol ar gyfer marchnatwyr sy'n eich galluogi i gael eich eithrio o fodiwlau dethol ar gymwysterau’r Sefydliad Siartredig Marchnata  (ar gael trwy'r Porth Graddedigion). Gallwch gwblhau modiwlau’r Sefydliad Siartredig Marchnata sy'n weddill yn ystod eich gradd neu cyn pen tair blynedd ar ôl graddio. Mae mwy o wybodaeth am y Porth Graddedigion ar gael yma.

Cyfleoedd ym Mangor

Mae Gwasanaeth Sgiliau a Chyflogadwyedd y Brifysgol yn cynnig amryw o adnoddau i’ch helpu i gyflawni eich amcanion ar ôl graddio.

Rhaglen Interniaeth Prifysgol Bangor

Mae Prifysgol Bangor yn cynnal cynllun interniaeth â thâl yn adrannau academaidd a gwasanaethau’r Brifysgol.

Gwirfoddoli

Mae gwirfoddoli yn ehangu eich profiadau ac yn gwella eich cyflogadwyedd. Cewch fwy o wybodaeth am wirfoddoli ar wefan Undeb y Myfyrwyr.

Gweithio tra'n astudio

Mae TARGETconnect yn hysbysebu swyddi lleol, cenedlaethol a rhyngwladol i raddedigion, cyfleodd profiad gwaith ac interniaethau a chyfleon gwirfoddol.

Adroddiad Cyflawniad Addysg Uwch (HEAR)

Ceir pob myfyriwr sy’n graddio adroddiad terfynol HEAR. Mae’r adroddiad yn rhestru holl gyflawniadau academaidd ac allgyrsiol fel bod darpar gyflogwyr yn ymwybodol o’r sgiliau ychwanegol rydych wedi eu hennill tra yn y Brifysgol.

Mae opsiwn 'gyda Blwyddyn Sylfaen' ar gael ar gyfer y cwrs hwn. Gwnewch gais am Marchnata (gyda Blwyddyn Sylfaen).