Cymraeg a Cherddoriaeth BA (Anrh) Israddedig - Mynediad: Medi 2025/26*

Mae cysylltiad clos rhwng cerddoriaeth a llenyddiaeth yng Nghymru. O gyfuno'r ddau bwnc cewch eich arfogi â gwybodaeth o iaith, llenyddiaeth a sgiliau cerddorol sy'n briodol i amrywiaeth dda o yrfaoedd gan gynnwys y sectorau celfyddydol a threftadol ac addysg a darlledu. Mae cyfleoedd i ymuno â Cherddorfa Symffoni’r Brifysgol, Côr Siambr ac amryw o gymdeithasau eraill y myfyrwyr a bydd eich profiad cerddorol yn ymestyn ymhell y tu hwnt i’r ystafell ddarlithio. Mae Cymraeg ym Mangor hefyd yn llawer mwy na chwrs gradd. Mae'n becyn diwylliannol a fydd yn eich galluogi i chwarae rhan broffesiynol a boddhaus wrth greu Cymru wirioneddol ddwyieithog.

Dyma gwrs sy’n caniatáu i chi fwynhau holl gyfoeth llenyddiaeth, drama a diwylliant creadigol y Gymraeg ochr yn ochr â holl gyfoeth y byd cerddorol yng Nghymru ac ar draws y byd. Mae’n gyfuniad deinamig o’r creadigol, yr ymarferol a’r academaidd a hynny mewn dau faes sydd â chysylltiad clos a chyffrous â'i gilydd. Gall myfyrwyr sy’n mwynhau gweithgarwch creadigol ddilyn gweithdai barddoniaeth a rhyddiaith yn y Gymraeg, ac ar yr un pryd ddilyn modiwlau cyfansoddi cerddoriaeth.  Mae hwn yn llawer mwy na chwrs gradd: mae'n cynnig pecyn diwylliannol a fydd yn eich galluogi i chwarae rhan greadigol yn niwylliant cyfoes Cymru.  

Cofiwch hefyd fod cymuned ddiwylliannol ddeinamig Prifysgol Bangor yn rhoi cyfle i chi ymuno mewn corau, bandiau a cherddorfeydd, yn ogystal â pherfformio mewn eisteddfodau a gwyliau diwylliannol. Mae gan Brifysgol Bangor ddwy neuadd gyngerdd, pedair stiwdio electroacwstig, ac mae Canolfan Pontio yn cynnal digwyddiadau lu ym meysydd drama, llenyddiaeth, ffilm a cherddoriaeth.

O gyfuno Cymraeg a Cherddoriaeth cewch eich arfogi â gwybodaeth eang o iaith, llenyddiaeth yn ogystal â sgiliau cerddorol sy'n briodol i bob math o yrfaoedd. Byddwch yn dysgu sgiliau dadansoddol newydd er mwyn ymateb yn wreiddiol i lenyddiaeth a cherddoriaeth, ac fe welwch hefyd berthnasedd y traddodiad Cymraeg i rai o ffurfiau diwylliannol pwysicaf y byd, gan ystyried sut mae llenorion a cherddorion wedi ymateb i ofynion yr oesoedd. 

Mwynhewch hyn oll ochr yn ochr â dysgu sgiliau ymarferol y mae galw cynyddol amdanynt yng ngweithleoedd Cymru heddiw, o ysgrifennu'n hyderus ac yn effeithiol yn y Gymraeg, i gyfieithu a sgriptio; ac o berfformio, cyfansoddi a defnyddio cerddoriaeth yn y gymuned, i ddysgu sgiliau oesol harmoni a gwrthbwynt. 

Mae amrywiaeth a chyfoeth y cwrs gradd hwn yn eithriadol o werthfawr, ac mae'r ddau bwnc yn gwir gyfoethogi ei gilydd.

Pam dewis Prifysgol Bangor ar gyfer y cwrs?

• Rydym yn cynnig amrywiaeth o ddewisiadau, sy'n eich galluogi i lunio'ch cwrs yn ôl eich diddordebau a'ch cryfderau.
• Rhyddid i deilwra eich cwrs yn ôl eich diddordebau a'ch cryfderau
• Cymuned sy'n egnïol yn ddiwylliannol ac o ran creu cerddoriaeth: corau, cerddorfeydd, bandiau, ensembles myfyrwyr a mwy.
• Dau adeilad Cerddoriaeth pwrpasol, dwy neuadd gyngerdd broffesiynol, ystafell ymarfer gwrthsain, pedair stiwdio electroacwstig o'r radd flaenaf, canolfan celfyddydau Pontio.
• Astudio yng Ngwynedd (gogledd-orllewin Cymru) lle mae'r Gymraeg yn parhau i fod yn iaith fyw i'r mwyafrif.

Opsiynau Cwrs Ychwanegol

Mae gradd ar y cyd yn eich caniatáu i astudio’r un modiwlau craidd â myfyrwyr ar y cyrsiau anrhydedd sengl; byddwch yn dilyn llai o fodiwlau dewisol, ond ni fyddwch heb ddewisiadau chwaith. 

Yn y flwyddyn gyntaf, drwy ddarllen testunau allweddol byddwch yn ymgyfarwyddo ag agweddau sy’n greiddiol i Gerddoriaeth ac i'r Gymraeg. Cewch hefyd astudio harmoni, gwrthbwynt a chelfyddyd sonig, yn ogystal â darllen barddoniaeth, rhyddiaith a drama, gyda’r cyfle os dymunwch, i ddilyn gweithdai sgriptio ac ysgrifennu creadigol yn y Gymraeg, a chyfansoddi a pherfformio mewn Cerddoriaeth. 

Yn yr ail flwyddyn a’r drydedd, cynigir amrywiaeth helaeth o fodiwlau: e.e., y nofel o Daniel Owen i Manon Steffan Ros; y theatr Gymraeg o Saunders Lewis hyd at Aled Jones Williams; barddoniaeth fodern ac awdlau’r eisteddfod; dramâu teledu; Dafydd ap Gwilym; y Mabinogion. Neu beth am astudio diwylliant Cymraeg Cymry America? Ym maes Cerddoriaeth ceir modiwlau'n dadansoddi cerddoriaeth bop, jazz neu'r symffoni, neu fodiwl sy'n canolbwyntio ar ffurfiau a chyfansoddwyr penodol, e.e. wrth astudio pedwarawdau llinynnol Beethoven.  
Mae modiwlau Lleoliad Cymunedol a’r Traethawd Hir yn rhoi’r cyfle ichi weithio'n annibynnol a datblygu eich sgiliau mewn meysydd sydd o ddiddordeb arbennig ichi, boed hynny'n ymchwilio i waith awdur neu gerddor unigol megis Caryl Lewis neu Geraint Jarman, neu faes fel cerddoriaeth mewn iechyd a lles, ecofeirniadaeth, rhywedd a thrawsrywedd, agweddau ar ryngweithio creadigol a.y.b.

Mae’r dysgu’n digwydd drwy gyfrwng darlithoedd, seminarau, cyflwyniadau, astudiaethau achos a gweithdai. Byddwch yn gwneud traethodau, amrywiol ymarferion a thasgau wythnosol, gwaith darllen a pharatoi ar gyfer seminarau, yn ogystal â pherfformio'n unigol neu mewn grwpiau. Mae'r asesu’n gyfuniad o’r gwaith cwrs ac arholiadau, a rhai modiwlau wedi’u hasesu’n llwyr ar sail gwaith cwrs. 
 

Modiwlau ar gyfer y flwyddyn academaidd gyfredol

Mae’r rhestrau modiwlau ar gyfer eich arwain yn unig ac fe allant newid. Cymerwch olwg ar yr hyn y mae ein myfyrwyr yn ei astudio ar hyn o bryd ar tudalen Modiwlau Cymraeg a Cherddoriaeth BA (Anrh).

Mae cynnwys y cwrs wedi’i nodi i’ch arwain yn unig ac fe all newid.

Costau Cyffredinol yn y Brifysgol

Myfyrwyr Cartref (DU)

• Cost cwrs israddedig llawn-amser yw £9,250 y flwyddyn (2025/26).
• Y ffi ar gyfer pob blwyddyn dramor integredig yw £1,385 (2025/26).
• Y ffi ar gyfer blwyddyn mewn diwydiant integredig fel rhan o'r cwrs yw £1,850 (2025/26).

Mwy o wybodaeth am ffioedd a chyllid i fyfyrwyr Cartref (DU).

Myfyrwyr Rhyngwladol (yn cynnwys yr UE)

• Ffioedd Dysgu Myfyrwyr Rhyngwladol
• Costau Byw ac Ysgoloriaethau Myfyrwyr Rhyngwladol

Costau Ychwanegol
Mae yna hefyd rai costau ychwanegol cyffredin sy'n debygol o godi i fyfyrwyr ar bob cwrs, er enghraifft:

• Os dewiswch chi astudio dramor neu gymryd y Flwyddyn Profiad Rhyngwladol fel rhan o'ch cwrs.
• Os ydych chi'n mynd i'ch Seremoni Raddio, bydd cost llogi gŵn (£25- £75) a chost am docynnau i westeion ychwanegol (tua £12 yr un).

Costau ychwanegol cwrs-benodol

Yn dibynnu ar y cwrs rydych chi'n ei astudio, efallai y bydd costau ychwanegol cwrs-benodol y bydd gofyn i chi eu talu. Gellir rhoi'r costau hyn mewn tri chategori:

1. Costau Gorfodol: mae'r rhain yn gysylltiedig â modiwl craidd neu orfodol penodol y mae'n ofynnol i chi ei gwblhau i gwblhau eich cymhwyster e.e. teithiau maes gorfodol, gwisgoedd i fyfyrwyr ar leoliad, gwiriad gan y Gwasanaeth Datgelu a Gwahardd (DBS).
2. Costau Angenrheidiol: efallai na fydd pob myfyriwr yn cael y costau hyn, a bydd yn amrywio yn dibynnu ar y cwrs e.e. aelodaeth o gorff proffesiynol, teithio i leoliadau, meddalwedd arbenigol, cyfarpar diogelu personol.
3. Costau Dewisol: mae'r rhain yn dibynnu ar eich dewis o fodiwlau neu weithgaredd, ac fe'u dangosir er mwyn rhoi syniad ichi o'r costau dewisol a allai godi i sicrhau bod cymaint o wybodaeth â phosibl ar gael i chi cyn i chi wneud eich dewis. Gall y rhain gynnwys digwyddiadau graddio ar gyfer eich cwrs, teithiau maes dewisol, tripiau Wythnos Groeso.

Gofynion Cyffredinol y Brifysgol

I astudio cwrs gradd mae’n rhaid i chi gael isafswm o bwyntiau tariff UCAS. Am eglurhad manwl o bwyntiau tariff UCAS, ewch i www.ucas.com.

Rydym yn derbyn myfyrwyr â phob math o gymwysterau a chefndiroedd ac yn ystyried pob cais yn unigol.

Mae’n rhaid i bob ymgeisydd gael sgiliau sylfaenol da ond mae’r Brifysgol hefyd yn gweld pwysigrwydd sgiliau cyfathrebu a thechnoleg gwybodaeth. 

Mae’n bolisi gan y Brifysgol i ystyried ceisiadau gan ddarpar fyfyrwyr anabl yn yr un modd â; phob cais arall.

Rydym yn ystyried ceisiadau gan fyfyrwyr hŷn sy’n medru dangos fod ganddynt y gallu a’r ymrwymiad i astudio rhaglen prifysgol. Bob blwyddyn rydym yn cofrestru nifer sylweddol o fyfyrwyr hŷn. Am fwy o wybodaeth am astudio fel myfyriwr aeddfed, ewch i adran Astudio ym Mangor.  

Ni fu erioed gymaint o alw am weithlu a all ddefnyddio’r Gymraeg ar lefelau proffesiynol uwch. Mae’r nod yn glir, wedi ei osod gan Lywodraeth Cymru: miliwn o siaradwyr Cymraeg erbyn 2050, a Chymru ddwyieithog yng ngwir ystyr y gair. 

Wrth anelu am y nod hwnnw bydd galw mawr am raddedigion hyderus eu Cymraeg. Bydd gradd mewn Cymraeg a Cherddoriaeth yn eich cymhwyso yn ardderchog, gan gyfuno dau faes sy’n eang eu posibiliadau. Mae ystadegau cyflogadwyedd yn dangos, flwyddyn ar ôl blwyddyn, fod graddedigion mewn Cymraeg, yn aml gyda phwnc arall, yn llwyddo’n arbennig i ganfod gwaith cymwys. Mae’r gallu i gyfathrebu’n effeithiol yn y Gymraeg ac yn Saesneg – ar lafar ac yn ysgrifenedig – yn sgil hanfodol mewn nifer gynyddol o swyddi.

Mae llwyddiant proffesiynol rhyfeddol ein myfyrwyr ym maes gwaith – a’u gyrfaoedd amrywiol – eisoes yn profi pa mor gwbl berthnasol yw’r cwrs hwn i ofynion y Gymru gyfoes. Mae cyfran yn cael eu denu i fyd addysg, yn athrawon cynradd ac uwchradd, yn brifathrawon, yn swyddogion addysg ac yn gyfarwyddwyr addysg.  Mae’r galw yn parhau hefyd am weinyddwyr a swyddogion dwyieithog ar gyfer llywodraeth leol. Mae dysgu Cymraeg i oedolion hefyd yn faes allweddol. 

Wrth gyfuno Cymraeg a Cherddoriaeth cewch eich arfogi â sgiliau sy'n briodol i yrfaoedd yn y sectorau celfyddydol a threftadaeth ac ym meysydd addysg a darlledu. Mae’r byd teledu a’r cyfryngau digidol a phrint – gan gynnwys canolfan y BBC ym Mangor – yn cynnig trawstoriad o swyddi diddorol, a denwyd cyn-fyfyrwyr eraill at faes cyhoeddi llyfrau, ysgrifennu creadigol a sgriptio teledu, cysylltiadau cyhoeddus a marchnata.  Aiff eraill i fyd addysg bellach ac i fod yn ddarlithwyr mewn prifysgolion. Mae graddedigion mewn Cerddoriaeth hefyd yn edrych i gyfeiriad addysg, perfformio, gweinyddu'r celfyddydau, cynhyrchu cyfryngol, yn ogystal â gwaith cymdeithasol a chwnsela. Yn wir, mae'r posibiliadau ar gyfer graddedigion y cwrs gradd hwn yn ddirifedi.

Cyfleoedd ym Mangor

Mae Gwasanaeth Sgiliau a Chyflogadwyedd y Brifysgol yn cynnig amryw o adnoddau i’ch helpu i gyflawni eich amcanion ar ôl graddio.

Rhaglen Interniaeth Prifysgol Bangor

Mae Prifysgol Bangor yn cynnal cynllun interniaeth â thâl yn adrannau academaidd a gwasanaethau’r Brifysgol.

Gwirfoddoli

Mae gwirfoddoli yn ehangu eich profiadau ac yn gwella eich cyflogadwyedd. Cewch fwy o wybodaeth am wirfoddoli ar wefan Undeb y Myfyrwyr.

Gweithio tra'n astudio

Mae TARGETconnect yn hysbysebu swyddi lleol, cenedlaethol a rhyngwladol i raddedigion, cyfleodd profiad gwaith ac interniaethau a chyfleon gwirfoddol.

Adroddiad Cyflawniad Addysg Uwch (HEAR)

Ceir pob myfyriwr sy’n graddio adroddiad terfynol HEAR. Mae’r adroddiad yn rhestru holl gyflawniadau academaidd ac allgyrsiol fel bod darpar gyflogwyr yn ymwybodol o’r sgiliau ychwanegol rydych wedi eu hennill tra yn y Brifysgol.

Mae opsiwn 'gyda Blwyddyn Sylfaen' ar gael ar gyfer y cwrs hwn. Gwnewch gais am Cymraeg i Ddechreuwyr neu Cerddoriaeth (gyda Blwyddyn Sylfaen).