Meithrin gweithlu dwyieithog: Digwyddiad undydd i gyflogwyr

Mae’r digwyddiad hwn am ddim, ac yn cael ei drefnu fel rhan o gynllun y Gronfa Her, Arfor.

Bydd rhaglen y dydd yn cynnwys cyflwyniad i’r Pecyn Recriwtio Gweithlu Dwyieithog - adnodd arloesol a luniwyd i gefnogi sefydliadau i recriwtio staff â sgiliau Cymraeg. Mae’r pecyn hwn yn cynnwys Twlcit Arfer Da, sy'n cynnig arweiniad ymarferol i gyflogwyr wrth recriwtio staff gyda sgiliau yn yr iaith Gymraeg a Theipoleg Penderfyniadau Mudo Siaradwyr Cymraeg, sy’n cynorthwyo cyflogwyr i adnabod eu cynulleidfa darged wrth geisio denu staff sy'n meddu ar sgiliau yn y Gymraeg.

Bydd sgyrsiau panel hefyd yn rhan o'r rhaglen, gyda chyflogwyr a phobl ifanc yn rhannu eu profiadau ac arfer da mewn ymateb i heriau recriwtio gweithlu dwyieithog. Yn ogystal, bydd panelwyr o Gymru a Gwlad y Basg yn cymryd rhan, gan rannu eu harbenigedd o weithio ym maes recriwtio staff mewn cymunedau ieithoedd lleiafrifol.

Darperir cyfieithu ar y pryd o’r Gymraeg i’r Saesneg.

Dyma eich cyfle i glywed am arfer da gan ymarferwyr ac arbenigwyr a fydd yn eich cynorthwyo i recriwtio staff sydd â sgiliau iaith Gymraeg.