Mae’r Grant Teithio Tramor Wartski, sy’n cael ei ariannu trwy haelioni ymddiriedolaeth elusennol a sefydlwyd gan Isidore a Winifred Marie Wartski, yn gyfle gwych i fyfyrwyr Prifysgol Bangor wella eu haddysg trwy deithio dramor. Mae'r wobr fawreddog hon yn adlewyrchu treftadaeth falch y teulu Wartski, gan fod ganddo gysylltiad hanesyddol â'r gemweithwyr Wartski a sefydlodd ym Mangor a'r gemweithwyr sydd erbyn hyn wedi eu lleoli yn Llundain. Bob blwyddyn academaidd, dyfernir y grant i un myfyriwr o bob coleg.
Hoffwn fynegi fy niolch am y wobr hon, gan ei bod wedi ychwanegu at yr arian a oeddwn wedi ei gael eisioes at y daith hon ac wedi caniatáu imi fynd i Ganada am fis o ymweliad ymchwil. Yn ystod fy ymweliad, cefais gyfle i fynd i gynhadledd (Lake Ontario Visionary Establishment) gyda chynrychiolaeth eang o faes ymchwil seicolegol a niwrowyddonol, a oedd yn caniatáu i mi rwydweithio ag ymchwilwyr a oedd yn gwneud ymchwil tebyg. Yma, cefais hefyd gyfle i gysylltu ag ymchwilwyr eraill yn fwy anffurfiol, rhannu syniadau a dysgu am unrhyw wahaniaethau rhwng y Deyrnas Unedig a Chanada o ran gwneud ymchwil ac adeiladu gyrfa yn y byd academaidd. Mae gweithio mewn labordy gwahanol wedi rhoi profiad o ddiwylliant ymchwil gwahanol i mi, mewn amgylchedd lle gallwn drafod y llenyddiaeth gyda myfyrwyr PhD eraill sy’n gweithio yn yr un maes, yn ogystal ag ehangu fy ngwybodaeth am feysydd cysylltiedig. Mae hyn wedi bod yn amhrisiadwy i gynnydd fy noethuriaeth a bydd o fudd i ddatblygiad fy ngyrfa academaidd, nid yn unig o ran dod yn fwy annibynnol yn fy ymchwil presennol, ond hefyd o ran chwilio am gyfleoedd i gydweithredu yn y dyfodol.
Doina-Irina Giurgea, Myfyriwr Ymchwil Ôl-raddedig, Ysgol Seicoleg a Gwyddor Chwareon
Hoffwn ddiolch i noddwyr gwobr deithio tramor Wartski am ddewis fy mhroject i'w ariannu. Ni fyddwn wedi gallu ymgymryd â thaith o’r fath heb gymorth ariannol. Mae mynd i gynhadledd ryngwladol yn brofiad pwysig a ffurfiannol i ymchwilydd ôl-radd, yn fy marn i. Rwy’n ddiolchgar iawn bod eich gwobr wedi fy ngalluogi i gymryd rhan mewn digwyddiad o’r fath a chael cyfle i deimlo cysylltiad â rhwydwaith ehangach o ysgolheigion yn fy maes. Mae’r buddion a gefais o’r gynhadledd wedi bod yn niferus, gan gynnwys ysbrydoliaeth ar gyfer y dull damcaniaethol a methodolegol i’r traethawd ymchwil, cyswllt ag ysgolheigion yn fy maes astudio a phrofiadau diwylliannol gwerthfawr a fydd yn cyfoethogi fy astudiaethau a’m haddysgu ym Mangor. Diolch yn fawr eto am ddewis fy mhroject. Isod mae ffotograffau gyda chapsiynau sy'n dangos rhai o leoliadau a gweithgareddau pwysig fy ymweliad.
Elsa Barratt, Myfyriwr Ymchwil Ôl-raddedig - Ysgol Iaith, Diwylliant a'r Celfyddydau