Dywedwch ychydig am eich profiad ym Mhrifysgol Bangor….
Mi oedd y dair blynedd wnes i dreulio ym Mhrifysgol Bangor o blith y gorau erioed. Yma ges i gyfle i ddysgu yr hyn oedd gen i wir ddiddordeb ynddo ac ehangu fy sgiliau. Mi oedd y brifysgol yn cynnig bob math o fodiwlau difyr a ges i gyfle i astudio meysydd hollol newydd. Roedd y gefnogaeth gan staff yn wych ac roeddwn yn teimlo eu bod wir yn rhoi y myfyrwyr wrth galon bob dim oedd yn digwydd. O ran yr ochr gymdeithasol, mi wnaeth Bangor gynnig cyfle imi gwrdd a ffrindiau oes, ac roedd yr Undeb Gymraeg (UMCB) yn cynnig profiadau bythgofiadwy; cyfleoedd i gymdeithasu, i fwynhau, i weithio ac i gwrdd a phobl newydd. Saff dweud dwi’n teimlo ges i’r profiad gorau posib ym Mangor.
Pam wnaethoch ddewis astudio ym Mhrifysgol Bangor?
Mi oedd Bangor bron a bod ar fy stepen drws, a fues i’n pendroni a ddylwn i fynd ymhellach o gartref. Ond ges i fy ysbrydoli gan angerdd y darlithwyr a’u harbenigedd. Roedd y darlithwyr yn frwdfrydig ac yn arbenigwyr yn eu meysydd, ac roedd hynny yn cael ei adlewyrchu yn safon yr addysg ges i. Bangor hefyd yw dinas Cymreigia’r byd bosib- felly lle gwell i ddod er mwyn cael byw mewn awyrgylch o ddiwylliant a iaith Gymraeg. Roedd y cyfuniad o safon yr addysg a’r cyfleoedd allgyrsiol a bywyd cymdeithasol yn golygu nad oedd angen imi feddwl yn galed iawn o le i ddod.
Sut mae eich gyrfa wedi datblygu ers i chi raddio o Brifysgol Bangor, a be yw eich swydd ar hyn o bryd? (gan gynnwys rhestr fer o swyddi nodedig)
Dwi ddim wir wedi mynd yn rhy bell o’r Brifysgol, yn llythrennol mae swyddfa’r BBC, lle dwi’n Uwch Ohebydd, rownd y gornel! Ac mae hynny yn beth braf gan dwi’n pasio brif adeilad y brifysgol bob dydd ac mae’n fy atgoffa o’r cyfleoedd ges i a sut arweiniodd hynny ata’ i’n derbyn y swydd dwi wrthi fy modd a. Fe ddechreuais i drwy ohebu i BBC Radio Cymru ar ôl gadael y Brifysgol. Dwi bellach yn gohebu ar draws gwasanaethau BBC Cymru yn y Gymraeg a Saesneg ac ar deledu, radio ac ar-lein. Fy mhrif ffocws bellach yw darganfod straeon gwreiddiol a gohebu i raglen Newyddion S4C. Mae’n swydd wych sy’n rhoi y cyfle imi gwrdd a phobl newydd a theithio i bob math o lefydd yng Nghymru a thu hwnt.
Mewn pa ffordd wnaeth astudio ym Mhrifysgol Bangor gwella eich cyflogadwyedd?
Yr hyn ddysgais o fod ym Mhrifysgol Bangor yw pwysigrwydd siarad a phobl. Drwy fy nghyfnod yn y brifysgol ges i gyfleoedd i weithio ar ddyddiau agored a gesi interniaeth byr yn trefnu ffair swyddi Cymraeg y brifysgol. Fe roddodd hynny'n cyfle imi fagu cysylltiadau a sgiliau newydd. Mae’r tim cyflogadwyedd yn gwneud gwaith gwych yn rhoi cymorth hefo ffurflenni cais a dwi’n annog unrhyw un i dderbyn yr help mae nhw’n cynnig. Mi fues i hefyd yn Olygydd y Llef, papur newydd Cymraeg y brifysgol ar y pryd a does na’m dwywaith fod hynny wedi gwella fy nghyfleoedd o fewn y sector wrth chwilio am waith. Mae ‘na lu o gyfleoedd, dim ond ichi fanteisio arnynt.
Pa gyngor byswch yn ei rhoi i fyfyrwyr sydd ar fin cychwyn astudio ym Mhrifysgol Bangor?
Er yn ddinas ac yn brifysgol gymharol fach, mae gan Bangor llwythi i gynnig ichi fel myfyriwr- dim ond ichi wneud yn fawr o’r cyfleoedd sydd ar gael! O ran yr ochr academaidd, mae’ch tiwtoriaid a darlithwyr o blith y gorau yn eu meysydd ac yn arbenigwyr. Gwnewch bob ymgais i ddysgu ganddyn nhw, i werthfawrogi eu hamser ac i ddysgu. Yn yr un modd mi gesi brofiadau bythgofiadwy gydag UMCB ar yr ochr gymdeithasol. Gwirfoddolwch, manteisiwch ar yr hyn sy’n cael ei gynnig. Mae werth trio unrhyw beth unwaith a dwi’n siŵr gewch chi brofiadau gwych. Mae Bangor, yn llythrennol, yn gorwedd rhwng y mor a’r mynydd- gwnewch yn fawr o’r ardal. Rhowch eich hun mewn sefyllfaoedd allai fod yn anghyffyrddus adegau a defnyddiwch y cyfnod unigryw yma i ddysgu pethau newydd.
Mewn un frawddeg, be oedd eich hoff beth am astudio ym Mhrifysgol Bangor?
Y bobl- boed hynny yn ffrindiau wnes i neu y staff a darlithwyr, dyma wnaeth roi y profiad unigryw a chyfoethog imi sy’n cadarnhau imi fod Prifysgol Bangor yn le unigryw ac arbennig.
It looks like you’re visiting from outside the UK, would you like to be redirected to the international page?