Diogelwch yn y Labordy - Defnyddio Offer yn Ddiogel

Nid sylweddau peryglus yw'r unig risgiau wrth weithio mewn labordai. Mae hefyd nifer o eitemau o offer, a all achosi anafiadau os na chânt eu defnyddio'n iawn, ac mewn rhai amgylchiadau gallant hyd yn oed beri difrod i eiddo.

Er mwyn eich helpu chi ddefnyddio'r offer mwyaf cymhleth, lluniwyd y Taflenni Gwybodaeth canlynol ac Asesiad Risg Enghreifftiol y Labordy. Y gobaith yw y bydd y rhain yn rhoi arweiniad ymarferol manwl i'r staff a'r myfyrwyr ynglŷn â defnyddio eitemau penodol o offer y labordy'n ddiogel.

Caiff Taflenni Gwybodaeth "Diogelwch y Labordy" eu hychwanegu fel bo'n briodol.

HYSBYSIAD ARBENNIG

Systemau Echdynnu Hunangynhwysol

Gwyddoch am y rheidrwydd i brofi a chynnal a chadw'r holl systemau “awyru a gwacáu lleol” (LEV) cymwys o dan Reoliadau COSHH a gwyddoch hefyd fod angen cynnal y profion hynny o leiaf unwaith bob 14 mis. Ar gyfer systemau pibellog, fel y cypyrddau gwyntyllu traddodiadol, sydd fel arfer â phibellau sy'n gwacáu ar y to, bydd yr ystadau (Gwasanaethau Campws) fel arfer yn ymgymryd â'r gwasanaeth hwn ar eich rhan (gwerthfawrogir bod gan rai systemau echdynnu gronynnol yn y gweithdai drefniadau gwahanol).

Ar gyfer y mwyafrif o “systemau pibellog” (gyda rhai eithriadau lleol) y cyfan sy'n ofynnol yn gyffredinol gan yr Ysgolion a'r Adrannau yw i geisio cadarnhad bod y Cwpwrdd Gwyntyllu (er enghraifft) “yn dal o fewn dyddiad y prawf”, ei ddefnyddio'n gywir a sicrhau bod yr unedau oll yn gweithio'n ddiogel yn barhaus, fel y nodir yn Nhaflen Wybodaeth 6 (gweler uchod).

Fodd bynnag, dros y blynyddoedd prynodd llawer o Ysgolion ac Adrannau systemau/cypyrddau echdynnu hidlo hunangynhwysol, nad ydynt yn bibellog a rhaid nodi'n glir na fydd Gwasanaethau Campws yn cynnal yr arolygiadau a'r profion statudol ar yr Unedau hynny - oherwydd mai Cyfarpar yr Ysgol/Adran ydynt ac nad ydynt yn rhan o seilwaith yr adeiladau. Felly, rhaid i'r Ysgolion a'r Adrannau sicrhau eu bod yn cyflawni'r profion cyfyngiant/gweithredol priodol o leiaf bob 14 mis, a gweithredu a chynnal yr Unedau/Systemau'n unol â chyfarwyddiadau'r gwneuthurwr.

Oherwydd bod yr unedau hyn yn ailgylchredeg, mae'n bwysicach fyth eu cynnal a'u cadw, eu profi a'u gweithredu'n gywir ac yn unol â'u dyluniad a gofynion y gweithgynhyrchwyr.

Ar gyfer Unedau fel y Cabinetau Microbiolegol, byddai'r profion priodol fel arfer yn cael eu gwneud gan arbenigwr gwasanaeth allanol, fel rhan o'r ailardystio ar y Cabinetau i'w defnyddio'n ddiogel lle mae organebau Grŵp Haz 2/3 yn y cwestiwn.

Dylai'r holl systemau sy'n ailgylchredeg, a ddarperir gyda'r bwriad o echdynnu/hidlo sylweddau peryglus, gael eu cofrestru'n lleol, dylid nodi'r wybodaeth am brofi ac arolygu a darparu copi o'r atodlen i'r Iechyd a Diogelwch o leiaf unwaith y flwyddyn.

Cofiwch y caiff yr holl systemau echdynnu (gyda phibellau a heb bibellau) a ddarperir at y diben o echdynnu unrhyw sylweddau neu ddeunyddiau a allai fod yn beryglus oddi wrth bobl eu rheoli o dan amodau Rheoliadau COSHH a rhaid eu cynnal a'u cadw, eu profi a'u harolygu. Byddai hynny'n cynnwys bythau chwistrellu a hwdiau, cypyrddau cemegol a biolegol, systemau echdynnu mwg weldio, Systemau Gwacáu/Hidlo sydd ynghlwm wrth offer gwaith coed, ac yn y blaen, p'un a ydynt yn bibellog neu'n hunangynhwysol.

Nid yw systemau cyffredinol y mae iddynt 'arogleuon amgylcheddol ac annymunol' ac yn y blaen, fel ffaniau vent-axia, aerdymheru, symudwyr aer, systemau rheoli llwch, cwfliau popty, o dan y gofynion hyn fel rheol gan na chawsant eu cynllunio i echdynnu sylweddau peryglus yn unol â Rheoliadau COSHH.