Athroniaeth, Moeseg a Chrefydd

Ym Mhrifysgol Bangor rydym yn cynnig dull unigryw o astudio Athroniaeth, Moeseg a Chrefydd trwy ein 'Llwybr Addysg Grefyddol' arbenigol. Mae’r radd hon wedi ei theilwra i fyfyrwyr sy'n ystyried mynd i ddysgu ym maes athroniaeth neu astudiaethau crefyddol, ac mae’n ganlyniad ymdrech ar y cyd rhwng y gyfadran Athroniaeth, Moeseg, a Chrefydd a'r Ganolfan Genedlaethol Addysg Grefyddol yng Nghymru.

Mae’r Llwybr Addysg Grefyddol wedi ei gynllunio i’ch arfogi â dealltwriaeth gynhwysfawr o’r deunydd pwnc, gan sicrhau eich bod wedi eich paratoi’n drylwyr at ddysgu athroniaeth a chrefydd yng Nghyfnodau Allweddol 3, 4, a 5 yn y dyfodol. Mae'r cwricwlwm yn cynnwys archwiliad o chwe phrif grefydd y byd, athroniaeth crefydd, a moeseg normadol a chymhwysol. Nod y dull cyfannol hwn yw dyfnhau eich gwybodaeth a meithrin sylfaen gadarn at ddyfodol ym myd addysg.

Byddwch yn gallu teilwra eich gradd i gyd-fynd â'ch diddordebau trwy amrywiaeth o fodiwlau dewisol. Bydd hyblygrwydd y radd yn eich galluogi i ymchwilio'n ddyfnach i bynciau sydd o ddiddordeb i chi neu sy'n cyd-fynd â’ch dyheadau proffesiynol. O'ch blwyddyn gyntaf, byddwch yn gallu canolbwyntio ar bynciau athroniaeth, moeseg a chrefydd sy'n apelio atoch.

Rydym yn cynnig cwricwlwm amrywiol a diddorol. Gallwch ddysgu am agweddau amlochrog athroniaeth, moeseg ac astudiaethau crefyddol trwy gydol eich gradd.

Ym maes athroniaeth, gallwch astudio traddodiadau dadansoddol a chyfandirol, gan feithrin sgiliau dadansoddol trwy bynciau fel athroniaeth hynafol ac athroniaeth crefydd. Byddwch yn datblygu'r gallu i lunio dadleuon rhesymegol tra'n ymgysylltu'n feirniadol â gweithiau athronwyr dylanwadol fel Plato, Aristotle a Wittgenstein. Gallwch ymchwilio i bynciau fel athroniaeth ddirfodol a chwestiynu ystyr bodolaeth ddynol yng nghyd-destun gweithiau Nietzsche, Sartre a de Beauvoir.

Wrth astudio moeseg, gallwch ymchwilio i bynciau fel moeseg gymhwysol, materion byd-eang o bwys mawr fel hawliau dynol, rhyw a rhywioldeb, canibaliaeth, artaith, yr argyfwng ffoaduriaid, a deallusrwydd artiffisial.

Mae astudio crefydd yn caniatáu ichi ddysgu am sbectrwm eang o grefyddau'r byd, gan gynnwys Cristnogaeth, Bwdhaeth, Islam, Paganiaeth a Hindŵaeth.

Rydym hefyd yn ymdrin â phynciau unigryw, megis llofruddion cyfresol a bwrw allan cythreuliaid, sy’n dod ag elfennau o athroniaeth, moeseg a chrefydd ynghyd ac yn cynnig profiad academaidd cyffrous ac arbennig.

Yn ein rhaglen radd, rydym yn enyn diddordeb myfyrwyr trwy gynnwys amrywiaeth o siaradwyr gwadd diddorol sy'n taflu goleuni ar berthnasedd athroniaeth, moeseg a chrefydd yn y byd go iawn. Mae arbenigwyr cyfreithiol wedi rhannu eu profiadau yn delio â llofruddion cyfresol, gan ddarparu gwybodaeth werthfawr am y cysylltiad rhwng cyfraith a moesoldeb.

Rydym hefyd wedi croesawu bwrwyr cythreuliaid sy'n rhannu eu profiadau yn y weinidogaeth ymwared, gan gynnig safbwyntiau ar y ddealltwriaeth gyfoes o feddiant gan gythreuliaid. Mae arweinwyr crefyddol o gefndiroedd amrywiol, gan gynnwys Derwyddon, Hindŵiaid, Jedis a mynachod Bwdhaidd, wedi cyfrannu at drafodaethau ar sut mae eu ffydd yn siapio eu bywydau ac yn llywio eu hymatebion i unrhyw gyfyng-gyngor moesol. Mae’r sgyrsiau difyr hyn yn helpu i gyfoethogi’r profiad dysgu, gan gysylltu cysyniadau damcaniaethol â phrofiadau ymarferol, byw, a meithrin archwiliad deinamig o effaith athroniaeth, moeseg a chrefydd ar y byd o’n cwmpas.

Ym Mangor, rydym wedi lleihau nifer yr arholiadau sy’n rhaid i fyfyrwyr eu sefyll, ac yn lle hynny rydym yn dewis amrywiaeth eang o aseiniadau difyr gyda'r nod o arddangos gwybodaeth a meithrin sgiliau cyflogadwyedd hanfodol.

Trwy gydol eich astudiaethau, byddwch yn gwneud asesiadau amrywiol megis traethodau, astudiaethau achos, adolygiadau ffilm a dadansoddiadau testun, ac yn mireinio eich gallu i fynegi syniadau mewn gwahanol arddulliau.

Yn dibynnu ar y modiwlau byddwch yn eu dewis, cewch gyfle i ymgolli mewn aseiniadau creadigol, llunio rhestri caneuon neu greu podlediadau, er enghraifft. Mae rhoi cyflwyniadau llafar neu gymryd rhan mewn gweithgareddau ar ffurf dadl yn gwella eich sgiliau cyfathrebu a meddwl yn feirniadol ymhellach. Mae pob aseiniad wedi ei gynllunio i gyfrannu at ddatblygu sgiliau cyflogadwyedd a chyfoethogi eich CV, gan eich paratoi at bontio’n llwyddiannus i’r byd proffesiynol.