Effaith cam-drin ariannol ar achosion ysgariad

Cam-drin domestig a thrais

Deddf Cam-drin Domestig 2021

 Yn 2021, darparodd llywodraeth y DU ddiffiniad o gam-drin domestig yn y Ddeddf Cam-drin Domestig.

Mae ymddygiad yn ddifrïol os yw'n cynnwys unrhyw un o'r canlynol:

(a) cam-drin corfforol neu rywiol;

(b) ymddygiad treisgar neu fygythiol;

(c) ymddygiad sy'n rheoli neu'n gorfodi;

(ch) cam-drin economaidd;

(d) cam-drin seicolegol, emosiynol neu gam-drin arall;

Mae'n rhaid i'r troseddwr a'r dioddefwr fod yn gysylltiedig â'i gilydd, a phob un yn 16 oed neu'n hŷn. 

Cyn y diffiniad hwn, roedd cam-drin ariannol yn aml yn cael ei anwybyddu er yr awgrymwyd bod un o bob chwe menyw yn y Deyrnas Unedig wedi profi cam-drin ariannol mewn perthynas gyfredol neu flaenorol.

Cam-drin ariannol a'i effeithiau

Diffinnir cam-drin economaidd fel:

“unrhyw ymddygiad sy’n cael effaith sylweddol ar allu’r partner sy’n cael ei gam-drin i gaffael, defnyddio, neu gynnal arian neu eiddo arall neu gael nwyddau neu wasanaethau.” Mae'r gyfraith yn cydnabod y gallai'r cam-drin hwn olygu efallai na fydd y partner dibynnol yn gallu gadael y berthynas.

Os bydd y dioddefwr yn dod allan o'r berthynas ac yn penderfynu cychwyn achos ysgariad, efallai y bydd hefyd yn profi'r un math o ymddygiad. Gallai hyn olygu bod y sawl sy’n cyflawni’r drosedd yn cuddio rhai asedau penodol, neu’n eu tanbrisio, gan arwain at amddifadu’r partner sy’n cael ei gam-drin o rwymedïau ariannol. 

Os yw parti wedi profi cam-drin domestig, yna efallai y bydd ganddynt hawl i gymorth cyfreithiol. Byddai cyfreithiwr yn gallu helpu’r dioddefwr i oresgyn y math hwn o gamdriniaeth a allai gynnwys gofyn i’r llys am orchmynion, megis gorchmynion rhewi i atal gwerthu cartref y teulu er enghraifft.

Nawr bod cam-drin ariannol yn cael ei gydnabod mewn diffiniad statudol, gall y dioddefwyr elwa ar fwy o amddiffyniad ac adnoddau cyn, yn ystod, ac ar ôl yr achosion ysgaru, i sicrhau nad ydynt bellach yn ddibynnol ar y partner sydd yn cam-drin. 

Mae Clinig Cyngor Cyfreithiol Prifysgol Bangor yn cynnig cyngor cyfreithiol am ddim ar bob mater o ysgariad a thrais domestig. Os hoffech apwyntiad, ffoniwch 01248 388411 neu e-bostiwch Bulac@bangor.ac.uk