Ynglŷn â’r Cwrs Yma
Mae cwrs Meistr mewn Ieithyddiaeth Prifysgol Bangor ar gyfer myfyrwyr sydd â gradd israddedig mewn unrhyw bwnc ac sy’n dymuno cael cymhwyster mewn ieithyddiaeth. Gall myfyrwyr sydd â BA mewn Ieithyddiaeth gael eu heithrio o bosib rhag astudio modiwlau gorfodol y maent eisoes wedi eu hastudio fel rhan o'u gradd gyntaf, neu efallai y byddai’n well ganddynt ddilyn un o'r graddau MA eraill a gynigir gan yr Ysgol.
Rydym yn Adran gyfeillgar ac agos-atoch gyda staff sy’n frwd dros drosglwyddo eu harbenigedd a’u gwybodaeth am y pwnc ac rydym yn ymrwymo i ddarparu profiad dysgu o’r ansawdd uchaf i’r myfyrwyr. Mae ein hymchwil yn llywio ein darpariaeth addysgu ar bob lefel, ac mae’r myfyrwyr yn elwa ar frwdfrydedd staff sydd ar flaen y gad ym maes ymchwil a datblygiadau academaidd. Mae ein staff wedi ymrwymo i ddarparu profiad rhagorol i fyfyrwyr gyda chefnogaeth gref bersonol i’r myfyrwyr trwy gydol eu hastudiaethau MA mewn Ieithyddiaeth.
Yn dilyn yr elfennau hyfforddedig bydd myfyrwyr y radd hon yn cwblhau project traethawd hir annibynnol lefel Meistr ar sail ymchwil. Mae staff yr Adran yn cynnig goruchwyliaeth bersonol a chefnogaeth academaidd ragorol ar gyfer traethodau hir ar amrywiaeth eang o bynciau ym maes caffael a datblygiad iaith gan ddefnyddio fframweithiau methodolegol cymhwysol, damcaniaethol, arbrofol, ethnograffig neu ar sail corpws. Mae’r rhain yn cynnwys ond heb gael eu cyfyngu i:
- seicoieithyddiaeth
- caffael iaith plant
- caffael ail iaith
- dadansoddi disgwrs
- TEFL (dysgu Saesneg fel iaith dramor)
- caffael ail iaith (SLA) ac addysgu iaith
- ieithyddiaeth corpws
- iaith a chyfathrebu
- ffoneteg a ffonoleg
- morffogystrawen
- semanteg a phragmateg
- ieithyddiaeth hanesyddol
- amrywio a newid iaith
- iaith a chyfathrebu
- dwyieithrwydd ac amlieithrwydd
- anhwylderau iaith
- Dadansoddi Disgwrs Gwybyddol (CoDA)
- ieithyddiaeth Gymraeg
- technolegau iaith / prosesu iaith naturiol (NLP).
Gall myfyrwyr ar ein cwrs MA Ieithyddiaeth ddefnyddio cyfleusterau dysgu o’r radd flaenaf sy’n cynnwys:
- Stiwdio sain/recordio a labordy lleferydd o safon broffesiynol (gydag offer recordio Yamaha, Alesis a RØDE)
- Labordy olrhain llygaid (gyda thraciwr llygaid Tobii Pro X2-60)
- Labordy potensial digwyddiad-berthynol (ERP) (gyda pheiriant actiCHamp Plus ERP)
- A meddalwedd ac adnoddau ieithyddiaeth corpws pwrpasol.
Mae ein staff hefyd yn arbenigwyr yn y meysydd canlynol a gallant gynnig cefnogaeth ynddynt:
- Meddalwedd ystadegol megis: SPSS, R-Statistics ac Excel.
- Meddalwedd seicoleg arbrofol fel E-Prime, GORILLA Experiment Builder, Open Sesame a Webexp.
- Meddalwedd dadansoddi acwstig a seinegol fel: Audacity, Praat, a SIL Speech Analyzer
- Profion seicometrig / iaith safonol (e.e. EVT, BPVS, NARA, WISC, K-BIT, TROG, CELF)
- Amrywiaeth eang o feddalwedd corpws a choncordans arbenigol gan gynnwys CHILDES a CLAN
Ym Mangor byddwch yn rhan o gymuned ymchwil fywiog ac arloesol a gefnogir gan wahanol ddigwyddiadau trwy gydol y flwyddyn, gan gynnwys sgyrsiau unigol, seminarau a gweithdai anffurfiol a chynadleddau mawr. Mae llawer o'r rhain yn agored nid yn unig i staff academaidd, ond hefyd i fyfyrwyr ac i'r cyhoedd.
Fy enw i ydi Elham Taheri, ac roeddwn yn astudio ieithyddiaeth gymhwysol ar gyfer TEFL i ddysgu Saesneg fel iaith dramor.
Yn gyntaf oll, mi wnes i fwynhau cael fy nysgu gan athrawon proffesiynol iawn.
Wrth gwrs, rydw i wedi astudio Saesneg yn y gorffennol, ond y tro yma roedd yn fwy proffesiynol ac roeddwn wrth fy modd efo hynny.
Mae'n lle clos a chyfeillgar.
Ac roedd y cwrs, oherwydd bod ganddo rannau damcaniaethol a rhan ymarferol, yn help mawr i mi.
Rydw i wedi dysgu llawer, nid yn unig yn y dosbarthiadau ond hefyd yn y sesiynau ymarferol, a defnyddio'r damcaniaethau oedd yn cael eu defnyddio yn fy nosbarthiadau.
Ac fel y dywedais, oherwydd yr athrawon proffesiynol sydd yma, rydw i wedi dysgu llawer
Ar hyn o bryd, yn union. Ar ôl i mi orffen fy nghwrs yma, symudais i Lundain ac roeddwn yn ddigon ffodus i gael swydd mewn coleg yn Llundain.
Doeddwn i ddim yn meddwl y byddai mor hawdd â hynny, ond yn ddigon ffodus oherwydd fy mod yn graddio o Brifysgol Bangor,
roedd yn hawdd i mi ddod o hyd i swydd ac roeddwn wrth fy modd gyda fy swydd fel athro.
Cynnwys y Cwrs
Beth fyddwch chi’n ei astudio ar y cwrs yma?
Modiwlau Gorfodol
Sylfeini Ieithyddiaeth - Mae'r modiwl hwn yn cynnig trosolwg o ddisgyblaeth gwyddor iaith. Mae’n ymdrin yn benodol â syniadau a methodolegau allweddol wrth astudio ystyr, gramadeg a sain. *Gall myfyrwyr sydd wedi gwneud gwaith cwrs blaenorol mewn ieithyddiaeth o bosib hepgor Sylfeini Ieithyddiaeth ac ennill y nifer cyfatebol o gredydau o restr o Fodiwlau Dewisol*.
Dulliau Ymchwil Ieithyddiaeth - Mae’r modiwl hwn yn darparu’r sylfeini, yr hyfforddiant a’r offer angenrheidiol i gynllunio a chyflawni ymchwil ansoddol, meintiol, arbrofol neu ethnograffig mewn ieithyddiaeth, yn ogystal â’r hyfforddiant a’r profiad i ddatblygu, cynllunio a chyflawni project traethawd hir annibynnol ar lefel Meistr ar sail ymchwil, gan ddefnyddio confensiynau arferol llenyddiaeth ieithyddiaeth / ieithyddiaeth gymhwysol.
Traethawd Hir MA/MSc - Yn y modiwl hwn bydd y myfyrwyr yn cyflawni darn o waith ymchwil unigol ar raddfa fechan sy’n arwyddocaol, ac ar lefel uwch, ac yn ysgrifennu traethawd hir 15-20,000 o eiriau arno. Pennir aelod staff â diddordebau ymchwil sydd â'r cysylltiad gorau a/neu agosaf i'r testun yn oruchwyliwr ar y myfyriwr. Bydd y goruchwyliwr yn cynorthwyo'r myfyriwr i ganolbwyntio ar gwmpas, methodoleg a chynnwys eu traethawd hir, yn ogystal â chynnig cyngor trwy gydol y project. O dan gyfarwyddyd y goruchwyliwr, bydd y myfyrwyr yn canolbwyntio ar gwestiwn eu hymchwil ac yn ei fireinio, ynghyd ag archwilio deunyddiau darllen perthnasol, yn cynllunio'r project, penderfynu ar fethodoleg, ystyried yr angen am gymeradwyaeth foesegol a gweithredu'n unol â hynny, yn casglu a dadansoddi data (gan ddibynnu ar natur yr ymchwil) gan ddefnyddio fframwaith dadansoddol priodol, ac yn ysgrifennu traethawd hir am y project a fydd yn mynd i’r afael â'r cwestiwn ymchwil yng ngoleuni'r canfyddiadau.
Modiwlau Dewisol
Mae’r modiwlau’n amrywio o’r naill flwyddyn i’r llall, ac yn cynnwys:
- Iaith a Chyfathrebu
- Ieithyddiaeth Hanesyddol
- Seicoieithyddiaeth
- Newid Iaith
- Cysylltiad Iaith a Dwyieithrwydd
- Caffael Iaith Plant
- Anhwylderau Iaith a Dwyieithrwydd
- Dwyieithrwydd a Materion Caffael
- Gwyddor Lleferydd
- Ffonoleg a Chaffael Dwyieithrwydd
- Dysgu Siarad Ail Iaith
- Ieithyddiaeth Gymraeg
- Dadansoddi Disgwrs Gwybyddol
- Defnyddio Corpora: Theori ac Ymarfer
- Theori Saesneg fel Iaith Dramor
- Caffael Ail Iaith ac Addysgu Iaith
- Addysgu Saesneg fel Iaith Dramor
- Technolegau Iaith
Efallai y gofynnir i rai nad ydynt yn siaradwyr Saesneg brodorol ddilyn cyrsiau di-gredyd gydag ELCOS i'w cynorthwyo gyda'u Saesneg, oni chânt eu heithrio gan eu tiwtor.
Syniad bras o gynnwys y cwrs yn unig a geir yma a gall newid
Modiwlau ar gyfer y flwyddyn academaidd gyfredol
Mae’r rhestrau modiwlau ar gyfer eich arwain yn unig ac fe allant newid. Cymerwch olwg ar yr hyn y mae ein myfyrwyr yn ei astudio ar hyn o bryd ar tudalen Modiwlau Ieithyddiaeth.
Mae cynnwys y cwrs wedi’i nodi i’ch arwain yn unig ac fe all newid.
Gofynion Mynediad
Gradd israddedig 2.ii neu gyfwerth mewn pwnc perthnasol (e.e. Ieithyddiaeth, Ieithoedd Modern, Cyfieithu, Seicoleg, Iaith/Llenyddiaeth Saesneg, Addysg Saesneg/Addysg Iaith Saesneg).
Bydd ymgeiswyr sydd â chymwysterau neu brofiad cyfwerth a cheisiadau gan weithwyr proffesiynol nad oes ganddynt radd yn cael eu hystyried fesul un. Mae croeso i chi gysylltu â ni am fwy o wybodaeth.
Yn achos y myfyrwyr hynny nad yw Saesneg yn iaith gyntaf iddynt, bydd arnynt angen sgôr IELTS o 6.0 o leiaf (heb i unrhyw elfen fod yn is na 5.5).
Gyrfaoedd
Bydd MA mewn Ieithyddiaeth yn rhoi dealltwriaeth fanwl i chi o sut mae iaith yn gweithio ynghyd â'r gallu i gynnal ymchwil ar wahanol lefelau o ddadansoddiad ieithyddol. Mae graddedigion yn dod o hyd i gyfleoedd gyrfa mewn cyfathrebu, addysgu, cyhoeddi, ymchwil. Mae'r sgiliau trosglwyddadwy a geir o astudio'r rhaglen hon yn fuddiol mewn amrywiaeth o yrfaoedd eraill, gan gynnwys hysbysebu, newyddiaduraeth, ymgynghori ac ati. Yn dilyn cwblhau'r MA mewn Ieithyddiaeth yn llwyddiannus efallai y byddwch yn penderfynu dilyn gyrfa academaidd mewn Ieithyddiaeth, trwy wneud cais i astudio am PhD mewn Ieithyddiaeth.
