Dyma rai o’n hawgrymiadau ar sut i ddefnyddio’r we, apiau a chyfryngau cymdeithasol i wneud cysylltiadau â’ch prifysgolion ddewisol.
Digwyddiadau ar-lein neu rhithwir
Mae llawer o brifysgolion yn cynnal digwyddiadau ar-lein neu rithwir. Mae'r rhain yn ffordd wych i chi gysylltu â myfyrwyr, darlithwyr a staff eraill a dyma'r peth gorau nesaf i fynychu diwrnod agored. Mae'r mathau hyn o ddigwyddiadau yn amrywio o ddiwrnodau agored rhithwir - sy'n cynnwys dolenni byw, fideos, a theithiau 360 - i ddigwyddiadau sgwrsio byw gyda sesiynau holi ac ateb. Gall y pynciau a drafodir amrywio o wybodaeth am gyrsiau a bywyd myfyriwr i gyllid a llety myfyrwyr.
Dilynwch brifysgolion ar gyfryngau cymdeithasol
Gallwch ddarganfod y newyddion diweddaraf a chadw golwg ar unrhyw wybodaeth bwysig, megis diwrnodau agored sydd ar y gweill, trwy edrych ar dudalennau cyfryngau cymdeithasol.
Mae Instagram, TikTok a YouTube hefyd yn ffynhonnell ardderchog o bob math o fideos - o fideos myfyrwyr i rai penodol am gyrsiau. Ac edrychwch am luniau a fideos o lleoliad y brifysgol, fel y gallwch weld sut le yw'r campws a'r ardal gyfagos.
Sgwrsio â myfyrwyr ar-lein
Mae llawer o brifysgolion yn caniatáu ichi gysylltu â myfyrwyr ar-lein, naill ai ar eu gwefan eu hunain neu trwy'r platfform Unibuddy ar wefan UCAS. Mae myfyrwyr cyfredol yn gwybod yn union sut yr ydych yn teimlo a gallant gynnig cyngor gwych ar astudio, bywyd myfyrwyr, llety a llawer mwy.
Mae rhai prifysgolion hefyd yn cynnig llwyfannau Sgwrsio Grŵp Cymunedol. Os byddwch yn gwneud cais i Brifysgol Bangor ac yn cael cynnig lle yma, fe'ch gwahoddir i ymuno â'n cymuned o ymgeiswyr sydd yn dal cynnig ar ein ap Bangor CampusConnect, lle byddwch yn gallu sgwrsio â'n llysgenhadon myfyrwyr a chysylltu â ymgeiswyr eraill.
Dewch â'ch holl ymchwil at ei gilydd
Ar ôl i chi orffen eich ymchwil a'ch bod yn hapus â'ch dewisiadau prifysgol a chwrs, gwnewch yn siŵr bod yr holl wybodaeth sydd ei hangen arnoch wedi'i chadw mewn un lle. Yna gallwch ddod â phopeth at ei gilydd a phwyso a mesur eich opsiynau cyn penderfynu ar eich dewisiadau terfynol ar gyfer eich Cais UCAS.