Hyrwyddo Darganfyddiad Gwyddonol
Wrth wraidd ein cenhadaeth mae ymrwymiad i wneud ymchwil cydweithredol sy’n torri tir newydd yn y gwyddorau ymddygiadol. Trwy feithrin partneriaethau â diwydiant, sefydliadau ymchwil, cyrff anllywodraethol a llywodraethau, rydym yn archwilio dulliau newydd o ddylanwadu ar ymddygiad dynol a rhoi newid cadarnhaol ar waith.
Pontio’r Bwlch
Mae Canolfan Newid Ymddygiad Cymru’n arwain o ran defnyddio gwybodaeth sefydledig am newid ymddygiad i fynd i’r afael â heriau'r byd go iawn. Rydym yn gweithio'n agos â sefydliadau i roi polisïau ac ymyraethau sy'n seiliedig ar dystiolaeth ar waith sy'n grymuso eu gweithlu a'u cwsmeriaid. Rydym yn canolbwyntio ar greu atebion a all ddatblygu’n gyflym ac ehangu'r sylfaen wybodaeth bresennol am yr hyn sy'n gweithio, ble, a sut.
Hysbysu Polisi
Melin drafod flaenllaw yw Canolfan Newid Ymddygiad Cymru sy’n darparu safbwynt y gwyddorau ymddygiadol i lunwyr polisïau ynglŷn â heriau a chyfleoedd cyfoes y byd go iawn. Rydym yn defnyddio ein harbenigedd i hysbysu’r broses o wneud penderfyniadau ac ysgogi newid sy'n cael effaith ar lefelau uchaf y llywodraeth.
Yng Nghanolfan Newid Ymddygiad Cymru, rydym yn cydnabod bod newid ymddygiad yn amlweddog, gan gwmpasu ysgogwyr ymwybodol ac isymwybodol. Mae ein hymagwedd yn cydnabod grym perswadio, gosod nodau, a ffurfio arferion, gan hefyd archwilio dylanwad sbardunau amgylcheddol ac ymatebion awtomatig. Trwy ddefnyddio’r ddealltwriaeth ddiweddaraf o ymchwil ymddygiadol a niwrowyddonol, rydym yn datblygu ymyraethau sy’n osgoi rhwystrau gwybyddol ac yn adeiladu ymddygiadau cynaliadwy a chadarnhaol.
Mae'r "bwlch bwriad-gweithredu" yn her barhaus, lle mae bwriadau da unigolion yn aml yn methu â throsi i newid parhaol. Mae Canolfan Newid Ymddygiad Cymru wedi ymrwymo i gau'r bwlch hwn, gan ddefnyddio ymchwil flaengar i ddeall y ffactorau seicolegol sydd ar waith a dyfeisio strategaethau i bontio'r bwlch rhwng dyhead a gweithredu. O fynd i'r afael â phryderon iechyd cyhoeddus megis gordewdra a ffordd o fyw sy’n golygu llawer o eistedd i hyrwyddo cynaliadwyedd amgylcheddol, mae ein gwaith yn hanfodol er mwyn grymuso unigolion a chymunedau i wneud newidiadau ystyrlon, hirdymor.
Ysgogi Newid Cadarnhaol
Mae dull arloesol Canolfan Newid Ymddygiad Cymru o newid ymddygiad wedi ei gydnabod am ei "Effaith Gadarnhaol trwy Ddylunio," fel y dangosir gan ein hymchwil gyhoeddedig.
Rydym yn parhau i archwilio mecanweithiau’r ymennydd sy’n sail i ddylanwad ymddygiadol, gyda ffocws ar emosiynau cadarnhaol, systemau gwobrwyo, ac egwyddorion damcaniaeth hunanbenderfyniad.
Trwy ddefnyddio pŵer gwyddorau ymddygiadol, mae Canolfan Newid Ymddygiad Cymru ar fin bod yn gatalydd ar gyfer newid trawsnewidiol, gan rymuso unigolion, sefydliadau a llunwyr polisi i greu dyfodol gwell, mwy cynaliadwy.
