Anogir myfyrwyr yn yr Ysgol Cyfrifiadureg a Pheirianneg Electronig i wneud interniaethau. Yn enwedig os ydynt yn berthnasol i faes astudio'r myfyriwr, mae'r interniaethau yn helpu i ddatblygu sgiliau myfyrwyr, cefnogi astudiaethau academaidd, a darparu cyfleoedd newydd i fyfyrwyr.
Cafodd yr Athro Jonathan C. Roberts (Cyfarwyddwr Effaith ac Ymgysylltu yr ysgol) sgwrs ag Adam Brotzman.
Cafodd yr Athro Jonathan C. Roberts (Cyfarwyddwr Effaith ac Ymgysylltu yr ysgol) sgwrs ag Adam Brotzman. Mae Adam yn fyfyriwr ar y rhaglen MEng Peirianneg Electronig ac wedi cwblhau rhaglen interniaeth yn ystod yr haf gydag chwmni ymgynghori dylunio electroneg o’r enw Partner Electronics.
Dros yr haf yn 2022, cefais interniaeth 10 wythnos gydag chwmni ymgynghori dylunio electroneg o’r enw Partner Electronics. Er nad yw'n rhan o'r cwrs - rwy’n ei astudio (MEng Peirianneg Electronig) - roedd y lleoliad hwn yn cyd-fynd â’r cwrs ac yn fy ngalluogi i gymhwyso fy ngwybodaeth ddamcaniaethol ar draws ystod eang o dasgau ymarferol, rhai ohonynt yn rhan o waith i gleientiaid.
Y rhan fwyaf buddiol o’r interniaeth i mi oedd cael cipolwg ar feddylfryd gweithwyr proffesiynol yn y diwydiant: eu dull o fynd i’r afael â phroblemau’r byd go iawn a dod o hyd i atebion.
Rwyf bob amser yn hoffi clywed am interniaethau, ac yn enwedig clywed am y broses o ddod o hyd i un, a allech chi ddweud mwy am eich profiadau?
Dewisais y cwmni hwn, gan ei fod yn cynnig llawer o gyfleoedd i gymryd rhan mewn gwaith ymarferol - rhywbeth rwy’n ei fwynhau ac sy’n rhoi boddhad mawr i mi pan fydd project yn cael ei gwblhau.
Cefais hyd i'r cwmni a'r lleoliad ar Gradcracker.com, ac ar ôl hynny anfonais fy CV, a llythyr eglurhaol, atynt mewn e-bost. Ychydig yn ddiweddarach, cysylltwyd â mi dros y ffôn, a rhoddwyd mwy o fanylion i mi am yr interniaeth, ac anfonwyd cwestiynau technegol ataf - rhai tasgau rhaglennu byr, a rhai tasgau dylunio cylched. Yna trafodwyd y rhain yn ystod y cyfweliad ar-lein, ynghyd â chwestiynau cyffredinol arferol mae rhywun yn eu hateb mewn cyfweliad.
Jonathan yn holi am brofiad ymarferol Adda.
Mae’n wych clywed eich bod wedi cael profiad ymarferol. Mae bob amser yn wych cael profiadau y gallwch adfyfyrio arnynt, yn nes ymlaen. Pa fath o waith wnaethoch chi yn ystod yr interniaeth?
Yn ystod yr interniaeth, gweithiais ar sawl tasg, gan gynnwys canfod diffygion a graddnodi offer cleient, prototeipio cylchedau, dylunio cadarnwedd wedi ei fewnosod, a hyd yn oed dylunio GUI (rhyngwyneb defnyddiwr graffigol) yn C#. Mae hyn wedi ychwanegu at fy set sgiliau'n sylweddol; yn bersonol, rwy'n ei chael hi'n anodd dysgu sgiliau newydd oni bai bod rhyw bwrpas allanol i'w gyflawni. O ganlyniad, roedd llawer o'r pethau a ddysgais yn rhai ymarferol: defnyddio IDEs (amgylcheddau datblygu integredig), a sut i gymhwyso terfynellau crimp yn gywir i ddwy wifr ar unwaith, er bod rhain yn enghreifftiau hollol wahanol.”
Cefais hefyd gyfle i ddod i ddeall yr amgylchedd gwaith yno. Cefais fy ngwneud yn rhan o’r tîm yno’n gyflym. Gofynnwyd i mi hefyd aros mewn cysylltiad gan y buasent yn “hoffi gweithio gyda fi eto” – gallwch ddehongli hynny fel y mynnwch.
Mae Jonathan yn gofyn, felly beth nawr?
Mae hynny'n swnio'n wych. Mae’n wych clywed eich bod wedi cael eich derbyn fel rhan o’r tîm. Beth ydych yn ei wneud ar hyn o bryd, a beth yw eich camau nesaf?
Rwyf yn ôl yn y brifysgol yn cwblhau blwyddyn olaf y cwrs. Ar ôl yr interniaeth, rwy’n deall yn well o lawer sut i fynd i’r afael â thasgau, yn enwedig o ran cymryd cam yn ôl a chynllunio, yn hytrach na neidio’n syth i mewn heb unrhyw syniad clir o’r hyn rwy’n mynd i’w wneud.
Adam yn chwilio am y dyfodol
Rwyf hefyd wedi cael, ac wedi derbyn, cynigion gan y brifysgol i wneud interniaeth arall. Y tro hwn gyda Dr Cristiano Palego, i astudio cynaeafu ynni. Rwyf hefyd wedi derbyn lleoliad ymchwil rhan-amser ar y cyd â'r adran laser i edrych ar drin amrywiol fathau o hadau gyda laser – a byddaf yn cael fy nhalu am y ddwy interniaeth.”