Yn ddiweddar, cynhaliodd Prifysgol Bangor Gynhadledd Flynyddol OR66 y Gymdeithas Ymchwil Gweithredol, gan groesawu tua 300 o gynrychiolwyr o bedwar ban byd. Roedd y digwyddiad yn llwyddiant aruthrol, gan gyfuno cyfraniadau gan academyddion ac ymarferwyr ym maes Ymchwil Gweithredol, a meithrin cyfnewid gwybodaeth feirniadol ar draws sectorau.
Cyd-gadeiriwyd y gynhadledd gan Dr Mosab Bazargani, Darlithydd mewn Gwyddor Data a Deallusrwydd Artiffisial o’r Ysgol Cyfrifiadureg a Pheirianneg. Roedd yn cynnwys 23 o ffrydiau cyfochrog a sawl sesiwn nodedig, gan gynnwys y paneli “Gwneud Effaith” a thrafodaeth ar “Gyfnewid Gwybodaeth Rhwng y Byd Academaidd, Diwydiant a Llywodraeth”. Roedd y sesiynau hyn yn cynnwys cyfraniadau allweddol gan yr Athro Paul Spencer; y Dirprwy Is-ganghellor Ymchwil, a Dr Gilbert Owusu; Cyfarwyddwr Data a Deallusrwydd Artiffisial gyda BT a Llywydd y Gymdeithas Ymchwil Gweithredol. Roedd y digwyddiad yn tanlinellu pwyslais Bangor ar atebion byd go iawn a chyfrifoldeb cymdeithasol, gyda thrafodaethau yn cynnwys ffigurau amlwg fel Chris Roberts - cyd-sylfaenydd Timau Pêl-droed Cymunedol Dreigiau Gogledd Cymru ac aelod o Banel Cynghori Cynaliadwyedd Cymdeithas Bêl-droed Cymru.
Dywedodd yr Athro William Heath, Pennaeth yr Ysgol Cyfrifiadureg a Pheirianneg,
arparodd cynhadledd OR66 ym Mhrifysgol Bangor lwyfan ardderchog ar gyfer cyfnewid gwybodaeth ym maes ymchwil gweithredol a gwyddor data, gan feithrin cydweithrediad rhwng y byd academaidd a diwydiant. Amlygodd le hanfodol y disgyblaethau hyn wrth ddatrys heriau’r byd go iawn, gan atgyfnerthu ein hymrwymiad i weithio gyda phartneriaid yn y diwydiant i ysgogi arloesedd a chreu effaith.
Yn ei anerchiad agoriadol, pwysleisiodd yr Is-ganghellor yr Athro Edmund Burke gyfraniadau hanesyddol Bangor i’r maes, gan gynnwys gwaith arloesol yr Athro George Hartley Bryan ym maes hedfan. Nododd hefyd ymrwymiad hirsefydlog y Brifysgol i ofal iechyd, datblygu cynaliadwy, a chydbwysedd rhwng y rhywiau - themâu a atseiniai drwy gydol y digwyddiad. Meddai, "Mae Ymchwil Gweithredol yn ganolog i ddatrys problemau'r byd go iawn, a bydd y gynhadledd hon yn mynd i'r afael ag ystod eang o faterion dybryd fel amaethyddiaeth gynaliadwy, iechyd y cyhoedd ac arwain arloesi yn y sector preifat".
Yn ogystal â’r sesiynau a’r trafodaethau difyr, roedd y gynhadledd yn cynnwys siaradwyr gwadd o sefydliadau blaenllaw, gan gynnwys Dr Jeroen Mulder (Air France-KLM), yr Athro Sanja Petrovic (Llywydd etholedig y Gymdeithas Ymchwil Gweithredol), a’r Athro Michel Gendreau (cyn-lywydd Cymdeithas Ymchwil Gweithredol Canada). Uchafbwynt arall oedd cystadleuaeth fawreddog Medal y Llywydd, a ddyfarnwyd i’r Smith Institute am eu gwaith eithriadol gyda chwmni’r National Grid ESO, gan arbed o bosibl dros 300 megawat o ynni wrth gefn bob hanner awr.
Ni fyddai llwyddiant OR66 wedi bod yn bosibl heb ymdrechion diflino’r pwyllgor trefnu, staff ymroddedig y Brifysgol, a’n myfyrwyr oedd yn gwirfoddoli. Diolch yn arbennig i Dr Mosab Bazargani, Llŷr Aled Hughes (Pennaeth Gwasanaethau Cwsmer a Chefnogi Busnes), ac Ingrid Pedersen (Swyddog Digwyddiadau Corfforaethol) am eu gwaith allweddol yn gwneud y digwyddiad yn llwyddiant.
