Daeth Wythnos y Glas 2024 i ben mewn ffordd gyffrous. Croesawodd yr ysgol ei charfan ddiweddaraf o lasfyfyrwyr i’r cyrsiau cyfrifiadureg, peirianneg electronig, dylunio cynnyrch a pheirianneg. Cynlluniwyd yr wythnos i helpu myfyrwyr i ymgartrefu ac ymgyfarwyddo â’u hamgylchedd newydd. Roedd yr wythnos yn llawn o weithgareddau difyr, digwyddiadau creadigol, cyflwyniadau academaidd, a heriau gwefreiddiol.
Un o ddigwyddiadau mwyaf creadigol yr wythnos oedd myfyrwyr yn dod at ei gilydd mewn timau i gymryd rhan mewn cystadleuaeth adeiladu cadair balŵn. Gan ddefnyddio balŵns lliwgar, rasiodd y myfyrwyr i adeiladu cadeiriau a allai ddal pwysau aelodau'r tîm - roedd rhai ohonynt yn fwy llwyddiannus nag eraill! Roedd yn wych gweld y creadigaethau trawiadol, y gwaith tîm da a’r sgiliau peirianneg ar waith! Yna cafodd y myfyrwyr bizza. Roedd yn ddechrau perffaith i'r wythnos
.Ganol yr wythnos, cafodd y glasfyfyrwyr gyfle i ddysgu am eu cyrsiau a chwrdd â myfyrwyr eraill a chael cyngor a hanes am y profiad o astudio ar eu cyrsiau dewisol. Wrth i'r wythnos fynd yn ei blaen, cynhaliwyd helfa sborion yn yr adeilad i roi cyfle i’r myfyrwyr newydd ymgyfarwyddo â’u cartref academaidd newydd. Bu timau’n cydweithio i ddod o hyd i gliwiau cudd yn adeilad Stryd y Deon, o ddarlithfeydd i nodiadau cyfrinachol a ffeithiau difyr ar ddrysau swyddfeydd y darlithwyr. I lawer o’r myfyrwyr, roedd yr helfa yn ffordd ddifyr a rhyngweithiol o ymgyfarwyddo â’r amrywiaeth o labordai, ystafelloedd darlithwyr, ystafelloedd cyffredin, cynteddau a swyddfeydd academaidd. Erbyn y diwedd, roedd gan fyfyrwyr well syniad o ble byddai eu darlithoedd a'u dosbarthiadau yn cael eu cynnal ac roeddent hefyd wedi dod i adnabod eu cyd-fyfyrwyr wrth iddynt rasio o amgylch y campws.
Un o uchafbwyntiau'r wythnos oedd Te Parti'r Hetiwr Hurt. Bu myfyrwyr a staff yn cymdeithasu ac yn cael te a chacennau a chwarae cwisiau. Roedd yn rhaid i bawb greu'r hetiau mwyaf gwallgof, gyda rhai penwisgoedd hynod greadigol a rhyfedd i’w gweld. Roedd y te parti yn llwyddiant ysgubol, a rhoddodd gyfle i fyfyrwyr gwrdd a sgwrsio â’r staff, mewn awyrgylch hwyliog ac anffurfiol.
Diweddglo mawreddog Wythnos y Glas - a gellir dadlau mai hwn oedd y digwyddiad mwyaf poblogaidd - oedd go-cartio. Cludwyd y myfyrwyr ar fws i'r trac go-cartio. Ymunodd dros 40 o gyfranogwyr yn y ras. Roedd academyddion a myfyrwyr yn gyrru o amgylch y trac mewn cystadleuaeth gyfeillgar ond ffyrnig. Roedd y digwyddiad yn llwyddiant ysgubol, ac yn ddiwedd gwefreiddiol i’r wythnos. Wrth edrych yn ôl, dywedodd llawer o’r glasfyfyrwyr bod yr wythnos yn gyfuniad perffaith o brofiadau difyr ac ymarferol. Dywedodd y myfyrwyr yn y go-cartio eu bod wedi cael andros o hwyl a bod yr helfa sborion wedi bod yn help mawr iddynt ymgyfarwyddo â chynllun y campws. Roedd eraill yn teimlo bod her y te parti a’r gadair balŵn wedi rhoi cyfle iddynt fynegi eu creadigrwydd cyn i'r gwaith academaidd ddechrau.
Roedd Wythnos y Glas 2024 yn llawn hwyl, cyfeillgarwch a chyffro am yr hyn sydd i ddod. Bydd y myfyrwyr yn symud ymlaen i’r tymor gyda chysylltiadau newydd, hyder ac atgofion o ddechrau bythgofiadwy i’w bywyd yn y brifysgol.
