Ailgylchu yn y Brifysgol

Ailgylchu ar wahân (caeadau oren/glas/coch) 

Mae'r Brifysgol yn gweithredu system ailgylchu ar wahân. Trwy wahanu ein hailgylchu fel hyn, ein nod yw gwella ein cyfraddau ailgylchu a chynhyrchu ailgylchu glanach o ansawdd uwch gyda mwy o debygolrwydd y bydd yr ailgylchu'n cael eu defnyddio yma yng Nghymru neu yn y DU.

  • Biniau hefo caeadau oren: caniau/tuniau, ffoil, aerosolau, poteli plastig, tybiau/hambyrddau/potiau plastig, caeadau cwpanau coffi, a chartonau
  • Biniau hefo caeadau glas: papur a cardfwrdd
  • Biniau hefo caeadau coch: poteli a jariau gwydr

Cofiwch rinsio'r ailgylchu os oes modd. Os ydych chi'n ailgylchu ‘wrth fynd’, gwnewch yn siŵr nad oes unrhyw fwyd na diod ar ôl yn y cynwysyddion cyn eu rhoi yn y bin ailgylchu.

Peidiwch a rhoi deunydd lapio plastig, ffilm blastig, pecynnau creision, deunydd lapio siocled, deunydd lapio melysion, hen hancesi papur, masgiau na menig defnydd un-tro yn y biniau ailgylchu. Does dim modd eu hailgylchu ar hyn o bryd, ac mae angen eu rhoi yn y bin du, sydd ar gyfer gwastraff amhosib ei ailgylchu.

Ailgylchu Bwyd (Bocs Brown)

Caiff gwastraff bwyd y Brifysgol ei anfon i safle Treulio Anaerobig lleol yng Ngwynedd o’r enw Biogen Gwyriad. Mae’r gwastraff bwyd yn cael ei anfon i Gwyriad yn hytrach nag i safle sy’n compostio mewn cynhwysydd oherwydd bod y llywodraeth yn cydnabod fod Treulio Anaerobig yn un o’r dulliau gorau o ailgylchu gwastraff bwyd, gan ei fod yn cynhyrchu trydan a gwres yn ogystal â bio-wrtaith, mewn cylch caeedig. Caiff y bio-wrtaith yma ei ddefnyddio ar dir ffermio lleol. Caiff gwastraff bwyd campws Wrecsam ei gasglu gan gwmni o’r Alban o’r enw Keenan Recycling Ltd. a’i gludo i gyfleuster Treuliad Anaerobig hefyd.

Beth yw ystyr cylch caeedig?

Mae ailgylchu cylch caeedig yn golygu bod y deunydd gwastraff sy’n cael ei ailgylchu’n cael ei ddefnyddio i greu eitem newydd sydd o safon debyg neu well na’r eitem wreiddiol.

Rydym yn derbyn y deunyddiau bwyd canlynol i’w hailgylchu: unrhyw fath o wastraff bwyd gan gynnwys bwyd amrwd, bwyd wedi’i goginio, bwyd sydd wedi pasio ei ddyddiad defnyddio, bwyd dros ben, esgyrn, cig, llysiau, ffrwythau, plisgyn ŵy, bagiau te a gweddillion coffi. Mae angen leinio’r cadis gwastraff bwyd â bagiau startsh priodol (sy’n gallu cael eu compostio). Mae’r rhain ar gael gan y Brifysgol.

Plîs tynnwch yr holl wastraff bwyd allan o’r pecynnau cyn ei roi yn y cadi gwastraff bwyd, a pheidiwch â rhoi’r deunydd lapio plastig na bagiau plastig yn y gwastraff bwyd oherwydd mi wnaiff hynny niweidio’r peiriannau. Peidiwch â rhoi hylif o unrhyw fath yn y cadi gwastraff bwyd chwaith rhag iddo ollwng a chreu llanast.

Peidiwch â rhoi cwpanau coffi, gwydrau, gwellt, cyllyll a ffyrc sydd wedi eu labelu ‘compostiadwy/pydradwy’ yn y cadi gwastraff bwyd, oherwydd dydyn nhw DDIM YN gompostiadwy/yn bydradwy yn y peiriant Treulio Anaerobig. Os fyddwch chi’n rhoi rhain i fewn gyda’r bwyd yn y cadi mae’n bosib y byddant yn difetha’r peiriannau, ac arafu’r broses gyfan. Hefyd peidiwch â rhoi cyllyll a ffyrc pren na gwellt papur yn y cadi gwastraff bwyd chwaith.

Am fwy o wybodaeth am y broses treulio anaerobig, dilynwch y dolenni:

Ailgylchu Plastig o’r Labordy (caeadau piws)

Cyflwynodd Prifysgol Bangor ailgylchu plastig labordy yn hydref 2019. Cesglir ein plastigau labordy di-berygl gan Humphrey’s Waste & Recycling Ltd a’u cludo i’w gorsaf drosglwyddo ym Mryngwran ar Ynys Môn i’w didoli. Gofynnwn ichi wagio'r holl hylifau cyn rhoi’r ailgylchu yn y biniau caead porffor.
Derbynnir y deunyddiau canlynol yn yr ailgylchu cymysg (biniau porffor): canister, tipiau pibed, tiwbiau sampl, cwfedau, pibedau, blychau blaen pibed, tiwbiau selio gwres, tiwbiau allgyrchu, chwistrelli, fflasgiau meithrin, dysglau pwyso, dolen inocwllwm, dysglau petri , tiwbiau eppendorf, caeadau, gynhalydd blaen pibedau a phlatiau dal samplau. Nid oes unrhyw eitemau eraill yn dderbyniol yn yr ailgylchu plastig o labordai, ac os ychwanegir hwy, byddant yn halogi'r llwyth ailgylchu. Yn benodol dim menig na bagiau plastig.

Gwastraff arall sy’n bosib ei ailgylchu

Ar gyfer Cyfrifiaduron ac offer Technoleg Gwybodaeth, plîs cliciwch yma.

Ar gyfer eitemau swmpus fel dodrefn, plîs cysylltwch â’r Ddesg Gymorth Cynnal a Chadw yn Wasanaethau Campws.