Gwaith Cymdeithasol Ôl-raddedig trwy Ddysgu - Mynediad: Medi 2024/25*

Mae'r MA Gwaith Cymdeithasol hwn yn Rhaglen Gymhwyso Broffesiynol.

Mae gwaith cymdeithasol yn newid bywydau ac mae gyrfa mewn gwaith cymdeithasol yn amrywiol ac yn rhoi boddhad. Mae’r MA 2 flynedd hwn mewn Gwaith Cymdeithasol yn darparu llwybr i ymarfer gwaith cymdeithasol proffesiynol, ac mae’n cynnwys modiwlau academaidd wedi’u hategu â lleoliadau ymarfer. Mae hyn yn rhoi’r sgiliau i fyfyrwyr ac yn eu paratoi i gymhwyso fel gweithwyr cymdeithasol a dechrau swyddi gwaith cymdeithasol proffesiynol o fewn y gweithlu gofal cymdeithasol. 

Caiff y cwrs ei lywio gan Feincnodau ASA ar gyfer Gwaith Cymdeithasol (ASA), a’r Safonau Galwedigaethol Cenedlaethol ar gyfer Gwaith Cymdeithasol (Gofal Cymdeithasol Cymru) ac mae’n cydymffurfio â gofynion Gofal Cymdeithasol Cymru fel rheoleiddwyr gwaith cymdeithasol Cymru.

Rydym yn gweithio mewn partneriaeth agos ag awdurdodau lleol Gwynedd, Ynys Môn a Chonwy, sy’n cynnal ac yn darparu lleoliadau i fyfyrwyr ar y rhaglen.

Nodweddion allweddol yr MA hwn mewn Gwaith Cymdeithasol yw: 

• Amserlen gryno o 2-3 diwrnod yr wythnos
• Lefel uchel o gefnogaeth tiwtor
• Lleoliadau ymarfer wedi'u trefnu ar gyfer myfyrwyr
• Dwyieithog*
• Cyflogaeth ar ddiwedd y cwrs gyda swyddi gwaith cymdeithasol yn dechrau o tua £35,000 y flwyddyn

*Mae ein partneriaid yn gofyn bod gan y myfyrwyr y maent yn eu derbyn sgiliau dwyieithog Cymraeg / Saesneg. Mae’r gofyniad hwn er mwyn diwallu anghenion eu cymunedau a chydymffurfio â’r hawl i wasanaeth Cymraeg o dan Ddeddf Gwasanaethau Cymdeithasol a Llesiant (Cymru) 2014 a Mesur yr iaith Gymraeg (Cymru) 2011. Mae hyn yn golygu bod myfyrwyr yn gallu dilyn darlithoedd sydd yn bennaf trwy gyfrwng y Gymraeg gyda sleidiau dwyieithog, ac yn gallu sgwrsio'n naturiol yn Gymraeg gydag unigolion dwyieithog. Fodd bynnag, nid ydym yn sôn am Gymraeg ‘berffaith’ (os oes y fath beth!). Mae myfyrwyr yn gallu cyflwyno eu hasesiadau yn eu dewis iaith. Os oes gennych ddiddordeb mewn gwneud cais am le ar y rhaglen, ond yn ansicr os yw eich Cymraeg yn 'ddigon da', dewch i siarad â ni. Gallwn helpu i asesu eich sgiliau a sicrhau nad ydych yn colli allan os yw eich sgiliau yn ddigon da, a/neu os gallwch elwa o gefnogaeth i adeiladu ar sgiliau presennol.

Cwestiynau Cyffredin

I gael rhagor o wybodaeth am yr MA hwn mewn Gwaith Cymdeithasol, darllenwch ein Dogfen Cwestiynau Cyffredin.  

Yn anffodus ni allwn dderbyn ceisiadau gan fyfyrwyr rhyngwladol ar gyfer y cwrs hwn.

Tystiolaeth Myfyrwyr

“Rwy’n teimlo’n ffodus fy mod wedi cael y cyfle i astudio Gwaith Cymdeithasol ym Mhrifysgol Bangor, ac wedi cael profiadau addysgu ac ymarfer gwerthfawr - gyda’r profiad ymarfer olaf yn arwain yn uniongyrchol at waith rwy’n ei fwynhau’n fawr. Trwy gefnogaeth y tîm ym Mangor, rwyf wedi magu hyder i weithio yn fy maes." Cai O'Marah. Myfyriwr Graddedig MA Gwaith Cymdeithasol.

“Roeddwn yn teimlo fy mod yn cael cefnogaeth dda iawn o’r broses ymgeisio i gwblhau’r cwrs. Mae cefnogaeth ac arweiniad y tîm ym Mangor a hefyd y tîm ar leoliadau wedi bod y tu hwnt i’r galw. Cwblhau’r cwrs yw’r peth mwyaf rwyf wedi ei gyflawni hyd yma.” Cherise Lloyd, myfyriwr graddedig MA Gwaith Cymdeithasol.

“Mae’r cyfleoedd a gefais ym Mangor wedi bod o fudd mawr i mi wrth ddechrau fy ngyrfa. Roedd eu cysylltiadau agos â'r Awdurdodau Lleol cyfagos a lleoliadau cysylltiedig yn gwneud y newid o fod yn fyfyriwr i Weithiwr Cymdeithasol newydd gymhwyso yn llawer haws." Kate Thomas, myfyriwr graddedig MA Gwaith Cymdeithasol

“Mae bod yn barod i helpu a chefnogi eraill ac yn barod am her yn rhan fawr o waith cymdeithasol. Mae gweithio i ddatblygu a gwella bywydau pobl eraill yn brofiad amhrisiadwy." Llinos Foulkes, myfyriwr graddedig MA Gwaith Cymdeithasol

Fideo: MA Gwaith Cymdeithasol

Beth fyddwch chi’n ei astudio ar y cwrs yma?

Byddwch yn cael eich addysgu trwy gyfrwng nifer o wahanol ddulliau addysgu a chyfleoedd dysgu. Bydd hyn yn cynnwys darlithoedd, seminarau, gwaith grŵp, chwarae rhan, projectau dysgu dan arweiniad myfyrwyr. Yn ystod eich 200 diwrnod o leoliadau ymarfer (a rennir yn ddau 100 diwrnod y flwyddyn), byddwch yn dysgu oddi wrth ymarferwyr medrus a phrofiadol o fewn amgylchedd dysgu strwythuredig a chefnogol. 

Gellir cynnal lleoliadau ymarfer mewn amrywiaeth o dimau gwaith cymdeithasol e.e. Plant a Theuluoedd, Anabledd, Oedolion Hŷn, Iechyd Meddwl. Mae lleoliadau’n cael eu cynllunio a’u trefnu’n ofalus gan gydlynwyr lleoliadau yn ein hawdurdodau lleol partner. Mae lleoliadau yn helpu i baratoi'r myfyriwr ar gyfer ymarfer gwaith cymdeithasol cyfannol a chyflogadwyedd o fewn y gweithlu gwaith cymdeithasol presennol.

Mae pob modiwl yn greiddiol i'r cwrs ac mae'n ofynnol i fyfyrwyr lwyddo ym mhob aseiniad

Blwyddyn 1

• Gwybodaeth a Sylfaen Sgiliau ar gyfer Gwaith Cymdeithasol
• Polisi Cymdeithasol ar gyfer Ymarfer Gwaith Cymdeithasol
• Y Cwrs Bywyd
• Gwerthoedd a Moeseg ar gyfer Ymarfer Gwaith Cymdeithasol
• Y Gyfraith ar gyfer Gwaith Cymdeithasol 1
• Y Broses Ymchwil
• Lleoliad Ymarfer 1 (100 diwrnod)

Blwyddyn 2

• Gwaith Cymdeithasol gydag Oedolion
• Gwaith Cymdeithasol gyda Phlant, Pobl Ifanc a Theuluoedd
• Y Gyfraith ar gyfer Gwaith Cymdeithasol 2
• Adolygiad Llenyddiaeth 
• Lleoliad Ymarfer (100 diwrnod)
• Traethawd Hir Gwaith Cymdeithasol

Traethawd hir: Mae’r traethawd hir yn rhoi cyfle i fyfyrwyr wneud ymchwil unigol sydd ar raddfa fechan, ond sy’n arwyddocaol, dan oruchwyliaeth oruchwyliwr ymchwil. Mae myfyrwyr yn nodi cwestiwn ymchwil a chasglu a dadansoddi data sy’n ymwneud â’r cwestiwn ymchwil, gan ddefnyddio fframwaith dadansoddol priodol. Maent yn ymdrin â’r cwestiwn ymchwil wedyn yng ngoleuni eu canfyddiadau. Cyflwynir yr ymchwil ar ffurf traethawd hir 20,000 o eiriau, gan ddefnyddio’r confensiynau arferol.
 

Modiwlau ar gyfer y flwyddyn academaidd gyfredol

Mae’r rhestrau modiwlau ar gyfer eich arwain yn unig ac fe allant newid. Cymerwch olwg ar yr hyn y mae ein myfyrwyr yn ei astudio ar hyn o bryd ar tudalen Modiwlau Gwaith Cymdeithasol.

Mae cynnwys y cwrs wedi’i nodi i’ch arwain yn unig ac fe all newid.

• Dosbarthiad Gradd 2.2 neu uwch
• O leiaf 3 mis (CALl) o brofiad gofal cymdeithasol perthnasol neu brofiad cyfatebol*
• TGAU Gradd C neu gymhwyster cyfwerth mewn Mathemateg a Saesneg/Cymraeg iaith gyntaf,  
• Mae cynigion ar gyfer lleoedd ar y cwrs yn seiliedig ar gyfweliad boddhaol ag ymgeiswyr sy'n bodloni'r meini prawf derbyn.
• Angen sgiliau Cymraeg siarad a gwrando**

Mae hefyd yn ofyniad bod yr holl fyfyrwyr a dderbynnir ar y rhaglen yn llwyddo i gael cliriad uwch gan y DBS, a'u bod yn gallu cofrestru gyda Gofal Cymdeithasol Cymru a chynnal eu cofrestriad trwy gydol eu hastudiaethau.

*Gall profiad fod yn waith gwirfoddol neu gyflogedig, yn cynnig gofal personol i unigolion, a/neu gymorth a chefnogaeth i unigolion, teuluoedd a grwpiau. Mae enghreifftiau’n cynnwys, ond heb eu cyfyngu i, waith cefnogi 1-1 yn yr ysgol, cynorthwyydd gofal cymdeithasol neu ofal iechyd, gweithgareddau chwaraeon a hamdden i blant/oedolion ag anableddau, cynllun i-can (cefnogaeth iechyd meddwl), eiriolaeth.  Mae'n bwysig bod gennych ddealltwriaeth sylfaenol o swyddogaeth gwaith cymdeithasol a pham y gallai fod angen gwaith cymdeithasol ar bobl ar adegau penodol yn eu bywydau.

**Mae hyn yn golygu eich bod angen y gallu i ddilyn darlithoedd sydd yn bennaf trwy gyfrwng y Gymraeg gyda sleidiau dwyieithog, ac yn gallu sgwrsio'n naturiol yn Gymraeg gydag unigolion dwyieithog. Gellir cyflwyno asesiadau yn Gymraeg neu Saesneg. Os oes gennych ddiddordeb mewn gwneud cais am le ar y rhaglen, ond yn ansicr os yw eich Cymraeg yn 'ddigon da', dewch i siarad â ni. Gallwn helpu i asesu eich sgiliau a sicrhau nad ydych yn colli allan os yw eich sgiliau yn ddigon da, neu os gallech elwa o gefnogaeth i adeiladu ar sgiliau cyfredol.

Am wybodaeth am sut i gael profiad gwaith ym maes gofal cyn gwneud cais, cysylltwch â:  

• Tonwen Davies, Cyngor Gwynedd 
• Maria Jones, Cyngor Sir Ynys Môn
• Nia O’Marah, Cyngor Bwrdeistref Sirol Conwy 

Yn anffodus ni allwn dderbyn ceisiadau gan fyfyrwyr rhyngwladol ar gyfer y cwrs hwn.

Ar ôl cymhwyso, byddwch yn gallu gweithio mewn amrywiaeth eang o leoliadau iechyd neu ofal cymdeithasol, gan weithio’n aml gyda gweithwyr proffesiynol eraill mewn timau amlddisgyblaethol. Mae ein cysylltiadau â chyflogwyr yn golygu bron bob blwyddyn bod ein holl raddedigion yn sicrhau contractau cyflogaeth cyn cwblhau eu hastudiaethau. Dros y 3 blynedd diwethaf, cafodd 100% o'n graddedigion eu cyflogi fel gweithwyr cymdeithasol. 

Tua £35,000 yw'r cyflogau cychwynnol arferol ar gyfer y swyddi hyn ar hyn o bryd.

Cysylltiadau â chyflogwyr

Mae'r brifysgol yn gweithio mewn partneriaeth ag Awdurdodau Lleol Gwynedd, Ynys Môn a Chonwy i ddatblygu, darparu a rheoli'r rhaglen Gwaith Cymdeithasol hon. Mae'r awdurdodau lleol sy'n bartneriaid yn cymryd rhan yn y broses recriwtio, dewis myfyrwyr a chyfrannu at addysgu ac asesu myfyrwyr. Mae’r partneriaid hefyd yn darparu cyfleoedd dysgu ymarfer, ynghyd ag asiantaethau cyflogi eraill, gan sicrhau bod myfyrwyr yn datblygu dealltwriaeth gref o ymarfer gwaith cymdeithasol yng Ngogledd Cymru, ochr yn ochr â’u datblygiad academaidd. Mae hwn hefyd yn gyfle da i gyflogwyr nodi gweithlu'r dyfodol. Rydym hefyd yn gweithio gyda gofalwyr ac unigolion sy'n defnyddio gwasanaethau cymdeithasol wrth recriwtio, asesu a rheoli elfennau o'r rhaglen.