Prentisiaethau Gradd
Fel rhan o Wythnos Prentisiaethau, mae Prifysgol Bangor yn tynnu sylw at y cyfleoedd i gyflogwyr ddatblygu ac ymgorffori sgiliau lefel uchel allweddol o fewn eu busnesau.
Mae Prifysgol Bangor yn gweithio’n agos gyda dau goleg Addysg Bellach yng Ngogledd Cymru, Grŵp Llandrillo Menai a Choleg Cambria ar bortffolio o gymwysterau wedi'u hariannu'n llawn yn cynnwys Peirianneg Meddalwedd, Seiberddiogelwch, Gwyddor Data a Pheirianneg Fecanyddol a Drydanol.
Mae Prifysgol Bangor yn gweithio’n agos gyda dau goleg Addysg Bellach yng Ngogledd Cymru, Grŵp Llandrillo Menai a Choleg Cambria ar bortffolio o gymwysterau wedi'u hariannu'n llawn yn cynnwys Peirianneg Meddalwedd, Seiberddiogelwch, Gwyddor Data a Pheirianneg Fecanyddol a Drydanol.
Mae Prentisiaethau Gradd yn cynnig dewis deniadol i gyflogwyr ddatblygu ac ymgorffori gwybodaeth flaengar wrth ddatblygu unigolyn mewn swydd allweddol. Gellir eu defnyddio i uwchsgilio aelod presennol o staff neu benodi i swydd Prentisiaeth Gradd newydd. Cynhelir dros gyfnod o dair blynedd a thra'n gweithio bydd y Prentis Gradd yn astudio yn y coleg a’r brifysgol am ddiwrnod a noson yr wythnos.
Gyda 40 o Brentisiau Gradd yn gweithio ac astudio ar hyn o bryd, mae Prifysgol Bangor a phartneriaid AB yn gweithio gyda chyflogwyr ledled y rhanbarth, gyda chwmnïau mawr fel Airbus y sector cyhoeddus, fel Bwrdd Iechyd Prifysgol Betsi Cadwaladr a llywodraeth leol yn ogystal â chwmniau mentrus bach eu maint
Datblygu sylfaen sgiliau lefel uwch
Dywedodd Dr. David Perkins, Cyfarwyddwr Academaidd y rhaglenni ym Mhrifysgol Bangor:
"Mae Prentisiaethau Gradd yn cynnig ffordd wych i sefydliadau ddatblygu eu sylfaen sgiliau lefel uwch wrth ddatblygu a symbylu gweithwyr. Mae’n glir o’r adborth gan gyflogwyr bod ein Prentisiaid Gradd yn unigolion llawn symbyliad sy'n perfformio'n dda ac yn rhoi gwerth gwirioneddol i'w cwmnïau lletyol."
Ychwanegodd Heather Jones, Cynghorydd Datblygu Busnes Grŵp Llandrillo Menai:
"Mae Prentisiaethau Gradd yn ffordd gost-effeithiol o gyflwyno sgiliau lefel gradd i'ch busnes mewn disgyblaethau allweddol. Rydym yn awyddus i siarad â chyflogwyr i weld a fyddai Prentisiaethau Gradd yn gweddu'n dda i ofynion datblygu eich gweithlu."
Mae rhagor o wybodaeth am Brentisiaethau Gradd a’n arweiniad i gyflogwyr ar Brentisiaethau Gradd ar gael ar wefan y brifysgol a gwefan Grŵp Llandrillo Menai.
