cyrptocurrency, phone, hands, graphs

Ymchwil newydd yn bwrw amheuaeth dros briodweddau 'hafan ddiogel' cryptoarian

Mae ymchwil newydd a gyhoeddwyd yn y cyfnodolyn International Review of Financial Analysis yn awgrymu y dylid trin honiadau bod cryptoarian yn imiwn i risgiau economaidd â chryn ofal.

Mae ymchwil newydd a gyhoeddwyd yn y cyfnodolyn International Review of Financial Analysis yn awgrymu y dylid trin honiadau bod cryptoarian yn imiwn i risgiau economaidd â chryn ofal.

Gwnaeth tîm o academyddion rhyngwladol ymchwil i’r cysylltiad rhwng prisiau cryptoarian a ffactorau megis anwadalrwydd y farchnad stoc a phrisiau olew, yn ogystal â sut mae cyfnodau cythryblus megis pandemig COVID-19 a’r rhyfel yn Wcráin wedi effeithio ar ymddygiad cryptoarian.

Gwnaethpwyd yr ymchwil gan academyddion o Ysgol Busnes Bangor, Prifysgol Economeg a Busnes Poznań, Gwlad Pwyl, Prifysgol Nicolaus Copernicus, Gwlad Pwyl a Phrifysgol Montpellier, Ffrainc.

Dywedodd Dr Danial Hemmings o Ysgol Busnes Bangor, “Trwy ddefnyddio mynegeion amrywiol sy’n cwmpasu meysydd risg amrywiol, o geowleidyddiaeth ac ansicrwydd economaidd i fynegeion Anwadalrwydd Prisiau Olew Crai ac Aur yn ogystal â defnyddio portffolio eang o gryptoarian, ceisiom gymharu arwyddocâd a maint trosglwyddiadau risg amrywiol rhwng prisiadau crypto-asedau a'r economi real.

Gwersi o gyfnodau cythryblus

“Un o brif addewidion crypto-asedau oedd eu gallu i warchod rhag risgiau, a’r hyn a ganfuom yw, er bod prisiad cryptoarian yn parhau i fod wedi’i ddatgysylltu i raddau helaeth oddi wrth risgiau economaidd, yn nhermau anwadalrwydd, fe wnaeth yr effaith crychdonni ar gryptoarian ddwysáu’n ystod cyfnodau cythryblus megis COVID-19 neu’r rhyfel yn Wcráin.”

Mae'r canfyddiadau hyn yn arwyddocaol gan eu bod yn pwysleisio'r gwahaniaethau bychain ym mhotensial crypto-asedau i warchod rhag risgiau.

Dylai hyn fod â goblygiadau o ran strategaethau buddsoddwyr wrth greu portffolio amrywiol, a dylai hysbysu'r ddadl ynghylch rheoleiddio cryptoarian. Dylai llunwyr polisi a buddsoddwyr fod yn ymwybodol, er y gall buddsoddiadau crypto ymddangos fel offeryn da i warchod rhag risgiau mewn cyfnodau economaidd arferol, mae eu gallu i warchod rhag risgiau mewn perthynas â rhai ffactorau risg yn cael ei ystumio neu ei wanhau mewn cyfnodau o gynnwrf economaidd, fel y dangoswyd yn ystod pandemig COVID-19 ac ymosodiad Rwsia ar Wcráin.
Dr Danial Hemmings ,  Ysgol Busnes Bangor, Prifysgol Bangor
Headshot of lecturer

Mae'r papur llawn ar gael yn rhifyn 94 yr International Review of Financial Analysis (2024).

Newyddion Perthnasol

It looks like you’re visiting from outside the UK, would you like to be redirected to the international page?

Yes, take me to the International page. No, I want to stay on the current page.