Bydd y gronfa bwrsariaeth gan Gyngor y Ddinas yn cynnig grantiau o hyd at £1,000 ar gyfer projectau sy'n cyd-fynd yn agos ag amcanion strategol y cyngor.
Bydd galwad am geisiadau yn agor ar 9 Ebrill ac yn cau ar 7 Fai. Bydd y ceisiadau'n cael eu gwerthuso gan banel, gan ystyried pa mor agos y mae'r ymchwil yn cyd-fynd â nodau strategol Cyngor Dinas Bangor. Rhoddir gwybod i ymgeiswyr llwyddiannus erbyn 4Mehefin, 2025.
Mae'r gronfa ar agor i fyfyrwyr israddedig yn eu blwyddyn olaf ond un sy'n symud ymlaen i’w blwyddyn olaf, i fyfyrwyr y drydedd flwyddyn sy'n gweithio ar brojectau eu blwyddyn olaf, ac i fyfyrwyr ôl-radd ar unrhyw gam o'u hymchwil. Yn ogystal â chynnig cefnogaeth ariannol, mae’r cynnig hwn hefyd yn gyfle i ymgeiswyr ymgysylltu â rhanddeiliaid allweddol yn y gymuned leol ac i gyfrannu at ddatblygiad parhaus y ddinas.
Er mwyn cymell ymchwil eithriadol ymhellach, bydd y cais sydd â'r sgôr uchaf yn cael arian cyfatebol ychwanegol gan M-SParc, i gefnogi datblygiad parhaus ymchwil yr ymgeisydd llwyddiannus. Mae gan M-SParc leoliad #AryLôn ar Stryd Fawr Bangor, i hyrwyddo arloesedd, cefnogi’r gwaith o adfywio’r Stryd Fawr, ac annog masnacheiddio syniadau busnes.
Mae’r gronfa bwrsariaeth yn gydweithrediad rhwng Cyngor Dinas Bangor, Prifysgol Bangor (tîm ymgysylltu dinesig), Undeb y Myfyrwyr, ac M-SParc. Gyda’i gilydd, nod y partneriaid hyn yw meithrin perthynas gref rhwng y brifysgol a’r ddinas, gan annog ymchwil sydd o fudd i’r gymuned leol a’r rhanbarth.
Dywedodd Gwenan Hine, Ysgrifennydd y Brifysgol ac Arweinydd Ymgysylltiad Dinesig, “Rydym wrth ein bodd yn lansio Cronfa Bwrsariaeth Cyngor Dinas Bangor, sy’n cynrychioli cyfle cyffrous i’n myfyrwyr a’n hymchwilwyr gymryd rhan mewn projectau ystyrlon sy’n cyfrannu’n uniongyrchol at ddatblygiad ein dinas. Yn ogystal ag atgyfnerthu’r cysylltiad pwysig rhwng Prifysgol Bangor a Chyngor y Ddinas, mae’r fenter hon hefyd yn grymuso myfyrwyr i gymhwyso eu harbenigedd academaidd i heriau'r byd go iawn. Rydym yn ddiolchgar i Gyngor y Ddinas am eu cefnogaeth ariannol i’r fenter hon, ac edrychwn ymlaen at weld y syniadau arloesol a’r ymchwil effeithiol a fydd yn deillio o’r cydweithio hwn.”
Dywedodd Martin Hanks, Cyfarwyddwr Dinas Bangor, “Mae’n bleser mawr bod Cyngor y Ddinas yn cefnogi’r fenter bwrsariaeth hon. Yn ein barn ni, bydd galluogi Cyngor y Ddinas i ddefnyddio gwaith ymchwil sydd gyda’r gorau yn y byd Prifysgol Bangor i'w helpu i wneud ei phenderfyniadau strategol yn amhrisiadwy i ddyfodol Bangor. I’r myfyrwyr, mae’n gyfle i weld eu gwaith academaidd yn cael effaith ar y gymuned leol.
"Ar nodyn personol, rwy'n falch iawn o weld project arall ar y cyd rhwng y brifysgol a Chyngor y Ddinas yn dwyn ffrwyth, a hoffwn ddiolch i bawb o Brifysgol Bangor a gymerodd ran wrth helpu i wireddu hyn.”
Dywedodd Nida Ambreen, Llywydd Undeb Myfyrwyr Bangor, “Mae cynllun Bwrsariaeth Myfyrwyr Cyngor Dinas Bangor yn cynnig cyfle anhygoel i’n myfyrwyr. Hoffwn ddiolch i bawb a gymerodd ran am eu hymdrech ar y cyd i wireddu’r cynllun hwn. Yn Undeb Bangor, rydym yn frwd dros rymuso myfyrwyr a chefnogi eu syniadau arloesol. Mae'r fwrsariaeth hon yn rhoi cyfle i fyfyrwyr gael effaith ystyrlon ar y gymuned wrth symud ymlaen â'u nodau academaidd. Rwy’n annog pob myfyriwr cymwys i wneud cais ac i fanteisio ar y cyfle hwn i lunio dyfodol Bangor.”
Gall myfyrwyr ddarganfod y ffurflen gais yma.
