Mae cyfres o bodlediadau Llond Ceg - Bwyd Cymraeg Cynaliadwy wedi cael eu lansio ar stondin Prifysgol Bangor yn Sioe Frenhinol Cymru, Llanelwedd.
Nod y podlediad Cymraeg ei iaith, sydd wedi ei gynhyrchu diolch i nawdd gan y Coleg Cymraeg Cenedlaethol, yw cynnig adnodd hyblyg a hygyrch i unrhyw un sydd yn dymuno deall a dysgu mwy am agweddau o gynaladwyedd, gyda’r pwyslais ar fwyd.
Fel rhan o’r gyfres, bydd arbenigwyr sy’n gweithio ar hyd y gadwyn fwyd yn sgwrsio am sut y mae bwyd yn rhan hanfodol o’n tirlun a hunaniaeth, y system fwyd leol yng Nghymru a’r heriau o ran sicrhau lleihau gwastraff bwyd a chymorth i deuluoedd ac unigolion sydd angen mynediad at fwyd fforddadwy a maethlon.
Yn y podlediad cyntaf, mae’r hanesydd bwyd Carwyn Greaves, awdur nifer o lyfrau ar fwyd Cymreig gan gynnwys Welsh Food Stories, yn trafod y berthynas rhwng bwyd, ein tirlun a’n hunaniaeth fel gwlad. Yn yr ail, cawn sgwrs am ffermio teuluol, ffermio gyda natur a’r system fwyd amgen gan Olwen Ford – sy’n ffermio ar gyffiniau Parc Cenedlaethol Eryri. Yna, sgwrs gyda Sonia Williams, Cydlynydd Bwyd Da Môn sef hwb bwyd sydd yn cynnig cymorth i arbed gwastraffu bwyd wrth ddarparu bwyd a prydau maethlon i deuluoedd ar draws Ynys Môn.
Roeddem yn awyddus i greu adnodd hyblyg a hygyrch fyddai'n gyfle i ni rannu persbectif a gwybodaeth arbenigwyr yn y maes gyda’r cyhoedd. Dros y gyfres, gallwch ddisgwyl dod i ddallt mwy am fwydydd lleol Cymreig, am gadwyni bwyd byrrach, a’r cyfle i ddarparu prydau maethlon trwy'r economi fwyd gylchol, yn ogystal â sut mae lleihau gwastraff bwyd yn lleihau allyriadau carbon diangen.
Yn ogystal â’r sgyrsiau, sydd ar gael ar wefan Prifysgol Bangor ac ar lwyfan adnoddau’r Coleg Cymraeg Cenedlaethol – Y Porth, bydd y platfform yn cynnig rhestr byr o destunau trafod a gwaith ymchwil ar lein, ac yn edrych ar enghreifftiau o astudiaethau achos o fewn y system fwyd leol gylchol.
“Mae'r safle Llond Ceg yn cyflwyno tamaid o wybodaeth am destun cyfoes iawn all cael ei ddefnyddio gan grwpiau ysgol neu Goleg sydd yn dilyn y BACC ar lefel TGAU neu Lefel A ac hefyd grwpiau cymunedol”, ychwanegai Dr Lane.
Meddai Dr Dylan Phillips, Cyfarwyddwr Addysg Uwch ac Ysgrifennydd y Coleg Cymraeg Cenedlaethol:
“Mae cronfa grantiau bach y Coleg yn cefnogi nifer o brosiectau diddorol mewn amryw o feysydd pwysig, ac roedd yn bleser gan y Coleg ariannu’r gyfres yma o bodlediadau am fwyd a chynaladwyedd. Mae Dr Eifiona Lane Thomas wedi gweithio’n galed i drefnu a recordio’r cyfweliadau difyr ac edrychwn ymlaen at lansiad y gyfres podlediadau ar faes y sioe eleni.”
