Fe wnaeth Postgrad Solutions Ltd, y cwmni y tu ôl i’r porth addysg ôl-radd byd-eang Postgrad.com, gyhoeddi safleoedd ar gyfer yr adrannau seicoleg yr oedd y galw mwyaf amdanynt yn y Deyrnas Unedig ar gyfer cyrsiau ôl-radd yn 2023/2024.
Yn bumed yn y Deyrnas Unedig, mae adran seicoleg Prifysgol Bangor wedi profi i fod yn ddewis gwych i fyfyrwyr ôl-radd, gan gadarnhau ymhellach ei henw da am ddarparu addysg o ansawdd uchel a chyfleoedd ymchwil ym maes seicoleg.
Dywedodd Yr Athro Dave Richardson, Pennaeth yr Ysgol, “Mae cyrraedd y pum safle uchaf yn adlewyrchu cryfder ein hymchwil, y rhaglenni ôl-radd arloesol a gynigiwn ac ymroddiad ein tîm. Mae'n braf gweld bod myfyrwyr ôl-radd yn cydnabod hyn ac yn chwilio am gyfleoedd ym Mangor."
Casglwyd y data y tu ôl i'r safleoedd hyn gan ddefnyddio algorithm pwrpasolPostgrad.com, sy'n cyfuno sawl metrig i ganfod lefel y diddordeb gan ddarpar fyfyrwyr ôl-radd. Roedd y ffactorau allweddol a ddylanwadodd ar y safleoedd yn cynnwys:
- Amledd termau chwilio o flwch chwilio Postgrad.com
- Traffig uniongyrchol i restrau adrannau seicoleg o chwiliadau organig
- Cyfanswm nifer y weithiau yr edrychwyd ar broffil pob prifysgol ar Postgrad.com dros y 12 mis diwethaf
Mae'r safleoedd hyn yn unigryw gan eu bod yn deillio'n gyfan gwbl o safbwynt myfyrwyr ôl-radd. Mae hyn yn cyferbynnu â thablau cynghrair prifysgolion traddodiadol, sy’n tueddu i ganolbwyntio ar raglenni israddedig. Trwy flaenoriaethu data ôl-radd-benodol, mae safleoedd Postgrad.com yn cynnig cipolwg gwerthfawr ar y galw presennol am adrannau seicoleg a'u rhaglenni ôl-radd ledled y Deyrnas Unedig.
Fe wnaeth Rob Houghton, Cyd-sylfaenydd Postgrad Solutions, dynnu sylw at bwysigrwydd y canfyddiadau hyn, “Mae seicoleg yn parhau i fod yn ddewis ôl-radd o’r radd flaenaf, ac mae myfyrwyr yn awyddus i ddod o hyd i’r cwrs perffaith. Rydym yn gyffrous i dynnu sylw at ganlyniadau ein hymchwil gyda'r pum ysgol hyn, y rhai y chwiliwyd amdanynt fwyaf yn gyson ar Postgrad.com. Mae gan bob adran gryfderau unigryw ac amrywiaeth wych o gyrsiau, sy'n darparu ar gyfer y maes hwn sy'n esblygu'n barhaus."
I ddysgu mwy am Seicoleg ewch i'r wefan a'r rhifyn diweddaraf o Y Meddwl a’r Corff, newyddlen yr Ysgol Seicoleg a Gwyddor Chwaraeon.
