Ein Hymchwil

Dyma gwestiynau ymchwil y Ganolfan Ymyrraeth Gynnar ar Sail Tystiolaeth:

• Beth sydd yn gweithio?
• I bwy mae'n gweithio?
• Sut a pham mae'n gweithio?

Mae ymchwil y Ganolfan Ymyrraeth Gynnar ar Sail Tystiolaeth yn canolbwyntio ar wyddor gweithredu, yr astudiaeth o ddulliau a strategaethau sy'n galluogi defnyddio canfyddiadau ymchwil mewn ymarfer. Mae gwyddor gweithredu yn edrych ar beth sy'n gweithio, i bwy ac o dan ba amgylchiadau, yn ogystal â sut y gellir cynyddu ymyriadau effeithiol.

Datblygodd y Ganolfan Ymyrraeth Gynnar ar Sail Tystiolaeth o broject a ddechreuwyd ym 1995 gan yr Athro Judy Hutchings, gyda chydweithwyr o'r GIG a Phrifysgol Bangor. Ei nod oedd datblygu a hyrwyddo ymyriadau i blant gydag ymddygiad heriol a sefydlu sylfaen dystiolaeth o raglenni a oedd yn sicrhau canlyniadau llwyddiannus. Mae dull arloesol yr Athro Hutchings o eirioli dros bwysigrwydd ymyrraeth gynnar drwy ddarparu cefnogaeth i rieni a’r angen am sylfaen dystiolaeth i ymyriadau i rieni bellach wedi ei fabwysiadu’n eang ledled y byd. 

Mae’r ffactorau sy’n cyfuno i leihau’r defnydd a wneir o ymyriadau sy’n seiliedig ar dystiolaeth yn cynnwys yr amser y mae’n ei gymryd i ddangos tystiolaeth o raglen fel mater o drefn ar draws gwahanol boblogaethau, diffyg hwyluswyr sy’n meddu ar y sgiliau priodol a chyfyngiadau ariannol. Mae’r Ganolfan Ymyrraeth Gynnar ar Sail Tystiolaeth wedi gweithio i fynd i'r afael â rhai o'r ffactorau hyn drwy wneud ymchwil i gefnogi effeithiolrwydd rhaglenni sy’n bodoli eisoes, neu drwy addasu rhaglenni. Mae’r tîm hefyd wedi ceisio hyrwyddo datblygiad a defnydd rhaglenni cost isel y gellir eu defnyddio ledled y byd, gan weithio gyda Sefydliad Iechyd y Byd i ddatblygu’r rhaglenni Rhianta ar gyfer Iechyd Gydol Oes.

Mae'r rhaglenni hyn yn cynnwys rhaglen gwrth-fwlio ysgol gyfan KiVa, y rhaglen rianta teuluoedd gofalgar, rhaglen llyfrau gyda'n gilydd a rhaglen un i un sy'n gwella sgiliau magu plant, ar gyfer teuluoedd â phlant heriol iawn.