Tystysgrif Cymraeg Gwaith Lefelau 1-7

Mae Prifysgol Bangor wedi datblygu cynllun i helpu staff i ddysgu sgiliau Cymraeg i’w defnyddio yn eu gwaith ar wahanol lefelau.  Mae’r cynllun yn gosod nod i’w gyrraedd ar bob lefel.  Mae’n cynnwys setiau o ddeialogau, ymadroddion a geirfa i’w defnyddio mewn gwahanol sefyllfaoedd yn y gwaith.  Gallwch ennill  Tystysgrif Cymraeg Gwaith trwy gael prawf ar ddiwedd pob lefel.  Mae dros 120 o staff wedi ennill tystysgrifau ers i’r cynllun gael ei sefydlu 5 mlynedd yn ôl.

Pam dilyn y cynllun hwn?

• Deunydd dysgu defnyddiol ar gyfer y gweithle e.e. croesawu ymwelwyr, ateb ffôn, siarad efo myfyrwyr, agor a chau cyfarfod neu gyflwyniad 
• Nod i’w gyrraedd a chymhwyster ar bob lefel o ddysgu
• Hyblygrwydd – gallu addasu’r deunydd a’r amser i'w ddysgu yn ôl gofynion eich swydd

Lefelau

Sut mae’r cynllun yn gweithio?

Mae’r cynllun yn hyblyg iawn ac yn hollol wirfoddol. Bydd y tiwtor Cymraeg i staff yn trefnu cael sgwrs hanner awr efo chi i drafod pa lefel sy’n addas i chi ac i gytuno ar y cynnwys. Bydd y cynnwys yn dibynnu ar eich gwaith chi a beth fydd yn ddefnyddiol i chi. Byddwch yn cael cyfres o sesiynau un-i-un efo tiwtor i ymarfer wedyn, ar amser sy’n gyfleus i chi.

Pan fyddwch chi’n teimlo’n barod, byddwn yn trefnu amser prawf i chi efo tiwtor arall.  Bydd y prawf llafar yn anffurfiol ac yn para tua 10 munud ar y lefelau 1-3, ac hyd at hanner awr efo’r lefelau 4-6. Mae pob lefel yn cynnwys ychydig o waith ysgrifennu. Gallwch wneud hwn yn eich amser eich hun cyn neu ar ôl y prawf llafar. Cewch ddefnyddio Cysgeir/Cysill (geiradur a gwiriwr iaith) i’ch helpu.