Beth fydd yn digwydd ar ôl i mi wneud cais am le ar y cwrs meddygaeth trwy UCAS?

Ar ôl i chi wneud cais i astudio ym Mhrifysgol Bangor, bydd UCAS yn anfon eich cais ymlaen atom. Cewch eich hysbysu pan fyddwn wedi cael eich cais, byddwn wedyn yn ystyried pob cais a ddaw i law erbyn dyddiad cau UCAS i gyrsiau meddygaeth. Yna byddwn yn llunio rhestr fer o geisiadau am gyfweliad.

Hysbysir ymgeiswyr os nad ydynt wedi llwyddo i gael cyfweliad cyn gynted â phosib ar ôl i bob cais gael ei adolygu ac wedi i’r penderfyniadau ynglŷn â chyfweliadau gael eu gwneud. Rydym yn disgwyl y byddwn wedi gwneud y penderfyniadau hyn erbyn diwedd mis Tachwedd

Os na fyddwch yn llwyddo i gyrraedd y rhestr fer am gyfweliad, efallai y byddwn yn cynnig lle i chi ar gwrs astudio amgen.

Cyfweliad

Gwahoddir ymgeiswyr sy'n cyrraedd y rhestr fer am gyfweliad (rhwng mis Rhagfyr a mis Chwefror fel arfer ar ôl dyddiad cau ceisiadau UCAS ym mis Hydref). Anfonir gwahoddiadau trwy e-bost gyda dolen i'n system archebu ar-lein ym mis Rhagfyr. Ar ôl i ymgeisydd drefnu cyfweliad, ni ellir newid y dyddiad/amser fel arfer, felly gwiriwch â'ch dewisiadau eraill i osgoi gwrthdaro rhwng dyddiadau (cyhoeddir dyddiadau cyfweliad ymlaen llaw yn aml).

Fformat y cyfweliad yw cyfweliadau bach lluosog (multiple mini interviews). Cynhelir y cyfweliad ar-lein trwy Zoom a bydd ar ffurf gorsaf ysgrifennu a gorsafoedd cyfweld llafar. Gofynnir cwestiynau am rinweddau a phriodoleddau personol a ystyrir yn bwysig i feddygon https://www.gmc-uk.org/ethical-guidance/ethicalguidance-for-doctors/good-medical-practice

Bydd sgôr terfynol yn cael ei bennu trwy gyfuno'r sgorau a gafwyd yn yr orsaf ysgrifenedig a'r gorsafoedd cyfweld llafar.

Rhaid datgan unrhyw amgylchiadau lliniarol hysbys a allai effeithio ar berfformiad ymgeisydd mewn cyfweliad wrth drefnu’r slot cyfweliad er mwyn caniatáu ar gyfer addasiadau rhesymol.

Os bydd salwch neu amgylchiadau lliniarol eraill ar ddiwrnod y cyfweliad fydd yn rhwystro ymgeisydd rhag cymryd rhan yn y cyfweliad, rhaid i’r ymgeisydd gysylltu â’r Tîm Derbyniadau (medicineadmissions@bangor.ac.uk) i roi gwybod iddynt cyn amser y cyfweliad. Trefnir dyddiad arall i’r cyfweliad, os yn bosib, ond ni ellir gwarantu hyn.

Rhaid i ymgeisydd ddod ag unrhyw bryderon am y cyfweliad i sylw'r Tîm Derbyniadau ar ddiwrnod y cyfweliad.

Ni wneir addasiadau ôl-weithredol ac ni ellir ystyried amgylchiadau lliniarol yn ôl-weithredol.

Bydd methu â dod i gyfweliad a drefnwyd heb resymau eithriadol yn arwain at wrthod eich cais ac ni chewch gynnig lle ar y rhaglen feddygaeth.

Cynigion

Dim ond ar ôl cwblhau pob cyfweliad y gwneir cynigion.

Bydd y Grŵp Derbyniadau yn cyfarfod â Phennaeth yr Ysgol Feddygol Gogledd Cymru a’r Cyfarwyddwr Cwricwlwm cyn gynted â phosib ar ôl cynnal yr holl gyfweliadau i bennu’r trothwy ar gyfer cynigion yn seiliedig ar sgôr y cyfweliad.

Rhoddir gwybod i ymgeiswyr llwyddiannus trwy UCAS

Os cynigir lle i chi, byddwch yn cael cynnig amodol neu ddiamod.

Mae cynnig amodol yn golygu y bydd rhaid i chi fodloni'r amodau rydym yn eu pennu - fel arfer trwy ennill graddau penodol yn eich arholiadau.

Mae cynnig diamod yn golygu eich bod eisoes wedi bodloni'r amodau y gofynnwn amdanynt.

Pan fydd yr holl brifysgolion ar eich rhestr wedi gwneud penderfyniadau, bydd UCAS yn cysylltu â chi gyda dyddiad cau ar gyfer eich atebion. Dylech wirio'r adran 'Your choices' yn eich cais UCAS a nodi'r penderfyniadau yno.