Ystyried mynd i'r brifysgol?

Dod o hyd i'r brifysgol perffaith i chi

Mi fyddwch chi eisiau gwneud y penderfyniad iawn, felly gwnewch yn siwr eich bod chi’n gwneud eich ymchwil i ddod o hyd i'r dewis iawn i chi. Meddyliwch am y pynciau yr ydych chi’n eu mwynhau ar hyn o bryd a sut fath o swydd yr hoffech chi ei gael ar y diwedd.

Cadwch feddwl agored a pheidiwch ag anghofio edrych ar bynciau tebyg e.e. os ydych chi'n hoff o Fioleg, edrychwch ar gyrsiau fel Bioleg Môr a Sŵoleg nes i chi ddod o hyd i'r cwrs sy'n fwyaf addas i chi.

Ar ôl i chi benderfynu ar y math cywir o gwrs, edrychwch ar y gwahanol brifysgolion sy'n cynnig yr hyn rydych chi'n edrych amdano. Cofiwch, er y dylai cynnwys ac ansawdd y cwrs fod yn uchel ar eich rhestr o flaenoriaethau, mae cymaint o bethau eraill i'w hystyried wrth ddewis y brifysgol berffaith i chi. Byddwch yn treulio llawer o'ch amser y tu allan i'r ystafell ddarlithio felly meddyliwch am y lleoliad, y bywyd cymdeithasol a'r llety sydd ar gael.

Cyfryngau Cymdeithasol a’r we

Ffordd wych o ddysgu mwy am yr holl brifysgolion gwahanol a'u cyrsiau yw mynd ar-lein ac ymweld â'u gwefannau. Byddwch chi'n gallu cael teimlad o'r brifysgol, gweld lluniau a gwylio fideos a fydd yn dweud mwy wrthych chi am sut beth yw astudio yno.

Mae hefyd yn awgrym da i ddilyn prifysgolion ar Facebook, Twitter, Instagram a Snapchat i gael yr holl newyddion, fideos, blogiau a lluniau diweddaraf.

Archebu Prospectws

Os byddai'n well gennych gael copi caled o'r holl wybodaeth, archebwch brospectws o wefan y brifysgol am ddim neu bachwch un mewn Ffair AU os ydych chi'n ymweld gyda’ch ysgol neu goleg.

Gofynion Mynediad

Edrychwch ar fanylion y cwrs i sicrhau bod eich graddau neu raddau disgwyliedig yn cyfateb i'r hyn maen nhw'n chwilio amdano. Hefyd, edrychwch a fydd angen unrhyw brofiad gwaith penodol arnoch chi i fyn i mewn.

Bydd rhai cyrsiau yn gofyn ichi sefyll prawf neu arholiad mynediad neu baratoi darn o waith cwrs tra bydd rhai prifysgolion yn gofyn ichi ddod i mewn am gyfweliad cyn cynnig lle i chi. Ond peidiwch â phoeni, gall eich ysgol neu goleg drefnu cyfweliad ffug fel eich bod wedi paratoi'n dda.

Prif Adeilad y Celfyddydau, Prifysgol Bangor

Ymweld â phrifysgolion

Y ffordd orau o ddod i adnabod prifysgol yn iawn yw ymweld ar Ddiwrnod Agored neu ymuno mewn Ddiwrnod Agored Ar-lein. Ewch i gymaint o ddyddiau agored ac y medrwch i gael blas o'r prifysgolion a'r cyrsiau.

Cofrestru Nawr

PETHAU ERAILL I'W HYSTYRIED

Myfyrwyr yn mwynhau ger y Llyn yn Llanberis

Mae maint a lleoliad yn bwysig i chi eu hystyried. Ydych chi'n chwilio am brifysgol dinas fawr neu gymuned glos lai? Edrychwch ar y map a gweld pa mor bell yw'r brifysgol rhag ofn y bydd angen i chi fynd ar deithiau adref yn aml gyda'ch golch neu ar gyfer penblwyddi teulu ac achlysuron arbennig.

Sut mae'r cyfleusterau? Sut mae'r brifysgol yn perfformio mewn tablau cynghrair? Ydyn nhw'n cynnig cyfleoedd astudio dramor neu brofiad gwaith? Mae'r rhain i gyd yn ffactorau y bydd angen i chi eu hystyried cyn llunio'ch meddwl.