Axudádeme a Cantar (Help me Sing): Galician Women, Song, and Hand-Held Percussion
Bydd Renée DePalma (Prifysgol A Coruña) yn cyflwyno'r fideo ddogfennol Axudádeme a cantar (2023) [Helpwch fi i ganu], sy'n archwilio'r traddodiad Galisaidd o ganu gydag offerynnau taro llaw, ffurf gelfyddydol a berthynai i’r merched yn hanesyddol. Cafodd y ffilm ei hariannu gan Gyngor Diwylliant Galisia, a’i chydgyfarwyddo gan Renée ynghyd â Carme López (cerddor ac addysgwr athrawon), Xulia Feixoo (cerddor ac ethnogerddoregydd) a’r gwneuthurwyr ffilmiau, Alejandro Gándara ac Olaia Tubío.
O safbwynt sosioieithyddol, mae’r ffilm yn ystyried y traddodiad yn ffurf ar lythrennedd llafar, ac yn ffynhonnell doreithiog o wybodaeth am arferion diwylliannol hanesyddol a ffurfiau ac amrywiaethau o’r iaith Galiseg. Mae’r ffilm yn mabwysiadu lens ffeministaidd, ac mae'n ceisio cydnabod y rôl bwysig y mae merched yn ei chwarae’n cadw, yn perfformio, ac yn ailddehongli'r agwedd allweddol hon ar fywyd cymdeithasol Galisia. Fel menter ethnograffig, mae'n dadansoddi'r ffyrdd y mae "traddodiad" yn esblygu ac yn parhau i gymryd arno ffurfiau newydd, yn hytrach na bodoli mewn gorffennol delfrydol, cynhenid yn unig.
Mae pob un o’r chwe phennod yn seiliedig ar gyfweliadau gydag offerynwyr taro traddodiadol ac addysgwyr ac artistiaid iau sy’n tynnu ar y merched hynny fel ffynhonnell deunydd ac ysbrydoliaeth. Caiff cyfraniadau'r hysbyswyr hynny eu hategu gan recordiadau byw o wyliau a deunyddiau fideo a sain archifol. Ymhlith y pynciau penodol yr ymdrinnir â hwy mae amrywiaeth ddaearyddol, torri’r gadwyn rhwng y cenedlaethau, dulliau mwy diweddar o gasglu a lledaenu, dylanwad allfudo, a dehongliadau artistig newydd sy'n tynnu ar y traddodiadau mewn ffyrdd creadigol.
Yn y sgwrs hon a noddir gan yr AHGBI (Association of Hispanists of Great Britain and Ireland), bydd Renée yn canolbwyntio ar berthnasedd y rhaglen ddogfen i Ganolfan Astudiaethau Galisaidd Prifysgol Bangor a sefydliadau tebyg, fel adnodd ar gyfer dysgu am yr iaith a’r diwylliant. Mae’r rhaglen ddogfen yn cynnwys isdeitlau Galiseg, Sbaeneg a Saesneg, ac mae project yn yr arfaeth ar hyn o bryd i lunio canllawiau addysgu a fydd yn cynnig syniadau a deunyddiau i’w defnyddio mewn addysg uwchradd a thrydyddol.