Dyfarnu Ysgoloriaethau Bangor Gynhwysol 2021/22

Daw Mae Bernard, o Lichfield, Swydd Stafford ac mae’n astudio am MSc mewn Niwroddelweddu yn yr Ysgol Gwyddorau Dynol ac Ymddygiadol, a dywedodd: “Roedd cymryd rhan mewn gwaith yn ymwneud â chydraddoldeb, amrywiaeth a chynwysoldeb yn bwysig i mi oherwydd fy mod yn ymdrechu i wneud y byd yn lle gwell i’r cenedlaethau ar fy ôl ac mae cydraddoldeb i bawb yn rhan bwysig o hynny. Ar ben hynny, gall amrywiaeth a chynhwysiant mewn lleoliadau addysg helpu i gael gwared ar ragfarn ddiwylliannol o'n gwaith a gall gyfoethogi'r gymdeithas ehangach trwy gynnig profiadau a safbwyntiau newydd. Mae cael yr ysgoloriaeth hon wedi golygu y gallaf aros ym Mangor a pharhau i wneud y brifysgol a'r ddinas yn well lle.”

Mae Eddie Cox, o Fanceinion, yn astudio am MA mewn Archaeoleg Geltaidd yn Ysgol Hanes, y Gyfraith a Gwyddorau Cymdeithas. Meddai Eddie: “Ar ôl profi pa mor anhygoel o ddigalon yw profi gwahaniaethu yn y byd academaidd, dwi'n angerddol am greu amgylchedd academaidd sy'n groesawgar ac yn gynhwysol. Mae Prifysgol Bangor wedi bod yn gefnogol iawn i faterion yn ymwneud â chydraddoldeb, amrywiaeth a chynwysoldeb yn fy maes i yn ystod fy ngradd israddedig ac mae'n amlwg bod llawer o ddarlithwyr a staff benywaidd yn wybodus iawn am gynhwysiant. Fodd bynnag, hoffwn weld mwy o drafodaethau ynghylch materion yn ymwneud â chydraddoldeb, amrywiaeth a chynwysoldeb o fewn modiwlau, o ran amrywiaeth ymhlith staff a myfyrwyr presennol, ac o ran ein dealltwriaeth o'r gorffennol. Dwi’n ddiolchgar iawn am y gefnogaeth ges i gan grŵp Athena Swan y Brifysgol ac edrychaf ymlaen at y cyfle i wthio am gynwysoldeb, yn y brifysgol ac o fewn fy maes yn ehangach.” 

Mae Thea Moule o Fangor yn astudio am MRes mewn Bioleg Môr yn Ysgol Gwyddorau Eigion a dywedodd: “Mae'n anrhydedd derbyn Ysgoloriaeth Bangor Gynhwysol i astudio MRes mewn Bioleg Môr. Bydd yr ysgoloriaeth yn rhoi i mi'r sefydlogrwydd ariannol i fedru ymroi yn llawn i weithio ar fy mhwnc ymchwil. Ar ben hynny, bydd yn fy ngalluogi i symud ymlaen â fy nyheadau o ran gyrfa sef bod yn ymchwilydd ecoleg môr. Fodd bynnag, mae bwlch sylweddol rhwng y rhywiau ym meysydd STEM - dydy merched ddim ond yn cyfrif am 30% o ymchwilwyr gwyddonol ledled y byd, ac mae’r ganran yn llai fyth ym maes Gwyddorau’r Eigion. Felly, mae'r cyfle i fod yn rhan o waith cydraddoldeb, amrywiaeth a chynwysoldeb yn bwysig er mwyn parhau i fynd i'r afael â thangynrychiolaeth merched fel ymchwilwyr a helpu i hyrwyddo cydraddoldeb rhywiol a chynwysoldeb ym meysydd STEM."

Dywedodd yr Athro Morag McDonald, Deon Coleg Gwyddorau'r Amgylchedd a Pheirianneg a chadeirydd Grŵp Athena SWAN y Brifysgol:  

Mae Grŵp Athena Swan y brifysgol wedi bod yn dyfarnu ysgoloriaethau graddau Meistr ers nifer o flynyddoedd. Eleni roedd “Ysgoloriaethau Bangor Gynhwysol” yn agored i bob myfyriwr sy'n parhau â'u hastudiaethau ym Mangor. Y nod oedd dathlu ac amlygu'r myfyrwyr hynny sydd, nid yn unig yn rhagori yn academaidd, ond sydd hefyd yn cyfrannu at newid diwylliannol ac at amrywiaeth yn eu dewis faes. Rwy’n falch iawn ein bod wedi dyfarnu’r ysgoloriaethau i dri myfyriwr rhagorol sy’n gwneud yn union hynny. Hoffwn longyfarch Mae, Eddie a Thea ar dderbyn yr ysgoloriaethau eleni ac edrychaf ymlaen at weithio gyda nhw wrth gefnogi a datblygu cymuned gynhwysol ym Mhrifysgol Bangor.

Mae Prifysgol Bangor yn aelod o siarter Athena SWAN ac felly wedi ymrwymo i gydraddoldeb rhywiol ac amrywiaeth, ac i greu a hyrwyddo diwylliant cynhwysol i staff a myfyrwyr ar bob lefel. Diben ysgoloriaethau Bangor Gynhwysol yw cefnogi myfyrwyr sy'n graddio i barhau â'u hastudiaethau ym Mangor - yn enwedig mewn meysydd lle ceir tangynrychiolaeth o grwpiau penodol ar lefel ôl-radd a/neu lle mae merched yn gadael y meysydd hynny oherwydd diffyg cyfleoedd.